2 SEMUEL 11 - Susula Malalaok Hehelu Palak Ma Hehelu Beuk

Dauk ma Batsyeba

¹ Nai faik fo manek-kala leu latee-lata'ti, Dauk nadenu Yoab no basa malanga solda'du matuaina-nala, ma solda'du Israel-la lala'en-na, leu latee-lata'ti; boema, ala sengi hataholi Amon-nala, ma lakahapi-la kota Raba. Tehu Dauk leo neme Yerusalem.

² Nai le'donosok esa, de Dauk sungu fo'a boema, ana la'o-la'o nai uma manek-ka ta'dak lain. Ana mete neme ndia mai, de nita inak esa bei nadiu oe, tehu inak ndia, mata makeek nanseli.

³ Boema, Dauk nadenu hataholi neu natane, see inak ndia, boema nafa'dan nae, inak ndia na'de Batsyeba; aman na'de Eliam, ma saon-na na'de Uria, fo hataholi Het.

⁴ Boema, Dauk nadenu hataholi neu nala inak ndia, de ana losa uma manek-ka boema, ana sungu non. (Besak-ka Batsyeba tao basa feta tao nalalao aoinak-ka, nana he'di bulan-na nate'e so.) Boema, ana fali ne'un leo ndia uman neu.

⁵ Basa boema, Batsyeba mulai nailu, de nafa'da ilun ndia neu Dauk.

⁶ No lai-laik, Dauk haitua paleta leo Yoab nae, “Madenu Uria, fo hataholi Het ndia mai natongo no au.” Boema, Yoab nadenu Uria fo neu natongo no Dauk.

⁷ Lelek Uria mai boema Mane Dauk-ka natanen, Yoab no solda'du Israel-la, so'dan-nala leo beek so, ma boeo natane natee-natatik-ka, eno-dalan leo beek.

⁸ Basa boema, Dauk nafa'da Uria nae, “Fali mu'um-ma, leo o umam muu leona, fo hahaeaom faa dei.” Uria la'o boema, Dauk haitua bua palsen leo Uria uman neu.

⁹ Tehu, Uria ta fali nakandoo leo uman neu fa, te ana sungu sama-sama no manek-ka manamanean-nala, neme lelesuina uma manek-ka, matan-na.

¹⁰ Lafa'da dede'ak ndia neu Dauk. Boema, Dauk natane Uria nae, “Besak-ka, o fali ma'im-ma meme leleo-lala'o dae dook mai, te tao le'e de, o ta fali mu'um-ma leo o umam muu fa?”

¹¹ Boema, Uria nataa nae, “Solda'du Israel ma Yehuda-la, bei latee-lata'ti leni mamate-momopon-nala, de Manetualain Peti Hehelu-balataan, sama-sama nos; Yoab, fo ami malanga solda'du matuainam-ma, ma basa malanga solda'du matuaina fe'ek-kala ofu lai mook-ka. De hapu nai bee, atam ia fali leo uma neu, fo atam-ma na'a-ninu ma atam-ma sungu no atam-ma saoinan-na? No Ama Manek maso'dan-na, ma atam-ma maso'dan-na, neukose, atam-ma ta tao leondiak fa!”

¹² Boema, Dauk nae, “Le'on-na leona fo faik ia, hahaeaom seluk meme ia, fo balahaa fafaik soona, au po'i o la'o.” Da'di, faik ndia, Uria nahele neme Yerusalem. Balahaa boema, Dauk naloon neu na'a.

¹³ Boema na'a, de Dauk fen ninu ala-lalu, nalosa ana mafuk. Tehu, le'odaek ndia boeo, Uria ta fali leo uman-na neu fa, te ana bela lafan-na, de ana sungu neu lain neme manamanea uma manek-ka, kaman dale.

¹⁴ Balahaa boema, Dauk sulak fe Yoab susulak, de ana fe Uria nenin leo Yoab neu.

¹⁵ Ana sulak nae leo ia, “Metema, natee-natatik-ka makee soona, fe Uria nisik uluk, fo o makadedeak no denge-dengek, tehu ana boso bubuluk, fo ela maten nai musu dale.”

¹⁶ Nai lelek Yoab nakahapi-na kota ndia boema, nadenu Uria neu leo mamanak fo ana bubuluk, musu-a solda'du palanin-nala, lanea lahele mamanak ndia.

¹⁷ Nai lelek musu-a solda'dun-nala kalua leme kota dale mai, fo ala sapu-la Yoab solda'dun-nala boema, ala taolisa Dauk malanga solda'du matuainan de'ubee, de Uria nai dalek boe.

¹⁸ Basa boema, Yoab nadenu hataholi neu nafa'da Dauk, natee-natatik ndia eno-dalan.

¹⁹ Yoab paleta, nadenu hataholi ndia nae, “Lelek Ama Manek namanene o hala nafa'dam-ma, la'eneu natee-natatik-ka eno-dalan soona,

²⁰ fafa'kama namanasa, fo natane o nae, ‘Tao le'e de, emi deka manseli moo kota ndia? Ade, emi ta bubuluk, mae tao leo bee-o, neukose musu-a, ana kou emi neme papala nanadaman-nala lai mai fa do?

²¹ Ade, emi mafandele heni, tao leo beek de Abimelekh, fo Gideon anan ndia, nanataonisak neme Tebes so hetu? Ade, ana mate ta hu kande, inak esa tapan nenik batu popo'de ha'desopuk-ka, neme papala nanadamak lain mai fa do? Da'di, tao le'e de, emi deka manseli moo papala nanadamak ndia?’ Metema, Ama Manek natane nae leondia soona, mafa'dan mae, ‘Uria fo, Ama Manek solda'du matuainan-na boeo, maten so!’ ”

²² Boema, nadenu hataholi ndia, neu nataa Dauk, de nafa'dan hata fo Yoab paleta neun.

²³ Nadenu hataholi ndia, nafa'da nae, “Musu-a, balakain-na lena ami, de ala kalua leme kota dale mai, fo ala sapu-la ami neme mook-ka. Tehu no napalanik nanseli, ami makasetis fali le'us losa kota lelesuinan-na.

²⁴ Basa boema, ala kou ami neme papala nanadamak lain mai, de mate Ama Manek malanga solda'du matuainan de'ubee, fo Uria nai dalek boe.”

²⁵ Boema, Dauk nafa'da ladenu hataholi ndia nae, “Matetea-mahehele Yoab dalen-na, ma mafa'dan fo dalen-na boso ba'ihana, nana ta hapu nananafa'da elak nae, see kande, neukose maten nai natee-natatik dale fa. Mafa'dan, fo ela ana boso hahae sapu-na kota ndia, losa ana tao nakalulutuk kota ndia.”

²⁶ Lelek Batsyeba namanene, lae mate saon-na so boema, ana susa.

²⁷ Basa fai susan-na boema, Dauk nadenu hataholi neu nala inak ndia, leo uma manek-ka mai, de ana taon da'di ndia saoinan. Basa bulak de'ubee boema, ana bongi-na ni'iana touanak esa. Tehu Manetualain ta hii Dauk tatao-nono'in ndia fa.