2 SEMUEL 19 - Susula Malalaok Hehelu Palak Ma Hehelu Beuk

Yoab natu'du Dauk salan-na

¹ Hataholi nafa'da Yoab nae, Mane Dauk-ka kii ma ana susa Absalom.

² Boema, sesengik nai faik ndia dalen-na, nasafali da'di dale he'dik ba'eneu Dauk solda'dun-nala lala'en-na, nanahu lamanene lae manek-ka ana kii-makaleleu anamanen-na.

³ Ala fali le'us leo kota leu, no denge-dengek, sama leo solda'du fo lame'da mamaek, nanahu lalai leme natee-natatik dale mai.

⁴ Manek-ka poti ketu mata-panan, ma ana kii makaleleu napane'e nae, “Ou, au anang-ngonei! Au anang Absalom! Absalom, au anang-ngonei!”

⁵ Yoab neu leo manek-ka neu, de nafa'dan nae, “Nai faik ia dalen-na, Ama Manek tao makamamaek Ama Manek solda'dun-nala, te se'kona, hu kande sila de, Ama Manek ma Ama Manek anafe'o-anamanen saon-nala, ma sao makahatun-nala laso'da.

⁶ Ama Manek sue-lai hataholi fo nakamumulu-nakamamaek Ama Manek, tehu Ama Manek nape'da dale nasak hataholi manasue-lai Ama Manek-ka fa! No mangale'dok, Ama Manek natu'du nae, basa Ama Manek malanga solda'du matuainan-nala, ma solda'du anak-kala sosoa-ndandaan-nala ta makandondook, ba'eneu Ama Manek. Bai te, Ama Manek nono'kabai namahoko nanseli, leounik-ka nai faik ia, Absalom bei naso'da, ma mate ami basa-basam-mala!

⁷ Tunga ndoon-na, Ama Manek fo'a fo neu leo deak neu, fo natetesa-natatama Ama Manek solda'dun-nala dalen-nala. Atam-ma soo nenik Manetualain na'den-na, metema Ama Manek ta kalua fo neu natongo no fas soona, le'odaek ia boe, neukose ta hapu hataholi esa boen, nau no Ama Manek fa. Neukose, ndia nalupa soe matuaina nanseli, fo neukose Ama Manek la'ola'din nai Ama Manek fai maso'dan-na dalek.”

⁸ Basa boema, manek-ka fo'a de neu leo deak neu, de nangatuuk deka no lelesuina. Solda'dun-nala lamanene lae manek-ka nai ndia boema, basa-basas mai leona. Ndia te, solda'du Israel-la lala'en-na, lalai so, de esa-esak fali ne'un leo ndia uman neu.

Dauk fali leo Yerusalem neu

⁹ Nale'a-napilik-ka da'di nai leo Israel-la lala'en-na. Lafa'da lae, “Mane Dauk-ka soi-tefa-nala ita teme hataholi Filistin-nala mai, ma ana soi-po'i ita tema musu fe'ek-kala mai so, tehu besak ia, nalai neme Absalom mai, de ana la'oela nusak ia so.

¹⁰ Ita ndo-ei basa Absalom da'di manek so, tehu besak ia, ana mate nai natee-natatik dale so. Tao le'e de, ta hapu hataholi esa boen sanga enok, fo no falik Mane Dauk-ka fa?”

¹¹ Hala-kokolak sila-la losa Mane Dauk-ka boe. Hu ndia de, nadenu Imam Zadok-ka ma Imam Abyatar-ra, fo leu latane basa mauli-malangan Yehuda-la, lae leo ia, “Tao le'e de, emi da'di hataholi mate'ek soaneu soluk manek-ka, fo moon fali ne'un leo uma manen-na neu fa?

¹² Ade, emi ta nde au tolanoo ka'a-fa'ding, ma au tia-laing fa do? Masa bole, emi da'di hataholi manadokodoe mate'ek fo ela au fali ma'ing-nga?”

¹³ Boeo Dauk nadenu leu lafa'da Amasa lae leo ia, “Ade, o ta nde au tia-laing fa do? Mulai besak ia, au so'u o da'di au solda'dung-ngala malanga matuainan, fo nggati Yoab. Sa'di leo been-na, Manetualain taonisa au, metema au ta tao tunga dede'ak ndia fa!”

¹⁴ Leondiak, Dauk hapu ho'i basa hataholi Yehuda-la dalen-na, nalosa ala haitua hala heheluk leo manek-ka neu, fo ela sama-sama no basa hataholi mana'a ngga'din-nala, fali-le'us leo uma manek-ka leu.

¹⁵ Boema manek-ka la'o, de ana losa Lee Yarden-na, fo ndia te, hataholi Yehuda-la losa Gilgal so, fo ala soluk manek-ka ma lanean, fo ana lena leo lee ndia selik neu.

^16-17 Gerar anan Simei, fo hataholi Benyamin ndia, no hataholi lifun esa leme leo Benyamin-na mai, de no lai-laik, ala mai sama-sama loo hataholi Yehuda sila-la, fo ala soluk manek-ka. Leondiak boe, Ziba, fo Saul teidalen-nala atan-na, sama-sama no anatoun ka sanahulu lima-nala, ma atan ka duahulu-nala; manek-ka beita losa fa te, ala lena lai Lee Yarden-na selik so.

¹⁸ Ala fali manek-ka teidalen-nala, fo ala lena leo selik leu, boema ala tao basa hata lala'en fo manek-ka nadenus ala taon. Nai hatematak fo manek-ka sanga lena lee boema, Simei sene-do'ok neu matan-na, ma nae,

Dauk nadale malole neu Simei

¹⁹ “Atam-ma dokodoe, sa'di leo been-na, Ama Manek ta nafa'da nae, atam-ma nasala nahele fa. Sa'di leo been-na, Ama Manek nafandele heni basa hata fo, atam-ma taon, nai faik fo Ama Manek la'oela Yerusalem.

²⁰ Atam-ma, name'da te'e-te'e, atam-ma tao basa sala-singok so, hu ndia de, nai basa leo-leo manaleo manai nusa kii-la dalek, atam-ma nde makasososa, mai sipok Ama Manek nai faik ia dalen-na.”

²¹ Abisai, fo Seruya anan-na, namanene dede'ak ndia boema, nafa'da nae, “Simei nandaa nanahuku nisak so, nanahu ana soo-supa manek fo Manetualain helek-ka.”

²² Tehu, Dauk nafa'da Abisai ma ka'an Yoab nae, “Boso sese'dok nai dede'ak ia dalek. Tao le'e de, emi tao susa au? Nai faik ia dalen-na, au da'di manek seluk neu Israel, de ta bole hukunisa hataholi Israel esa boen.”

²³ Basa boema, manek-ka nafa'da Simei nae, “Au apalani soo, neukose ta hukunisa o fa Simei.”

Dauk nadale malole neu Mefiboset boe

²⁴ Mefiboset, fo Saul upun-na boeo, ana mai soluk manek-ka. Ana ta safe ein-na fa, ana ta nggute nggolomein-na fa, ma ana ta safe bua papaken-na, mulai neme Mane Dauk-ka, ana la'oela Yerusalem, losa ana fali ma'in no so'da-molek.

²⁵ Lelek Mefiboset, ana mai neme Yerusalem mai, fo ana sipok manek-ka boema, manek-ka nafa'dan nae, “Mefiboset, tao le'e de, lelek ndia, o ta tunga moo au fa?”

²⁶ Boema, nataa nae, “Ama Manek fo Mandela-masa'ak, Ama Manek bubuluk mae au ia, ei helak. Atam-ma nadenu atam-ma malalau-maoonon, fo ana sadia fe atam-ma keledei, fo atam-ma sa'e, fo tunga Ama Manek. Tehu malalau-maoono ndia, ke'di-na atam-ma.

²⁷ Nakalenak bai, ana tao nanggenggeo au na'deng-nga, nai Ama Manek matan-na so. Tehu, Ama Manek sama leo Manetualain ata nusa so'dan-na. Hu ndia de, Ama Manek tao hata fo, Ama Manek dodoon-nana malole.

²⁸ Atam-ma aman teidalen-nala lala'en-na, landaa Ama Manek hukunisas, tehu Ama Manek fe basa atam ia loak, fo na'a-ninu nai uma manek-ka so. Besak ia, atam-ma ta napalani, noke hata-hata neme Ama Manek mai so'on.”

²⁹ Boema manek-ka nataa nae, “Ta paluu o mafa'da hata-hata so'on. Au aketu basa, fo au fe basa Saul hata-heton lala'en-na leo o moo Ziba neu so.”

³⁰ Boema, Mefiboset nataa nae, “Nemen-na, fo Ziba soa la'iesak-kasa. Atam-ma name'da-nana, dai so, nanahu Ama Manek fali ma'in no so'da-molek so.”

Dauk nadale malole neu Barzilai boe

³¹ Barzilai, fo hataholi Gilead ndia, boeo ana mai neme Rogelim mai, fo ana tunga manek-ka lena leo Lee Yarden-na selik neu.

³² Barzilai teun faluhulu, de namalasi nanseli so. Namasu'i hatu-hatu, ma nai lelek makahulun-na, fo manek-ka bei leo neme Mahanaim-ma, Barzilai nde sadia fe manek-ka nana'a-nininuk-ka.

³³ Boema, manek-ka nafa'da nae, “Tunga moo au leo Yerusalem soona, neukose au sadia fe o, basa o paluum lala'en-na, nai naa.”

³⁴ Tehu, Barzilai nataa nae, “Neukose, atam-ma ta naso'da nala dook-ka so'on. Da'di, sosoak hata, atam-ma tunga no Ama Manek leo Yerusalem neu?

³⁵ Atam-ma teun faluhulu so, de ta hapu hata esa boen, bisa neni fe atam-ma namahokok so'on. Atam-ma, na'a-ninu nana'a-nininuk-kala, ta hapu la'dan-na so'on, ma atam-ma ta hapu namanene hataholi-la lakamee so'on. Neukose, atam-ma ka'da neni lelepa mabela fe Ama Manek.

³⁶ Atam-ma, ta nandaa sipo ngga'di ba'u-ba'u basa ndia fa. Atam-ma, nahiik ka'da tunga Ama Manek, nggani eik de'ubee mesan, neme Lee Yarden-na selik mai.

³⁷ Basa ndia soona, nemen-na, fo atam-ma fali ne'un leo uma neu, fo atam-ma mate deka no atam-ma ina-aman loo-laten, tehu atam-ma anan Kimham nde ia. De fen loak fo ana tunga Ama Manek, ma Ama Manek tao hata fo, tunga Ama Manek mata memeten-na malole, soaneun.”

³⁸ Manek-ka nataa nae, “Neukose au o Kimham, fo au mete-lakanaen nandaa no o dale hihiim-ma, ma neukose au tao atetu o moke basa hata lala'en-na.”

³⁹ Basa boema, Dauk no basa solda'dun-nala lala'en-na, lena leo Lee Yarden-na selik leu. Boema, Dauk de'i Barzilai, de nate'an. Basa ndia boema, Barzilai fali ne'un leo uman neu.

Yehuda no Israel lale'a la'eneu manek-ka

⁴⁰ Basa solda'du Yehuda-la lala'en-na, ma solda'du Israel-la seli, ala tunga manek-ka fo ala lena lee-a. Basa ndia boema, manek-ka nakandoo leo Gilgal neu, de Kimham tunga non.

⁴¹ Basa boema, basa hataholi Israel-la, ala mai leo manek-ka mai, de lafa'dan lae, “Ama Manek, tao le'e de, ami tolanoom hataholi Yehuda sila-la, laedaenga sila nde lanuu hak, soaneu ala soluk ma lanea Ama Manek, sama-sama no basa teidalen-nala lala'en-na, ma basa solda'dun-nala, fo lena leo Lee Yarden-na selik leu?”

⁴² Boema, hataholi Yehuda-la lataa lae, “Memak tete'ek-ka, nanahu manek-ka nde been-na, ami tia-laim. Tao le'e de, emi mamanasa? Ade, manek-ka nde lu'a-lepa ami paluum-ma, do ana fe basa ami, bua palsen so do?”

⁴³ Boema, hataholi Israel-la, lataa lae, “Ami hak soaneu manek-ka, ba'u lena emi hak-ka la'i sanahulu, leomae manek-ka nde been-na, emi tia-laim. Tao le'e de, emi makadadaek ami? Boso mafandele henin te, ami nde mafa'da makasososa fo loo falik manek-ka!” Tehu hataholi Yehuda-la latea lena heni hataholi Israel-la, de ala ta nau kala fa.