AMOS 8 - Susula Malalaok Hehelu Palak Ma Hehelu Beuk

Ninitak la'eneu sapai ai boak

¹ Au hapu ninitak esa seluk neme Manetualain Fo Mademaina mai. Au ita ai boa latuk henu sapai esa.

² Boema Manetualain natane au nae, “O mita beek, Amos?” Au ataa ae, “Au ita sapai esa, ai boa latuk henun.” Boema Manetualain nafa'da nae, “Leondiak boe, Au anang Israel fain-na losa soaneu nanahukuk so. Neukose Au ta dodoo asafali seluk Au dale tutu'ung-nga so'on, de tao leo bee-o, neukose Au hukus.

³ Nai faik ndia nakameek manai uma manek-kala, neukose lasafali da'di kikii-makaleleuk. Nai mamanak lala'en-na, mamates nanatapa henik no denge-dengek-ka, lalefule'ak.”

Israel nanahukuk

⁴ Mamanene leon, hai emi fo manatuni-ndeni hataholi nuu-taa hata-taak manai nusak ia, nalosa mopo-mates!

⁵ Emi kokolak nai emi dalen dale mae, “Fai malole bula moli beuk ndia doon-na seli. Ita hii tase'o seluk ita gandum-mala no lai-laik, tehu fai malole ndia ta nau basa fan. Fai hi'da fo besak-ka fai Sabat-ta nate'e, fo daenga ita mulai tase'o seluk? Ita tahiik tan seli no eno ke'di-ndiuk, tipu-dai tenik uuku-dodouk, ma ata ke'di-ndiu hataholi nenik tatais.

⁶ Bisa tase'o gandum nalutuk-kala nenik belin-na nai lain. Ata sanga hataholi nuu-taa hata-taak fo ana ta bae nabe'i hutan-na, leomae hutan ndia ka'da ta'bueis dua, fo ata asa-ta hataholi mahutak ndia, fo ata taon da'di ita atan.”

⁷ Manetualain, fo leoina Israel-la Manetualain-na, soo-supa basa nae, Neukose Au ta afandele heni sila tatao-nono'i mangalaun-na fa.

⁸ Neukose daebafak-ka dele, ma basa hataholi-la dalen-nala susa. Basa nusak-ka lala'en-na nanggengo ma ko'ba-ka'bo sama leo Lee Nil-la.

⁹ Neukose fain-na losa, Au fe le'do tenak nai lelek le'dohana, ma daebafak-ka makahatuk nai fai lele'don-na. Au, Manetualain Fo Mademaina, kokolak ae leo ndia.

¹⁰ Neukose Au tao asafali emi fai malolem-mala da'di fai manafaluk, ma emi nakameem-mala, da'di kikii-makaleleuk. Neukose Au tao-a emi nggeu heni emi langadoom-ma ma pake si'di kalong, fo da'di neu ta'du-tana dale he'dik. Neukose emi da'di sama leo ina-amak fo ala kii makaleleu ana kisan-na, mamaten-na. Neukose faik ndia nate'e no dale he'dik nanseli.

¹¹ Manetualain Fo Mademaina, nafa'da nae, “Neukose fain-na losa, Au fe la'a-ndoes da'di nai nusak ia. Neukose hataholi-a namala'a, tehu ta namala'a nana'a-nininuk fa. Neukose hataholi-a maa ma'da, tehu ana ta maa ma'da oe fa. Te lamala'a ma maa ma'da neu Au dede'a-kokolang.

¹² Neukose hataholi-a naleu-nalaak neme kii leo kona ma neme dulu leo muli neu, fo ana sanga Au hala dede'a-kokolang, tehu ala ta hapu fan.

¹³ Nai faik ndia, lena-lenak muli-soluk fo so'da-la'dak-kala boeo, neukose ala sapala'o nanahu maa ma'dak-ka.

¹⁴ Hataholi fo ana soo-supa nenik Samaria sosongo-tatangon no nafa'da nae, ‘No leoina Dan-na lamatua daebafan-na na'den-na’, do ‘no Bersyeba lamatua daebafan-na, na'den-na’. Soona neukose ana tu'u neu, fo ana ta fo'a so'on.”