2 SEMUEL 7 - Susula Malalaok Hehelu Palak Ma Hehelu Beuk

Natan hala hehelun neu Dauk-ka

¹ Manetualain nasulu-nahapa Mane Dauk-ka, neme basa musun lala'en-na mai, nalosa ana leo nahele neme uma manen dale.

² Boema, manek-ka nafa'da Nabi Natan nae, “Mitak au dei! Au leo nai uma manek fo, taon neme ai kaiou Libanon-na mai, te se'kona, Manetualain Peti Hehelu-balataan, nanape'dak nai ka'da lalaa temak dale mesan!”

³ Boema, Natan nataa nae, “Ama Manek dale tutu'un-na leo beek soona, taon leona, nana Manetualain tulu-fali Ama Manek.”

⁴ Tehu, nai le'odaek ndia, Manetualain nafa'da Natan nae,

⁵ “Muu leona, fo manduku-malosak Au hala hehelung-nga nde ia neu Au atang Dauk mae, ‘Masa bole, o nde mapadedeik fe Au uma.

⁶ Mulai neme, Au soi-po'i leoina Israel-la neme Masir mai, losa besak ia, Au beita leo ita nai uma esa dalek boen, ka'da au aleu-alak ma leonai lalaa temak esa dalek.

⁷ Lelek Au aleu-alaak sama-sama o leoina Israel-la, Au beita atane ita mauli-malangan fo Au hele basak-kala, hu beek de, ala ta lapadedeik fe Au uma neme ai kaiou Libanon-na mai fa.’

⁸ Hu ndia de, Natan, muu mafa'da Au atang Dauk, mae Au, Manetualain Fo Manakoasa, nafa'da nae, ‘Au hele basa o, neme o ue-le'dim fo manafoo bi'ilopo neme mook-ka, de Au so'u o, da'di manek neu Au anang Israel.

⁹ O muu su'di leo bee muu boe, Au sama-sama o o so, ma Au taoisa la'iesak o musum-mala, nai lelek o matee-mata'ti. Neukose, Au tao o da'di nananita-nalelak, sama leo mauli-malanga matuaina nanseli, nai daebafak-ka.

^10-11 Bai te, Au sadia basa mamanak soaneu Au anang Israel so, de Au adenus fo ala leo lahele leme ndia, fo ela ala hapu laso'da no nee-nee lino-linok, no ta hapu soso'ba-susu'dik so'on. Mulai neme makahulun-na, ala mai leo dae ia mai, ma Au so'u fes mauli-malangan-na, hataholi fo dale susue-lalai tak-kala, sapu-lalas, tehu neukose tatao-nono'i leondiak-ka, ana ta da'di seluk so'on. Au aheluk, ae neukose o ta hapu makata'ak neme musu lala'en-na mai fa, ma neukose, Au fe o tititi-nonosik.

^12-13 Neu fai makabuin, fo metema o fai mamatem-ma losa, fo o latoi o nai o bei-ba'i kaim-mala loo-laten soona, neukose Au so'u o anamanem esa da'di manek. Fo ndia nde, neukose napadedeik fe Au uma. Neukose, Au tao atea-ahele nusan-na, ma tititi-nonosin esa, neukose ana paleta da'di leo manek, losa dodoon-na.

¹⁴ Neukose, Au da'di ndia aman, ma ndia da'di Au anamaneng. Metema ana tao salak soona, neukose Au hukun, sama leo amak esa, ana huku anan-na.

¹⁵ Tehu, neukose Au ta tao mangalauk neu fan, nandaa no Au hehelu-balataang. Neukose, Au ho'u ahele Au hehelu-balataang soaneun, de ta sama leo Au taon neu Saul, fo Au keko heok-kana neme kandela nangatutuun lain mai, fo ela o bisa da'di manek.

¹⁶ Neukose, o tititi-nonosim, ta ketu-basa fan, ma neukose, Au tao-a o nusam-ma, nakatatakak losa dodoon-na. Neukose, o tititi-nonosim esa, ana paleta da'di leo manek losa dodoon-na.’ ”

¹⁷ Boema, Natan nafa'da Dauk, basa hata lala'en fo, Manetualain nafa'da neun.

Dauk huhule-haladoi makasin-na

¹⁸ Boema, Mane Dauk-ka neu leo Manetualain Lalaa Teman dale neu. Boema nangatuuk, de ana hule-haladoi nae, “Ou Manetualain Fo Manai Mamana Madema, au ma au teidaleng-ngala, ta mandaa sipo basa malole lala'en, fo dodoo basa ia, O matu'dun neu au.

¹⁹ Nakalenak, O tao lena neme ndia mai, ou Manetualain Fo Manai Mamana Madema; O tao hehelu-balataak, la'eneu au tititi-nonosing, soaneu le'do-fai manamaik-ka. De O matu'du dede'ak ndia neu au, leomae au ka'da hataholi daebafak esa mesan, ou Manetualain Fo Mademaina!

²⁰ Bai te, au afa'da seluk beek neu O bai? O bubuluk basa hata lala'en-na, la'eneu O atam ia so.

²¹ No O hehelu-balataam, ma no O hihii-nanau mesam-ma, O tao tatao-nono'i matuaina sila-la, soaneu O manoli O atam ia.

²² Tete'ek-ka, O matua-madema, ou Manetualain! Ka'da O mesam-ma nde Manetualain, de ta hapu hata esa boen, sama leo O fa. Ami bubuluk dede'ak ndia nana, nananafa'da basak neme makahulun eli mai so.

²³ Nai basa daebafak ia lala'en-na, ta hapu leoina sama leo Israel fa. Ka'da Israel mesa-mesak-kana, nde leoina fo O soi-po'in neme tuni-ndenik-ka dalek mai, fo ana da'di O ana mesam. O tao fes basa tatao-nono'i matuaina, ma manada'di beuk lala'en-na, fo taon-na O na'dem-ma nanakoa-nanakiok nai basa daebafak-ka lala'en-na. O usi heni leoina fe'ek-kala, loo sila lamatua daebafan-nala, nai lelek O anam-mala leu latee-lata'ti.

²⁴ O tao leoina Israel-la, da'di O ana mesam, losa dodoon-na, ma O, ou Manetualain, O da'di sila Manetualain so.

²⁵ Ma besak ia, ou Manetualain sa'di leo been-na, O tao matetea-mahehele hehelu-balataak, fo O kokolak-kana la'eneu au aoianang-nga, ma au tititi-nonosing. Sa'di leo been-na, tao matetu hata fo O helu basak ndia so.

²⁶ Neukose, hataholi-la lamatutua-lamadedema O na'dem-ma tataas esa, su'di nai mamanak bee boe, ma lafa'da lae, ‘Manetualain Fo Manakoasa nde been-na, Manetualain soaneu Israel.’ Boema, hataholi esa neme au tititi-nonosing mai, neukose ana paleta da'di leo manek neu leoina ia, losa dodoon-na.

²⁷ Manetualain Fo Manakoasa! Au apalalaniao, fo au uni huhule-haladoik ia neu O, nana O mesam-ma nde mafa'da basa au, mae O tao au upu-anang neme bobongik leo bobongik neu, da'di manek neu leoina ia.

²⁸ Ou Manetualain Fo Manai Mamana Madema, O nde Manetualain; O tao matetu basa O hehelu-balataam, ma O helu basa au, dede'a manahiik ndia so.

²⁹ Hu ndia de, au dokodoe, sa'di leo been-na, fe au tititi-nonosing baba'e-papalak, fo ela laso'da lahele nai O susue-lalaim dalek, losa dodoon-na. Ou Manetualain Fo Manai Mamana Madema; O helu basa sila-la so, de neukose, O fe mahele au tititi-nonosing baba'e-papalak losa dodoon-na.”