2 SEMUEL 16 - Susula Malalaok Hehelu Palak Ma Hehelu Beuk

Dauk ma Ziba

¹ Lelek Dauk besak-ka nala pupukuk-ka selik boema, no kaiboik, Mefiboset atan Ziba, ana mai leona, de Dauk nitan, ana hela keledei dua, ala fua loti boak natun dua, angol boa tuuk, nggik natun esa, ai boa mamatak, puputuk natun esa, ma angol nai alukosu bana louk esa dalek.

² Boema, mane Dauk-ka natanen nae, “Basa ia-la, sosoa-na beek?” Boema Ziba nataa nae, “Keledei ia-la, soaneu Ama Manek teidalen-nala sa'e, boema loti ma ai boak ia-la, soaneu Ama Manek atan-nala, ma angol ia, soaneu sila manasota-manguk manai moo solokaek-ka.”

³ Boema, manek-ka natanen nae, “O tuam Saul, upun Mefiboset nai bee?” Ziba nataa nae, “Ana bei nai Yerusalem, nana namahele te'e-te'e nae besak ia, neukose hataholi Israel-la fe falik ndia ba'in Saul nusan-na, leo ndia neu.”

⁴ Boema, manek-ka nafa'da Ziba nae, “Mulai besak ia, o manuu la'iesak Mefiboset hata-heton lala'en-na.” Boema, Ziba nataa nae, “Makasi ba'uk-ka, Ama Manek. Sa'di leo been-na, atam-ma hapu susue-lalaik nai Ama Manek matan!”

Dauk ma Simei

⁵ Lelek Dauk losa Bahurim boema, hataholi esa ana mai neme mamanak ndia mai, de neu deka no hataholi makadotok fo manatunga manek-ka, boema ana soo-supa Dauk. Hataholi ndia, na'de Simei, fo Gera anan-na, fo bei Saul tolanoo ka'a-fa'din ndia.

⁶ Leomae Dauk solda'dun-nala, ma malanga solda'du matuainan-nala okofeo-la Dauk, tehu Simei tapa Dauk no hataholi mana'a ngga'din-nala nenik batu.

⁷ Simei soo-supa Dauk nenik dede'ak-kala nde ia, “La'o leona! La'o leona! Kanisak-konei! Manatao tatao-nono'i mangalauk-konei!

⁸ O loso-ma Saul nusan-na! De besak ia, Manetualain huku o, nanahu o taomisa Saul tolanoo ka'a-fa'din makadotok nanseli so. Manetualain fe heni o nusam-ma leo o anam Absalom neu so. Besak ia, nduada ndalak muu leon, hai kanisak-konei!”

⁹ Yoab fa'din Abisai, fo Zeruya anan-na, nafa'da manek-ka nae, “Tao le'e de, Ama Manek po'ilotak manatao tasi'bu ndia soo-supa Ama Manek? Po'i atam-ma, fo atam-ma te'te heni langan-na!”

¹⁰ Tehu manek-ka nafa'da Abisai ma ka'an Yoab nae, “Boso litu moon. Nemen-na, fo ana soo-supa au. Nana, metema Manetualain nde nadenun-nana soona, see kande nanuu hak natanen, tao le'e de ana tao leondiak?”

¹¹ Boema, Dauk nafa'da seluk Abisai, ma basa atan-nala nae, “Au ana bonging-nga boeo, ana sanga enok fo sanga taonisa au; tao le'e de, emi mita Benyamin hataholin ia, ha'da-paliin boema, emi dodoo doak-kana? Manetualain nde nadenun fo ana soo-supa au-a; hu ndia de, boso taon le'e esa boen, nemen-na fo ana soo-supa nakandoo.

¹² Fafa'kama, Manetualain neukose Ana taoafik neu doidosok ia, fo Ana fe au baba'e-papalak, fo da'di ngganggatik neu soo-supak ndia.”

¹³ Boema, Dauk no basa hataholi manatungan-nala la'ok lakandoo, tehu Simei usi tungas lai pupukuk-ka huun-na, boema ana soo-supa, ma ana tapas nenik batu ma dae.

¹⁴ Manek-ka no solda'dun-nala sota-mangu lanseli, lelek ala losa Lee Yarden-na, boema ala hahaeaon-nala leme ndia.

Absalom nai Yerusalem

¹⁵ Ndia te, Absalom ma basa hataholi Israel manatungan-nana, ala masok kota Yerusalem-ma, ma Ahitofel tunga boe.

¹⁶ Lelek Husai, fo Dauk tia-lain manalilinekak ndia, natongo no Absalom boema, naloo bou-bou nae, “So'da-molek ba'eneu manek-ka! So'da-molek ba'eneu manek-ka!”

¹⁷ Tehu Absalom natanen nae, “O lilinekam neu o tia-laim Dauk-ka, nai bee? Tao le'e de, o ta tunga fan?”

¹⁸ Boema, Husai nataa nae, “Masa bole! Au ook hataholi fo Manetualain boema hataholi ia-la, ma hataholi Israel-la, ala helek-ka. Neukose au tungak-ka nde hataholi sila-la dei.

¹⁹ Nakalenak bai, see kande, neukose au alalau-aoono seluk-kana? Ade, ta nde au Ama Maneng anamanen-na fa hetu? Sama leo au alalau-aoono basa Ama Manek aman so, leondiak boe besak ia, neukose au alalau-aoono Ama Manek.”

²⁰ Basa boema, Absalom nafa'da Ahitofel nae, “Mafa'da beek fo, ita muse tao-no'in.”

²¹ Boema, Ahitofel nataa nae, “Muu leo Tuan aman sao makahatun fo ana la'oelas lanea uma manek-ka muu, fo sungu moos. Basa laun Israel-la lala'en-na, neukose ala bubuluk, lae no Tuan tatao-nono'in ndia de, Tuan aman tao Tuan da'di musu so. Soona, basa hataholi manatunga Tuan-na, neukose boetai lapalani.”

²² Da'di, ala tao fe Absalom lalaa temak nai uma manek-ka ta'dak lain. Boema, basa hataholi-la lita, Absalom neu leo lalaa temak ndia dalek neu, fo ana sungu no aman sao makahatun-nala.

²³ Nai tepo-lelek ndia, Ahitofel nanoli-nafa'dan lala'en-na nanasipok, nono'ka bai de, Manetualain hala-kokolan ndia; de nau Dauk do Absalom boe, ala tunga nanoli-nafa'dan.