AMOS 5 - Susula Malalaok Hehelu Palak Ma Hehelu Beuk

Hala nalolook soaneu tukatei-saledale

¹ Hai, hataholi Israel-la lemin! Mamanene leona! Au sanga akamee nakamee susa esa ba'eneu emi nae lao ia:

² Israel fo bei matatema, ana tu'da so, neukose ana ta fo'a so'on! Nanapo'ilotak nai dae-oen lain, ta hapu esa boen tulu-falin fo napadeik fa.

³ Manetualain Fo Mademaina nafa'da nae, “Kota esa nai Israel, ana hoka solda'dun lifun esa leu latee-lata'ti, tehu ka'da natun esa fali ma'is. Kota fe'ek hoka solda'dun natun esa leu latee-lata'ti, tehu ka'da 10 fali ma'is.”

⁴ Manetualain nafa'da hataholi Israel-la nae, “Fali leo Au mai leona, soona neukose emi maso'da.

⁵ Boso meu sene-do'ok nai Bersyeba. Boso meu sanga Au nai Betel, nana neukose Betel mopon. Boeo boso meu leo Gilgal meu, nana kota ndia laun-nala, neukose nanafook leo mamana tu'u-tapak neu.”

⁶ Fali leo Manetualain Manakoasa mai leona, soona neukose emi maso'da. Metema emi ta fali fa soona, neukose Ana mai sama leo ha'i masalolo'dek-ka, fo ana hotu heni basa hataholi Israel-la. Ta hapu hataholi esa boen nai Betel bisa taonisa ha'i ndia fa.

⁷ Soe ba'eneu emi fo manaputa-balek ndoos ma matetuk-ka, ma manatipu-dai hataholi baba'en-na!

⁸ Manetualain nde tao nduuk manai lalai-la – nduuk Belantik ma nduuk Kartika: Ana tao nasafali makahatuk-ka da'di mangale'dok, ma lele'dok-ka da'di le'odaek; Ana po'a oe manai tasi dale-a leo ma'dak lain mai, Fo manatao basa sila-la, na'den-na nde Manetualain.

⁹ Ana tao namopo-namate hataholi manakoasa-la sama-sama loo kota musun-nala.

¹⁰ Emi makamuu-makadau hataholi fo ana la'ban ndoos ma matetuk-ka, ma manakokolak ndoos nai manakee-manafula matan.

¹¹ Emi tuni-ndeni hataholi nuu-taa hata-taak-ka, ma emi loso-ma sila gandum-ma. Hu ndia de, neukose emi ta leo nai emi uma manaahiim fo emi taom-ma ka dalek fa. Neukose emi ta minu angol fo emi sele nai emi osim-mala dalek fa.

¹² Au bubuluk emi mangalaum-ma ba'un-na seli, ma emi sala-singom ba'un-na seli. Emi tuni-ndeni hataholi malole-a; emi mi'a solok ma emi po'ilotak ala tao hataholi nuu-taa hata-taak-ka ta no ndoos ma matetuk nai manakee-manafula matan.

¹³ Hu kande emi tatao-nono'i ma ndia, de hataholi manatee-tenok-kala dodoo lae, malole lenak ka'da bedenge nai le'do-fai mangalauk leondiak-ka.

¹⁴ Sanga enok fo tao malole, fo boso tao mangalauk, fo daenga emi maso'da. Soona Manetualain Fo Manakoasa, neukose te'e-te'e, Ana leo nai emi tala'da sama leo emi mafa'dak-ka.

¹⁵ Makamuu-makadau mangalauk-ka, ma sue-lai malole-a, ma tao matetu eno ndos ma matetuk-ka. Fafa'ka ma Manetualain neukose Ana sue-lai bei ela leoina Israel-la hataholin-nala.

¹⁶ Manetualain Fo Manakoasa nafa'da nae, “Nai kota enon-nala lain, neukose hataholi-la kii-makaleleu ma ala haladoi, nanahu dalen-nala he'dis-sa. Lena-lenak, neukose laloo hataholi manatao tina-osi-la, fo ala kii sama-sama loo ala bae hataholi manakii-makaleleu mamates-sa.

¹⁷ Neukose, hataholi ala kii-makaleleu nai basa osi angol-la dalek, nanahu Au mai fo Au huku emi. Au, fo Manetualain nde manakokolak-ka.”

¹⁸ Tete'ek-ka, soe ba'eneu emi fo mahiik Manetualain fain-na! Faik ndia, sosoan-na beek ba'eneu emi? Faik ndia ka'da nalupa fai makahatuk, te ta fai mangale'dok ba'eneu emi fa.

¹⁹ Heo-hilun sama leo hataholi fo nalai neme singa mai, tehu natongo no meoasu-a. Do sama leo, hataholi fo ne'un leo uma neu, de ana to'ba liman-na neu uma papala nanadaman-na, boema menge kaan!

²⁰ Memak Manetualain Fain-na neni makahatuk, te ta mangale'dok fa. Fai masakoko'ak ma manamama'uk.

²¹ Manetualain nafa'da nae, “Au ta hii, ma malua mete emi agama-ma fai malolen-nala!

²² Metema emi meni tutunu-hohotu bana ma tutunu-hohotu gandum soona, neukose Au ta sipo fa. Au ta nau sipo emi bana-manu maaom, fo emi fen neu Au da'dileo tunu-hotu mole-dame fa.

²³ Hahae emi nakameem fo ka'da taon-na di'idoo-tala kikii. Au ta nau amanene emi kecapim-ma liin-na fa.

²⁴ Malole lenak sanga enok, fo daenga eno ndoos ma matetuk-ka, ana faa sama leo oe-a, ma tatao-nono'ik fo tunga ndoon-na, ana faa sama leo lee manama'da taak-ka.

²⁵ Hai hataholi Israel-la lemin, nai lelek Au hela-nole emi tunga moo solokaek-ka teuk haahulu dalen-na, Au ta oke akaseti tunu-hotuk, ma tutunu-hohotuk neme emi mai fa.

²⁶ Tehu besak ia, emi sene-do'ok neu Sakut, fo emi mafa'da mae emi manem-ma nde ndia, ma neu Kewan, nduuk fo emi taon da'di emi lamatuam ndia. Hu ndia de, emi muse lu'a aom, emi taom-ma dodoki-dudulak sila-la,

²⁷ nai lelek Au tu'u-tapa emi leo nusak esa, doo lena neme Damsyik mai. Au Manetualain fo na'de Manetualain Fo Manakoasa, nde manakokolak-ka.”