2 SEMUEL 22 - Susula Malalaok Hehelu Palak Ma Hehelu Beuk

Dauk nakamee sesengin-na

¹ Manetualain soi-tefa-nala Dauk neme Saul mai, ma neme basa musu fe'en lala'en-na mai boema, Dauk nakamee nakameek ia, ba'eneu Manetualain nae: [

² Au sue-lai O, ou Manetualain O nde, au be'i-balakaing.]

³ Manetualain sama leo kota musu matea-mahelek au mamana nasulu-nahapang. Au Manetualaing-nga, sama leo lete batu, au mamana hahaeaong. Sama leo babaa fanak, fo ana babaa au, ma nanea au, fo ela au nee-nee lino-lino tataasesa.

⁴ Au aloo bou-bou neu Manetualain fo nandaa nanakoa-nanakiok, Ana soi-po'i au neme au musung-ngala mai.

⁵ Soe mamates-sa, okofeo-na au, ma faa maneni momopo-mamatek-ka, lifu-na au.

⁶ Soe mamates-sa, okofeo-na au, hihi'i mamates-sa, nai au matang-nga.

⁷ Nai au mamana makase'eng dale, au aloo bou-bou neu Manetualain, au nggasi neu au Manetualaing-nga, fo dokodoe tutulu-fafalik. Namanene au halang-nga, neme uman mai, ma Ana taoafik neu au dokodoeng-nga.

⁸ Boema, daebafak-ka nanggengo ma ana dele, letek-kala huun-na, ala ke'ko, ma ala dele nanahu, Manetualain nasa-melun!

⁹ Ha'imasuk-ka po'ka neme pana bolon-na mai, ha'i ma ha'ikaak-ka, kalua neme bafan-na mai.

¹⁰ Ana ta'tiba'e lalai-a, boema Ana kona mai, no ko'as makahatuk-ka, nai ein-na dae.

¹¹ Ana sa'e mahahaek nusa so'dak-ka de Ana laa, Laa-laa nai anin-na li'dan lain.

¹² Nalu'e ketu Aoinan-na nenik makahatuk-ka; ko'as masakoko'ak-ka makate-a, okofeo-na.

¹³ Ko'as, u'da eis, ma ha'i-a, kalua neme mandelak manai matan-na mai,

¹⁴ Boema, Manetualain nanggulu neme lalai aten mai, Fo Mademai-na fe halan-na, nananamanenek.

¹⁵ Ana po'i kokou isin-nala mai, fo tao tapasasala musu-a. Ana fe mandelak-ka mai tuti-nato, de Ana taon-nalas lalai.

¹⁶ Tasi buin-na nanasilu henik, ma daebafak-ka buin-na natahuka nai lelek Manetualain nasapala musun-na nenik nasa-melun.

¹⁷ Manetualain look liman-na neme lain mai; Ana ho'u-na au, de Ana hela-na au neme oe madema dale mai.

¹⁸ Ana soi-tefa-na au, neme musu mabe'i-balakaik-ka mai ma neme hataholi fo ta lahiik au fa nanahu sila balakain-na, ba'un-na seli ba'eneu au.

¹⁹ Ala sapu-la au, nai lelek soe-a tunu-ndeni au, tehu Manetualain da'di neu au manatulu-manafaling.

²⁰ Ana soi-po'i au neme soe-a mai ma Ana soi-tefa-na au, nanahu Ana sue-lai au.

²¹ Manetualain balas au tatao-nono'ing ndoos-sa; Ana ba'e-pala au, nana au salang ta.

²² Au tunga Manetualain paletan-na, ma au ta lepos asadea, au Manetualaing-nga fa.

²³ Au taoafik neu basa hoholo-lalanen-nala, ma au akalala'ok paletan-nala.

²⁴ Ana bubuluk nae au bu'u-ba'eng ta, ma au adook au aoinang-nga neme salak-ka mai.

²⁵ Boema, Manetualain balas au tatao-nono'i ndoong-nga nana Ana bubuluk au salang ta.

²⁶ Manetualain, O lilineka neu hataholi manalilinekak-ka ma O malole neu hataholi malole-a.

²⁷ O matu'du O aoinam malalao-malafum-ma neu hataholi malalao-malalafuk-ka, tehu O musu moo hataholi manatao tatao-nono'i mangalauk-ka.

²⁸ O soi-tefa-ma hataholi dale maloe-makadaek-ka; tehu O taom-ma, hataholi manakoao-ndaeaok-ka nakatele.

²⁹ O de'de mapila au banung-nga; au Manetualaing-Nga nasalaa-na, au makahatung-nga.

³⁰ O matetea-mahehele au, fo au tao akalulutuk musu-a; no au Manetualaing-nga tutulu-fafalin, de au hona aba'en sila kota musun-na.

³¹ Manetualain tatao-nono'in matet Manetualain u-mandaak, Manetualain hehelu-balataan, hapu nananamahelek! Ndia sama leo buas sisili musu ba'eneu basa sila fo manamasulu-mahapa neun.

³² Nana, ka'da Manetualain nde Manetualain-na; Ita manamasala'en-na nde ka'da Manetualain mesak-kana.

³³ Ndia nde Manetualain fo natetea-nahehele au, ma Ana taon-na, au enong-nga nee-nee lino-lino.

³⁴ Ana tao natea-nahele au eing-nga, sama leo nusa ein-na, ma nanea au so'da-moleng nai letelepak-ka.

³⁵ Nanoli au soaneu natee-natatik-ka, nalosa au hela abe'i kokouk mateaina.

³⁶ Manetualain, O masulu-mahapa ma soi-tefa-ma au, ma tia-to'ba au nenik O koasam-ma au sengi nanahu O nakeketum-ma.

³⁷ O manea au, fo ela au ta da'di hataholi nanafook, ma au ta tu'da ita fa.

³⁸ Au usi au musung-nga, de au sengis, ma au ta akadedeak ngganieik esa boen, losa mopo-mates.

³⁹ Au bala abuus, losa ala ta hapu fo'a so'on, ala fepa leu de ala be male nai au eing-nga matan-na.

⁴⁰ O fe au be'i-balakaik soaneu atee-atati, de au sengi au musung-ngala.

⁴¹ O taom-ma au musung-nga nalai neme au mai; au tao amopo-amate hataholi fo ta lahiik au fa.

⁴² Ala nggasi, tehu ta hapu manatulu-fali fa, Laloo bou-bou neu Manetualain, tehu Ana ta nataa fa.

⁴³ Au tao alas beesopu, sama leo dae sopu manalapuk-ka, au sasapus, sama leo tane nai enok lain.

⁴⁴ O soi-po'i au neme leo-ingu malelesik-ka mai, ma O tao au da'di manakoasa neu leoina-la; au ta alelak leoina, ana da'di au atang;

⁴⁵ hataholi nusa dea-la lakatele neu au, ma metema lamanene soona, ala tunga au paletang-nga.

⁴⁶ Mopo sila palanin-na so; ala kalua leme kota musun dale mai no dele bengge'be.

⁴⁷ Manetualain maso'dak! Kokoa-kikiok neu au manamasala'eng-nga! Mamatutua-mamadedema Manetualain fo au manasoi-manatefang-nga, matua-mademan!

⁴⁸ Ana fe au sengi au musung-nga, Ana sengi leoina-la nai au matang,

⁴⁹ Ana soi-tefa-nala au neme au musu noong-ngala mai. Manetualain, O fe au sengi au musung-nga, O masulu-mahapa au, neme hataholi dale susue-lalai tak-kala mai.

⁵⁰ Boema, au amatutua-amadedema O nai leoina-la tala'da, ma au akamee nakamee kokoa-kikiok ba'eneu O.

⁵¹ Manetualain fe sesengik matuaina neu Ana ndo ei manek-ka, Ana sue-lai nahele, Ana hele hataholi-a, fo nde Dauk no tititi-nonosin-nala losa dodoon-na.