2 SEMUEL 5 - Susula Malalaok Hehelu Palak Ma Hehelu Beuk

Dauk da'di manek Israel ma Yehuda

¹ Basa ndia boema, basa mauli-malangan Israel-la, ala mai leo Dauk nai Hebron, de lafa'dan lae, “Ami ia, Ama Manek tia-lain.

² Neme makahulun eli mai, nakalenak nai lelek Saul bei paleta ami-a, metema solda'du Israel-la leu latee-lata'ti soona, Ama Manek nde nauli-nalangas boe, bai te Manetualain helu basa neu Ama Manek, nae Ama Manek nde neukose nauli-nalanga anan-nala, ma da'di sila manen-na.”

³ Dauk tao hehelu-balataak no mauli-malangan Israel sila-la neme Hebron, boema ala ndo ein da'di mane Israel.

⁴ Dauk teun teluhulu, nai lelek ana da'di manek, de ana paleta, teuk haahulu dalen-na.

⁵ Nai Hebron, ana paleta Yehuda, teuk hitu, bulak nee dalen-na, ma nai Yerusalem, ana paleta Israel-lala'en-na ma Yehuda, teuk 30 dalen-na.

⁶ Faik esa boema, Mane Dauk-ka no solda'dun-nala la'o, fo sanga leu sapu-la Yerusalem. Hataholi Yebus, fo kota ndia laun-nala, beedoo lae, neukose Dauk ta bisa sengi Yerusalem fa. Hu ndia de, lafa'dan lae, “Neukose, o ta hapu masok leo ia mai fa; hataholi pokek-kala ma hataholi ei helak-kala boeo, ala bisa usi heni o.”

^7-9 Boema, Dauk nafa'da solda'dun-nala nae, “Ade, hapu hataholi nai ia, nape'da dale nasak hataholi Yebus-sala, sama leo au ta ahiik-kasa boen do? Ta nahiik-kasa dai so, nalosa nahiik nanseli taonisas do? Metema leondiak soona, ata masok tunga oe lolok dale, fo ata sapu-ta, hataholi ei helak-kala ma hataholi pokek fo au ta ahiik-kasa sila fa.” (Hu ndia de, hataholi-la lafa'da lae, “Hataholi pokek ma hataholi ei helak, ta bole masok Manetualain Uman-na fa.”) Dauk hapu loso-na kota musu Sion-na, de nangatuu-nan. Ana foin na'de, “Kota Dauk” Kota ndia, napadeik nai kota musu ndia boboa kaisun, mulai neme pupukuk fo po'a lamademan nenik dae-a, boboan dulu.

¹⁰ Dauk boetai natea-nahele nanahu, Manetualain Fo Manakoasa tulu-falin.

¹¹ Mane Hiram-ma, neme nusa Tirus-sa mai, ana haitua ndia hataholin-nala, leo Dauk leu, boeo ana haitua ai kaiou Libanon, ma tuka ai, tuka batu boe, fo lapadedeik uma manek-ka.

¹² Hu ndia de, Dauk namahele te'e-te'e, nae Manetualain tao natea-nahele basa ndia da'di leo mane Israel so, ma Ana tao natea-nahele nusan-na, soaneu Manetualain anan-nala paluun-na.

¹³ Dauk lali neme Hebron leo Yerusalem neu, boema ana sao seluk inak de'ubee, ma ana ho'in-na inak de'ubee boe, fo ana taos da'di sao makahatun; boema anatou-anainan boetai lamaba'uk-ka.

¹⁴ Ana bongi anatoun manai Yerusalem-ma nde: Syamua, Sobab, Natan, Salomo,

¹⁵ Yibhar, Elisua, Nefeg, Yafia,

¹⁶ Elisama, Elyada ma Elifelet.

Dauk sengi hataholi Filistin-nala

¹⁷ Lelek hataholi Filistin-nala lamanene, lae Dauk da'di mane Israel so boema, ala sanga mai ho'un. Tehu Dauk namanene dede'ak ndia, boema neu leo kota musu-a neu.

¹⁸ Hataholi Filistin-nala losa Bafak Refaim-ma boema, langatuu-la bafak ndia.

¹⁹ Boema, Dauk natane Manetualain nae, “Au muse u sapu-a hataholi Filistin sila-la do? Ade, neukose O fe au sengi do?” Boema Manetualain nataa nae, “Sapu leona, te neukose Au fe o sengi!”

²⁰ Basa boema, Dauk neu leo Baal-Perasim neu, de ana sengi solda'du Filistin sila-la neme ndia. Boema nafa'da nae, “Manetualain manakoasa hona heni au musung-nga kota musun-na so, sama leo faa tao nabuu basa hata lala'en-na, ka'da nai hatematak esa mesak-kana.” Hu ndia de, loke mamanak ndia soona lae, Baal-Perasim

²¹ Solda'du Filistin-nala lalai, de ala ta hapu loak, ho'i leni sila dodoki-dudula sosongo-tatangon-nala fa. Dauk no solda'dun-nala, ho'i-la dodoki-dudulak sila-la.

²² Basa boema, hataholi Filistin-nala, mai langatuu-la seluk Bafak Refaim-ma.

²³ Dauk noke natutu'duk la'iesa seluk, neme Manetualain mai. Boema Manetualain nataa nae, “Boso sapu-malas, neme ia mai, tehu la'ok po'de, fo sapu-malas neme dea mai, deka no ai mulbei-la.

²⁴ Metema, o mamanene makandu'uk-ka, sama leo hataholi-la la'ok lakadadalak lai ai sila poin-na, ei ndu'un-na soona, tutulumatak leona, nana neukose Au la'ok nai o uluk, fo o sengi solda'du Filistin-nala.”

²⁵ Dauk tao tunga Manetualain paletan-na, de ana sengi hataholi Filistin-nala, mulai neme Geba losa Gezer.