2 SEMUEL 2 - Susula Malalaok Hehelu Palak Ma Hehelu Beuk

Dauk nanandoo eik da'di mane Yehuda

¹ Basa ndia boema, Dauk natane Manetualain nae, “Ade, Manetualain nau au u fo, au koasa kota esa nai Yehuda do?” Manetualain nataa nae, “Ya.” Boema, Dauk natane nae, “Kota beek-ka?” Manetualain nataa nae, “Kota Hebron.”

² Boema, Dauk neu leo Hebron neu, sama-sama no saoinan duas, fo nde Ahinoam, fo ina Yizreel ndia, ma Abigail, fo Nabal manamatek-ka saon-na, fo ina Karmel ndia.

³ Leondiak boe, Dauk solda'dun-nala, loo sila esa-esak teidalen-nala, tunga loo Dauk, boema ala leo lahele leme Hebron, ma nai Hebron boboa-kaisung.

⁴ Basa boema, hataholi Yehuda-la mai leo Hebron mai, de ala ndo-ei Dauk da'di manek neu Yehuda. Lelek Dauk namanene, lae hataholi Yabesh manai Gilead-tala, latoi heni Saul popolan-na so boema,

⁵ nadenu hataholi neu leo naa neu, fo nanduku-nalosak hala-heheluk-ka nde ia nae, “Sa'di leo been-na, Manetualain fe emi baba'e-papalak, nanahu emi matu'du basa, emi lilinekam neu emi manem-ma, nenik emi matoi-matono popolan-na so.

⁶ Hu ndia de, sa'di leo been-na, Manetualain natu'du lilinekan ma susue-lalain neu emi. Au boeo, tao emi no malolen-na, nanahu emi tatao-nono'im ndia.

⁷ Matetea-mahehele emi dalem-ma, ma ho'i nakeketuk da'di leo palani ta'ti batu! Memak, emi manem Saul maten so, tehu hataholi Yehuda-la ndo-ei basa au, da'di emi manen so.”

Isyboset da'di manek neu Israel

⁸ Saul malanga solda'du matuainan-na, fo nde Abner, fo Ner anan-na, nalai sama-sama no Isyboset, fo Saul anan-na, leo Mahanaim nai Lee Yarden-na selik leu so.

⁹ Nai naa, Abner so'u Isyboset da'di manek neu nusa-nusak Gilead, Asyuri, Yizreel, Efraim ma Benyamin, bole tafa'da tae, ana da'di manek neu Israel-lala'en-na.

¹⁰ Isyboset teun haahulu, nai lelek ana da'di mane Israel-la, de ana paleta teuk dua dalen-na. Tehu leo Yehuda, lilineka lahele Dauk,

¹¹ de Dauk paleta Yehuda neme Hebron, teuk hitu, bulak nee dalen-na.

Israel no Yehuda latee-latati

¹² Faik esa boema, Abner sama-sama no Isyboset solda'dun-nala leme Mahanaim mai, de leu leo kota Gibeon-na leu.

¹³ Boeo Yoab, (fo inan na'de Zeruya), sama-sama no Dauk solda'dun-nala leu leo kota ndia leu. Solda'du bubua ka duak sila latongo de, lasasalematak leme lifu Gibeon-na; Abner no solda'dun-nala, langatuuk lai selik ia, ma Yoab no solda'dun-nala, lai selik eli.

¹⁴ Boema, Abner nafa'da Yoab nae, “Ayo, tadenu ita solda'dun-nala, lakasusu'di balakaik-kala!” Boema Yoab nataa nae, “Ya.”

¹⁵ Boema, Isyboset solda'dun sanahulu dua leme leo Benyamin-na mai, ala tutulumatak, ma Dauk solda'dun sanahulu dua boeo, ala tutulumatak.

¹⁶ Boema, lalu'i langadook-kala, ma esa pau esa tein-na, de nalosa ala mate sama-sama. Hu ndia de, loke mamanak manai Gibeon ndia soona, lae “Tina Tafaina.”

¹⁷ Basa ndia boema, natee-natatik-ka makee leona, de Dauk solda'dun-nala, sengi Abner no solda'dun-nala.

¹⁸ Zeruya ana ka telun fo nde, Yoab, Abisai ma Asael, lai ndia. Asael nggafan-na seli, sama leo nusa nalaik,

¹⁹ boema, ala usi lahele Abner.

²⁰ Abner lipa leo dea neu, de natane nae, “Asael nde o do?” Boema nataa nae, “Ya.”

²¹ Boema Abner nae, “Boso usi au!” “So'ba ho'u-ma solda'du sila-la esa, fo ho'i-ma tafa-sisilon!” Tehu Asael ka'da usi nakandoon.

²² Abner nafa'da la'i esa seluk-kana nae, “Boso usi au! Ta soona neukose au taoisa o. Da'di, tao leo beek fo, au hapu mete o ka'am Yoab ndia, mata-panan?”

²³ Lelek Asael nahele ka'da, ana ta nau nate'e fa boema, Abner tee leo dea neu, de la'e Asael tein-na, losa tee ndia tola sapiselik muliha'in-na. Asael bala neu, de maten neme mamanak ndia boe. Basa hataholi manamaik leo Asael lololin-na ndia, late'e leme ndia.

²⁴ Tehu Yoab ma Abisai usi lakandoo Abner. Lelek le'do tenak boema, ala losa Pupukuk Ama, fo nai Giah boboan dulu, nasale leo moo solokaek Gibeon-na neu.

²⁵ Nai naa, hataholi-la leme leo Benyamin-na mai, lakabubua seluk loo Abner, boema lapadeik lakadadalak lai pupukuk esa lain.

²⁶ Abner naloo bou-bou neu Yoab neme naa mai nae, “Ita muse tatee-tatati losa dodoon-na do? O ta mame'da mae natee-natatik ia, ka'da neni makahe'duk fa do? Ami ia, o tolanoom, fo ita leoina esa. O nau mahani losa faihi'da, fo besak-ka o paleta o solda'dum-mala, fo daenga ala hahae usi ami?”

²⁷ Boema Yoab nataa nae, “No Manetualain fo maso'dak-ka na'den-na, leounik-ka, o ta mulai kokolak fa soona, tao leo bee-o, neukose au solda'dung-ngala, usi lahele emi losa balahaa fafaik.”

²⁸ Boema Yoab puu pupuuk-ka, fo da'di ta'du-tana ba'eneu solda'dun-nala, fo ela ala hahae usi hataholi Israel-la, boema natee-natatik ndia hahae leona.

²⁹ Abner no solda'dun-nala, la'ok lakadadalak tunga Bafak Yarden-na, le'odae katemak esa dalen-na, boema ala lena Lee Yarden-na, de binesak boema, ala la'ok lakandoo lele'do katemak esa, besak-ka ala losa Mahanaim.

³⁰ Yoab hahae usi Abner boema, nakabubua basa solda'dun-nala. Ta leke Asael fa, de se'kona mopo sila solda'du 19.

³¹ Dauk solda'dun-nala, taolisa Abner solda'dun 360 leme leo Benyamin-na mai.

³² Basa ndia boema, Yoab no solda'dun-nala, ko'o-la Asael popolan-na, de latoin nai teidalen manai Betlehem-ma, loo-laten. Boema, ala la'ok le'odaek esa dalen-na, de lolebalahaak boema, ala losa Hebron.