2 SEMUEL 21 - Susula Malalaok Hehelu Palak Ma Hehelu Beuk

Saul tititi-nonosin nanahukunisak

¹ Nai tepo-lelek Dauk paleta, la'a-ndoes matuaina, ana da'di teuk telu dalen-na. Boema, Dauk noke natutu'duk neme Manetualain mai, la'eneu la'a-ndoes ndia, de ManetualainManakoasa nafa'da nae, “La'a-ndoes ndia da'di, hu kande Saul no teidalen-nala salan-na, nana ala taolisa hataholi Gibeon-nala.”

² (Hataholi Gibeon-nala, hataholi Israel ta sila fa; hataholi sila-la, nanalekek nai hataholi Amori bubuaanak esa dalek. Hataholi Israel-la laheluk basa, neukose lasulu-lahapas, tehu Saul sanga enok fo ana tao namopo-namates, nanahu ana dudu'a-dodoo ka'da hataholi Israel-la loo hataholi Yehuda-la paluun-nala.) Boema, Dauk naloo hataholi Gibeon sila-la,

³ de natanes nae, “Ade, au tao beek soaneu emi? Au ahiik soi-tefa salak fo nanatao basak neu emi so, fo ela emi fe Manetualain anan-nala, baba'e-papalak.”

⁴ Boema, lataa lae, “Ami dede'am moo Saul no teidalen-nala, ta hapu naketun nenik lilofulak do lilopilas fa, tehu ami boeo, ta mahiik taomisa hataholi Israel esa boen.” Boema, Dauk nafa'da nae, “Metema, leondiak soona, emi mahiik au tao beek?”

⁵ Boema lataa lae, “Saul nde been-na, manek fo Manetualain helen, tehu nahiik tao namopo-namate la'iesak ami, fo mopok ami neme Israel lala'en-na mai.

⁶ Hu ndia de, fe touk hitu neme tititi-nonosin mai, fo ela ami lonas nai Manetualain matan nai Gibea, fo Mane Saul-la kotan-na.” Manek-ka nataa nae, “Hei, neukose au fes leo emi neu.”

⁷ Tehu, hu kande Dauk no Yonatan soo basa so, de Dauk ta fe Mefiboset fo Yonatan anan-na fa.

⁸ Dauk fek-ka nde, Armoni ma Mefiboset, fo Saul anatou ka dua-nala, fo Aya anafe'on Rizpa anan-nala; boeo Saul anafe'on Merab, anatou ka liman-nala, fo Merab no saotoun Adriel anan sila-la. Adriel nde been-na, Barzilai, fo hataholi Mehola ndia, anan-na.

⁹ Boema, ala fes leo hataholi Gibeon-nala leu, de ala lona lisa hataholi ka hituk sila-la neme pupukuk esa lain, nai Manetualain matan. Hukulisa hataholi sila-la nai fai timu nate'e, fo nai lelek ala mulai ke'di betek.

¹⁰ Boema Rizpa, fo Saul sao makahatun-na, ana bela si'di kalong neu batu bebelak fo, lakandondoo mamates-sala neme lain-na, de nanea naheles neme ndia. Rizpa ta la'oela mamanak ndia, mulai neme fai keketu-kokolu makasososan-na mai, losa u'dan-mai, fo nai fai hanas-sa. Ana ta fe manupui-la la'a mamates sila-la, nai fai lele'don-na, do bana makaak-kala nai fai le'odaen-na.

¹¹ Lelek lafa'da Rizpa tatao-nono'in ndia neu Dauk boema,

¹² neu ho'in-na Saul no Yonatan dui-kalun neme laun manai kota Yabesh-sa, nai Gilead. (Hataholi sila-la, lamanako-la dui-kaluk sila neme mook nakaminak bola manai kota Bet-San-na. Nai mamanak ndia nde, hataholi Filistin-nala lona Saul no Yonatan popolan-na, nai lelek ala sengi Saul neme Pupukuk Gilboa.)

¹³ Dauk ho'i neni Saul no Yonatan dui-kalun sila neme mamanak ndia mai, boema nakaduduluk nakabubua hataholi ka hituk fo nanalonak sila-la, dui-kalun boe.

¹⁴ Basa boema, natoi Saul no Yonatan ma hataholi ka hituk-kala, dui-kalun nai Kish, fo Saul aman loo-laten nai Zela, fo nai dae Benyamin-na. Ala tao basa-basan, nandaa no manek-ka paletan-na, de Manetualain sipok sila huhule-haladoin soaneu nusak ndia.

Dauk ana sengi hataholi Filistin

¹⁵ Natee-nata'tik da'di seluk nai hataholi Filistin-nala loo hataholi Israel-la. Dauk no solda'du-nala, leu latee-lata'ti la'ban hataholi Filistin-nala. Dauk sota-mangu nai natee-natatik ndia dalek.

¹⁶ Boema hataholi ao matua ei madema esa na'de Yisbi-Benob, ana mai. Teen-na, tee liti, belan-na, fafa'kama kilo telu seselik. Nasakue tafaina beuk boe, de namahele te'e-te'e, ana bisa taonisa Dauk.

¹⁷ Tehu Abisai, fo Zeruya anan-na, ana mai tulu-fali Dauk. Ana sapu-na hataholi ao matua ei madema ndia de, ana taonisan. Basa ndia boema, Dauk solda'dun-nala dokodoe, fo ela Dauk naheluk nae, neukose ana ta tunga nai natee-natatik dale so'on. Lafa'da lae, “Ama Manek nde been-na, Israel hataholi namahehenan, de boso nalosak, mopo Ama Manek neme ami mai.”

¹⁸ Natee-nata'tik la'ban hataholi Filistin-nala, ana da'di seluk nai Gob. Nai natee-natatik ndia dalek, Sibkhai, fo hataholi Husa ndia, taonisa hataholi ao matua ei madema esa, na'de Saf.

¹⁹ Nai natee-nata'ti fe'ek loo hataholi Filistin-nala nai Gob, Elhanan, fo Yair anan-na, fo neme Betlehem mai, ana taonisa Goliat, fo neme Gat mai. Goliat teen ndia ain-na, ba'u bole tenu-hengek-ka.

²⁰ Natee-nata'tik la'ban hataholi Filistin-nala ndia, ana da'di seluk nai Gat. Nai ndia, hapu hataholi ao matua ei madema esa, ana hii natee-nata'ti nanseli. Hataholi ndia, limaku'un nee, ma eiku'un nee.

²¹ Ana hakinonoli hataholi Israel-la, hu ndia de, Yonatan, fo Dauk ka'an Simei anan-na, taonisan.

²² Dauk no solda'dun-nala, taolisa hataholi ka haak sila-la nde been-na, hataholi ao matua ei madema manai Gat-tala, tititi-nonosin sila.