AMOS 2 - Susula Malalaok Hehelu Palak Ma Hehelu Beuk

Moab

¹ Manetualain nafa'da nae, “Laun Moab-pala lasala-lasingo tataas esa so, hu ndia de, tao leo bee-o, neukose Au hukus. Lakadadaek Mane Edom fo manamatek basak ndia, nenik ala kali laten-na, boema ala ho'i-la duin-na, de ala hotun da'di afu.

² Hu ndia de, neukose Au haitua ha'i-a leo nusa Moab-pa neu, fo na'a heni kota musu Keriot-ta. Neukose mate hataholi Moab-pala nai natee-nata'ti manadodolok-ka tala'da, nai lelek bei puu pupuuk-ka, ma eeki musu-a dolo-dolo.

³ Neukose Au taoisa manakoasa Moab-pala ma manapaletan-nala.”

Yehuda

⁴ Manetualain nafa'da nae, “Hataholi Yehuda-la lasala-lasingo tataas esa so, hu ndia de, tao leo bee-o, neukose Au hukus. Ala la'olena Au paletang-nga la, ma ala ta taoafik neu Au nanoling-ngala fa. Ala la'ok sala nanahu bei-ba'i kai-nala sene-do'ok neu lamatua daebafa fe'ek-kala tatao-nono'in.

⁵ Hu ndia de, neukose Au haitua ha'i-a leo Yehuda neu fo na'a heni basa Yerusalem kota musun-nala.”

Manetualain huhuku-na soaneu Israel

⁶ Manetualain nafa'da nae, “Hataholi Israe la lasala-lasingo tataas esa so, hu ndia de, neukose Au hukus. Hataholi manatao tunga ndoon-na, tehu ana ta hapu nggati falik hata totona-na fa, lase'o henin fo ana da'di ata. Leondiak boe, sila ha'da-tataon neu hataholi nuu-taa hata-taak fo ana ta hapu bae hutan-na, leomae hutan ndia belin-na ka'da ta'bueis pasan esa.

⁷ Ala tuni-ndeni hataholi tapandoes fo be'i-balakain ta, ma ala usiheni hataholi nuu-taa hata-taak-ka. Ama no anan-na sungu loo ata inak esa, de ala tao langgenggeo Au na'de malalao-malalafung-nga.

⁸ Nai mamana makaluku-makatele lala'en-na, hataholi-la sungu loo ba'du fo ala ho'i-lan da'di neu bua pepe'dak esa neme hataholi nuu-taa hata-taak-ka, hutan-na mai. Ala ho'i-la angol fo ala ho'i-lan neme hataholi manamahutak neu sila, fo linu nai sila Manetualain-na, Uman dale.

⁹ Leomae leondiak boe, hai Au anang-ngala lemin, hu ka nde emi, de Au tao amopo-amate hataholi Amori fo mademaina sama leo ai kaiou, ma balakaik sama leo ai terpentin.

¹⁰ Au o falik emi kalua meme dae Masir-ra mai so, ma Au hela-nole emi teuk haahulu dalen-na neme moo solokaek-ka. Au fe hataholi Amori-la daen-na neu emi fo da'di emi nusam-ma.

¹¹ Au hele basa emi anam de'ubee fo ala da'di nabi, ma emi hataholi muli-solum de'ubee fo ala da'di Nazir. Hai hataholi Israel-la lemin? Ade, dede'ak ndia, ta tete'ek-ka fa do? Au, fo Manetualain nde manakokolak-ka.

¹² Tehu emi hataholi Nazir-mala linu angol, nalosa angol-la tao-nalas ala mafuk, de lalelesi hehelu-balataan. Ma emi kena-ka'i nabi-la, fo boso tui-benga Au hala hehelung-nga.

¹³ Besak ia, neukose Au ne'e emi losa dae lain, nalosa emi nggiso-nggasi sama leo kaleta fo henuk no gandum-ma.

¹⁴ Manamalai makamiuk-kala boeo, neukose ta laladeak fa. Hataholi balakaik-kala, neukose mopo balakain-na, ma hataholi ao kahelek-kala, neukose ta lala huhukuk-ka deak fa.

¹⁵ Manakou malelak-kala, neukose ta lakatatakak fa, manamalai makamiuk-kala, neukose ta hapu lalai fa, ma manasa'e ndala-la, neukose ta lala deak fa.

¹⁶ Nai faik ndia, solda'du palani ta'ti batu-la boeo, neukose ala la'oela sisilon-nala fo lalai. Au, fo Manetualain nde manakokolak-ka.”