2 SEMUEL 9 - Susula Malalaok Hehelu Palak Ma Hehelu Beuk

Dauk ma Mefiboset

¹ Faik esa boema, Dauk natane nae, “Bei hapu hataholi maso'dak nai Saul teidalen-nala dalek boe do ta? Metema, bei hapu soona, au hii tao malole neus, nanahu Yonatan.”

² Ladenu Saul teidalen-nala, atan esa na'de Ziba, neu nataa Mane Dauk-ka. Boema, Manek-ka natanen nae, “Ziba nde o do?” Boema nataa nae, “Hei, Ama Manek.”

³ Basa boema, manek-ka natane nae, “Bei hapu hataholi maso'dak nai Saul teidalen-nala dalek boe do ta? Au hii tao malole neun, sama leo au helu basan neu Manetualain so.” Boema, Ziba nataa nae, “Bei hapu Yonatan anamanen esa. Tehu ei helak.”

⁴ Manek-ka natane nae, “De nai bee?” Ziba nataa nae, “Nai Lodebar, fo nai Amiel anan Makhir,” uman.

⁵ Boema, Mane Dauk-ka nadenu leu laloo Yonatan anamanen ndia.

⁶ Yonatan anamanen ndia na'de, Mefiboset. Lelek ana mai boema, ana sene-do'ok, fo ana fe ha'da-holomata neu Dauk. Dauk nabengan nae, “Mefiboset,” boema nataa nae, “Ou, Ama Manek.”

⁷ Boema, Dauk nae, “Boso bii, te neukose, au daleng-nga malole neu o, nanahu o amam Yonatan. Neukose, au fe falik basa o ba'im Saul daen-nala leo o neu, ma o bole mu'a-minu nai uma manek-ka, losa dodoon-na.”

⁸ Mefiboset sene-do'ok seluk, ma nafa'da nae, “Atam ia, sosoa-ndandaan beek! Tao le'e de, Ama Manek malole nanseli neu atam-ma?”

⁹ Boema, manek-ka naloo Ziba, fo Saul atan ndia de nafa'dan nae, “Saul no teidalen-nala la'o ela basa hata lala'en-na, au fes leo o tuam-ma, upun ia neu.

¹⁰ O ma o anam-mala, boema o atam-mala, muse foi-fala dae ndia, soaneu o tuam Saul teidalen-nala, ma fe dae ndia oe-isin leo sila neu, fo ala tao latetu sila paluun-na. Tehu, Mefiboset bole na'a-ninu nai uma manek-ka, losa dodoon-na.” (Ziba anatoun sanahulu lima, ma atan duahulu.)

¹¹ Ziba nataa manek-ka nae, “Basa Ama Manek paletan lala'en-na, neukose atam-ma tao natetun.” Da'di, Mefiboset na'a-ninu no manek-ka, nai mei esa lain, sama leo Mane Dauk-ka anamanen-na.

¹² Mefiboset anamanen esa na'de, Mikha. Ziba teidalen-nala lala'en-na, ala da'di Mefiboset atan-nala.

¹³ Enon-na leondiak, la'eneu Mefiboset fo nalutu ein duas ndia, ana leo nai Yerusalem, de na'a-ninu tataas esa nai uma manek-ka.