2 SEMUEL 13 - Susula Malalaok Hehelu Palak Ma Hehelu Beuk

Amnon ma Tamar

¹ Dauk anamanen Absalom, fa'di inaanan esa mata makeek, na'de Tamar. Dauk sao fe'en esa, anamanen-na na'de Amnon, ana hii Tamar,

² de nahiik sungu non. Tehu ta da'di fa, nanahu Tamar bei ao tema de ana ta bole leo-napalasa no tou-ta'ek fa. Amnon dudu'a-dodoo dede'ak ndia nakandondoo henin, losa mate'en-na, ana tu'u he'dis.

³ Amnon tia-lain esa, dodole da'uk nanseli, na'de Yonadab, fo Dauk ka'an Simea anan ndia.

⁴ Boema, Yonadab nafa'da Amnon nae, “Maneana nei, tao le'e de, tunga faik o nono'kabai hataholi manadale he'dik-ka? Hu beek?” Amnon nataa nae, “Au hii Tamar fo au tolanoong Absalom fa'din ndia.”

⁵ Boema, Yonadab nafa'dan nae, “Ndia mudak la'iesak-kana! Mangape'uk muu pepe'uk lain, fo tao nono'ka bai o mamahe'di. Metema, o amam mai donge-dama o soona, mafa'dan mae, ‘Ama, madenu Tamar mai fo ana fe au u'a. Metema, au itan ana sadia nana'a-nininuk sila-la nai au matang, fo au ita matan-na, soona nanahahao au fo au u'a.’ ”

⁶ Basa boema, Amnon nangape'uk neu pepe'uk lain, de ana tao nono'kabai namahe'di. Lelek Mane Dauk-ka mai donge-daman boema, Amnon nafa'dan nae, “Ama, madenu Tamar mai, fo ana sesena kokis mai au matang ia; soona neukose au nau u'a.”

⁷ Basa boema, Dauk fe halak leo Tamar nai uma manek-ka nae, “Muu leo o ka'am Amnon uman muu, fo do'de-nasu fen, nana'a-nininuk.”

⁸ Boema, Tamar neu leo naa neu, de nita Amnon nangape'uk nai pepe'uk lain. Boema, Tamar ho'in-na ha'desopuk faa anak, de ana kamen, boema ana sesena kokis sila-la, nai Amnon matan.

⁹ Basa ndia boema, ana hai heni kokis sila-la neme tasu dale mai, de ana fen na'a. Tehu Amnon ta nau na'a fa. Nafa'da nae, “Madenu hataholi ia-la, basa-basas leo deak leu!”

¹⁰ Basa hataholi sila-la, kalua leme kama ndia dalek mai boema, Amnon nafa'da Tamar nae, “Meni kokis sila-la leo au pepe'ung lain mai, fo mahahao au!” Boema Tamar ka'da tunga.

¹¹ Tehu lelek Tamar loo fen kokis ndia boema, Amnon ho'un-nan, de nafa'da nae, “Fa'di-a, mai sungu moo au!”

¹² Boema, inaanak ndia nataa nae, “Ah, bosok ka'a! O boso makaseti au tao tatao-nono'ik nananakamumulu-nakamamaek ndia! Tatao-nono'ik leondiak-ka, hataholi beita tao nitan nai Israel fa.

¹³ Metema, tatao-nono'ik ndia da'di soona, au tao au matang-nga leo bee neu? Basa bai te, neukose hataholi nakamumulu-nakamamaek o, nai Israel ia boe. Malole lenak, o kokolak moo manek-ka leona, te tao leo bee-o, neukose manek-ka nakaheik ita sao.”

¹⁴ Tehu, Amnon ta nau tunga fa, ma hu kande ndia balakain-na lena, boema nakaseti fa'din ndia, de ana tao tatao-nono'i mangalauk non.

¹⁵ Tehu basa boema, Amnon namanasa Tamar nanseli, de nasan ndia ba'u lena heni, susue ina-anafe'o makasososan-na mai. Boema, nafa'da fa'din ndia nae, “Muu leo deak muu leona!”

¹⁶ Boema, Tamar nataa nae, “Ah, tao le'e de, ka'a tao leondiak? Metema, o usi au soona, tatao-nono'i mangalauk ndia, ba'u lena neme na'kasa o tao basak-ka mai so!” Tehu, Amnon ta nau namanene fa.

¹⁷ Naloo ndia malalau-maoonon, boema nafa'dan nae, “Moo inak ia leo deak neu, fo nggoe lelesu-a!”

¹⁸ Malalau-maoono ndia, tao tunga Amnon paletan ndia. Tamar bua papaken-na nde ba'du manalu lima manalu. Nai tepo-lelek ndia, anafe'oanak sao beitaak-kala, biasa pake bua papake leondiak.

¹⁹ Boema, Tamar tao afu neu langan lain, ana siiba'e ba'du manalun-na, de ana la'o no ana ko'o ketu mata-panan nenik liman duas, ma ana kii noi-noi.

²⁰ Lelek Absalom nitan boema natanen nae, “Ade, na'kasa Amnon tao nalutu o na'de anafe'oanam-ma so do? Le'on-na leon fa'ding-ngo, o boso boe, dudu'a-dodoo dede'ak ndia bai, te o ka'am ndia; da'di boso mafa'da dede'ak ndia, neu su'di see boen.” Boema, Tamar mesak-kana leo fe'e nai Absalom uman, de dalen-na he'dis nanseli, nanahu mesa-mesak-kana.

²¹ Mane Dauk-ka namanene manada'dik ndia boema, namanasa nanseli.

²² Absalom nape'da dalek nanseli neu Amnon, de ana ta nau kokolak non so'on, nanahu ana tao tatao-nono'i mangalauk no fa'din Tamar.

Absalom balas nape'da dalen-na

²³ Basa teuk dua boema, Absalom tao feta, fo ana nggute bi'ilopon-nala bulun-na neme Baal-Hazor, deka no kota Efraim-ma; boema ana ka'i la'iesak manek-ka anamanen-nala.

²⁴ Neu leo Mane Dauk-ka neu, de nafa'dan nae, “Ama, au tao feta, fo au nggute au bi'ilopong-ngala bulun-na. Sa'di leo been-na, Ama moo hataholi matua-madema manai uma manek-ka boe, fo meu leo feta ndia meu.”

²⁵ Tehu, manek-ka nataa nae, “Bosok anang-ngo, nana, metema ami basa-basam-mala meu soona, neukose ami tao susa o.” Absalom nakaseti nahelen, tehu aman nahele ka'da, ta nau neu fa. Ka'da ana fen baba'e-papalak.

²⁶ Boema, Absalom nafa'dan nae, “Metema leondiak soona, po'i au tolanoong Amnon fo ana tunga no ami.” Boema Manek-ka nae, “Ndia ta bole tunga fa.”

²⁷ Tehu, hu kande Absalom nakaseti nahele boema, mate'en-na, Dauk po'i Amnon no basa anamanen-nala tunga loo Absalom. [Boema, Absalom sadia nana'a-nininuk malole-mala'da.]

²⁸ Absalom paleta atan-nala nae, “Taoafik matalolole, fo metema Amnon ninu angol fo ana mafuk soona, neukose au fe emi ta'du, fo taomisan. Boso bii. Te au nde lu'a-lepa dede'ak ndia. Taon no napalanik, fo boso no bibii-namata'uk!”

²⁹ Boema, ata sila-la lakalala'ok Absalom paletan ndia, de ala taolisa Amnon. Dauk anamane fe'en-nala lita manada'dik ndia boema, esa-esak sa'e-na keledein-na de lalai.

³⁰ Ala fali le'us, de bei lai eno tala'dak te, hataholi nafa'da Dauk nae, “Absalom taonisa la'iesak Ama Manek anamanen-nala so – ta ela maso'dak esa boen!”

³¹ Manek-ka fo'a napadeik, boema ana sii sii-lulu'i bua papaken-na, nanahu dalen-na he'dis-sa, ma ana bala aoinan-na neu dae lain. Basa hataholi mana'a ngga'din-nala boeo, ala sii sii-lulu'i sila bua papaken-nala.

³² Tehu Yonadab, fo Dauk ka'an Simea anan-na nae, “Ama Manek, dalem-ma boso ba'ihana, ma boso dodoo-dudu'a mae mate la'iesak Ama Manek anamanen-nala so. Mate ka'da Amnon mesak-kana, nana ana da'di mangale'dok so, nae Absalom dale hihiin-na nde ndia, mulai neme lelek fo, Amnon tao tatao-nono'i mangalauk no fa'din Tamar.

³³ Da'di, boso mamahele mae mate la'iesak Ama Manek anamanen-nala so, nana mate ka'da Amnon mesak-kana.”

³⁴ Ndia te, Absalom nalai so. Manamanea Dauk uma manen-na, nita hataholi makadotok, ala loe letek maneme Horonaim-ma. Boema neu nafa'da dede'ak ndia, neu manek-ka.

³⁵ Boema, Yonadab nafa'da Dauk nae, “Ama Manek anamanen-nala nde sila! Tete'ek-ka, sama leo na'kasa atam-ma nafa'dak-ka.”

³⁶ Besak-ka ana kokolak basa te, Dauk anamanen-nala masok lala uma dale. Ala mulai kii, de Dauk no atan-nala boeo, ala kii no dale he'dik.

^37-38 Absalom nalai leo nusa Gesur-ra manen-na, fo nde Amihur anamanen Talmai, uma manen-na neu. Ana leo neme ndia, teuk telu dalen-na. Doon-na seli, Dauk susa Amnon.

³⁹ Tehu nai lelek Dauk dalen-na ta he'dis-sa so'on boema, nahiik nanseli, nita Absalom.