AMOS 3 - Susula Malalaok Hehelu Palak Ma Hehelu Beuk

¹ Mamanene Manetualain hala hehelun-na nde ia, hai leoina Israel fo Manetualain nos kalua leme Masir mai! Manetualain nafa'da nae,

² “Neme basa leoina manai daebafak-ka, emi nde leoina fo Au alelak ma Au taoafik-ka. Hu ndia de, hu ka nde emi sala-singo matuainam-ma, de tao leo bee-o, neukose Au huku emi.”

Nabi bela-ba'un

³ Metema hataholi 2 sanga la'o sama-sama soona, duas lakokolaaok lakahuluk do ta?

⁴ Metema singa beita hapu nana'an-na fa soona, nangao nai nula dale do ta? Metema singa ana beita ho'un-na hata esa boen soona, nangao nai bolon dale do ta?

⁵ Metema hihi'ik-ka nanalona beitak soona, ade nala manupui do ta? Metema hihi'ik-ka beita nala hata esa boen soona, ana kosu do ta?

⁶ Metema hataholi manai kota dale-la, lamanene pupuu musu liin-na soona, ala dele ngge'be-ngge'be do ta? Metema Manetualain ta haitua susa-soe leo kota esa neu fa soona, kota ndia hapu susa-soe do ta?

⁷ Manetualain Fo Mademaina, metema beita nafa'da dale tutu'un-na neu basa nabi la, fo atan-nala fa soona, Ana beita tao hata esa boen.

⁸ Metema singa nangao soona, see kande ta bii fa? Metema Manetualain Fo Mademaina, kokolak soona, see kande bisa denge-denge fo ta tui-benga hala hehelun-na fa?

Samaria nakalulutuk

⁹ Po'a-benga dede'ak ia neu hataholi manaleo nai uma manek Masir-ra, ma Asdod-tala mae leo ia, “Makabubua meu lete-letek manai Samaria boboa-kaisun-nala, fo taoafik neu tasi'bu matuaina ma lumu-esek-ka nai naa.”

¹⁰ Manetualain nafa'da nae, “Hataholi-la tao lahenu sila uma manen-nala nenik bua-lo'as fo ala hapus neme lumu-esek ma tatao-nono'i susue-lalai taak-ka mai. Lena-lenak ala ta tao tunga ndoon-na makandondook fa.

¹¹ Hu ndia de, neukose musu-a okofeo-na sila nusan-na, fo ala tao lakalulutuk kota musun-nala, ma ala bonga uma manen-nala.

¹² Sama leo manafoo esa, ana hapu falik bi'ilopon fo singa kaa-nan ndia, ein 2 do di'idoon seli, leondiak boe laun Samaria-la, ela ka'da lumaanak mesan, fo besak ia langape'uk mala'da-mala'da nai pepe'u mangana'uk lain.”

¹³ Manetualain Fo Manakoasa, ma Mademaina nafa'da nae, “Besak ia taoafik leona, fo fe nasanene'dak neu Yakob tititi-nonosin-nala.

¹⁴ Nai faik fo Au huku hataholi Israel-la, hu kande sala-singon-nala soona, neukose Au tao akalulutuk basa mei tunu-hotuk manai Betel-la. Neukose Au helu la'di mei tunu-hotuk-kala esa-esak pe'dan-na, fo ala tu'da leo dae lain neu.

¹⁵ Neukose Au tao akalulutuk uma soaneu fai oefaan-na, ma uma hahaeaok soaneu fai hanan-na. Neukose uma-uma fo nanabalias nenik nggadi dui-la, ala tu'u leu. Neukose basa uma matuaina-la lutu-lutu.