2TAWARIKH 9 - Susula Malalaok Hehelu Palak Ma Hehelu Beuk

Nusa Syeba ina manen-na neu donge-dama

¹ Nusa Syeba ina manen-na namanene la'eneu Salomo na'den-na nanakoa-nanakiok. Boema ana mai leo Yerusalem mai soaneu ana fola Salomo nenik natatanek mateaina-la. Ana mai no manatunga dean makadotok nanseli ma onta manafua bumbu, batu poemata ma lilopilas makadotok nanseli. Nai lelek latongo loo Salomo boema ina manek ndia fe natatanek mata-matak lala'en-na fo ana hapu dudu'a-dodoon-nan.

² Salomo hapu nataa nala basa natatanek sila-la, ta hapu natatane matea esa boen ba'eneun.

³ Ina manek ndia sakasii matan Salomo manatee tenon-na. Nita uma manek fo Salomo nafofo'ak-ka,

⁴ hataholi mana'a ngga'di manai uma manen-na ue-le'din, ma papake-ngganggaon-nala matak esa, ma uma leleo-nala. Nita nana'a-nininuk fo nanasadiak-kala, ma basa malalau-maoono-la papake-ngganggaon nai lelek lalalau-laoono nai feta-dote; Boeo nita tutunu-hohotuk fo Salomo tunu-hotun nai Manetualain Uman-na. Basa sila-la tao-la nusak Syeba ina manen ndia dodoo doak-kana.

⁵ Boema nafa'da Manek Salomo nae, “Basa hata fo au amanenen nai au dae-oeng la'eneu Tuan, ma Tuan manatee tenon-na, memak tete'ek-ka!

⁶ Makahulun-na au ta amahele fa, tehu lelek au mai de au ita basa-basan nenik au matang-nga, besak-ka au amahele. Te'e-te'e basa hata lala'en fo au amanenen ndia, beita ba'e duak neme hata fo au itan besak ia mai fa. Se'kona Tuan manatee tenon-na ma su'i-beten ba'un-na seli lena neme hata fo lafa'dan neu au-a.

⁷ Hataholi mana'a ngga'di fo lalalau-laoono Tuan-na, laua-lanale lanseli, ma laue-lale'di ba'eneu Tuan tataas esa nalosa ala hapu lamanene matan neme Tuan mai, basa nanolik manatee tenok lala'en-na!

⁸ Kokoa-kikiok ba'eneu Amak, fo Tuan Manetualain-na! No Ana so'u Tuan da'di manek soaneu paleta nenik na'den-na, Ana natu'du nae namahoko nanseli neu Tuan. Nanahu Ana sue-lai hataholi Israel-la, de Ana nau fo ela ala ta sapu-lalo fa, te lahele losa dodoon-na, boema Ana so'u Tuan da'di sila manen-na, fo ela Tuan hapu napadedeik natetu hoholo-lalanek ma eno ndos ma matetuk-ka.”

⁹ Basa boema nusak Syeba ina manen ndia fe Salomo bua palsen fo nenik-kala, fo nde: lilopilas kilo lifun haa ma lenak, ma batu poemata makadotok, boema bumbu-bumbu-la. Salomo beita hapu sipo nita bumbu-bumbu malole nanseli sama leo nusak Syeba ina manen ndia fen-nana fa. (

¹⁰ Manek Hiram-ma anaboan-nala ma Salomo ana boan fo leni fe Salomo lilopilas neme Ofir mai, boeo leni batu poemata ma ai kainituk.

¹¹ Salomo pake ai sila-la soaneu tao e'dahuuk nai Manetualain Uman-na, ma nai uma manen-na, boeo soaneu tao kacapi ma gambus fe basa manamakameek-kala. Dede'ak fo sama leondia-ka, ana beita da'di nita nai nusak Yehuda fa.)

¹² Hapu seluk bua palsen babala fe'ek fo biasan-na Salomo fe-ka, Salomo boeo fe ina manek maneme nusak Syeba ndia basa hata lala'en fo ana nokek-kala. Basa boema ina manek ndia no basa manatunga dean-nala fali le'us leo nusan-na leu.

Salomo su'i-beten

¹³ Tunga teuk Manek Salomo-a sipo lilopilas hihii nae kilo lifun duahulu telu,

¹⁴ beita leke manadangan-nala bea-nala mai fa. Arab manen-nala ma Israel gobelnon-nala boeo fen liliopilas ma lilofulak.

¹⁵ Salomo tutu lilopilas de ana taon-na sisili musu natun dua. Lilopilas fo ana paken soaneu tao sisili musu sila-la, esa soona na'a lilopilas kilo hitu ma lenak.

¹⁶ Boeo ana taon-na sisili musu lilopilas ana natun telu. Lilopilas fo ana paken soaneu tao sisili musu lilopilas ana natu kateluk sila-la, esa soona na'a fafa'kama lilopilas kilo telu, basa sila-la leme lilopilas nanatutuk mesa-mesan. Ana pe'da sisili musu sila la lai mamanak fo mana'de Mamanak Nula Libanon.

¹⁷ Manek-ka boeo taon-na kandela manek matuaina esa neme ngga'di dui mai de ana balias-sana nenik lilopilas isik.

¹⁸ Kandela ndia malimak, de hapu meoasu dodoki-dudulan nai liman duas. Kandela ndia boema nanuu edak nee, ma mamana tata'bu eik esa fo nananakadiditak nenik lilopilas. Ana taon-na mamana tata'bu eik ndia da'di esa no kandelan-na.

¹⁹ Nai kandela ndia e'dan-nala esa-esak pe'dan-na, hapu meoasu-a dodoki-dudulan basa-basan lala'en-na sanahulu dua. Beita hapu kandela sama-na leondiak nai nusak bee boen.

²⁰ Basa Salomo bua nininun-nala nanataok neme lilopilas-sa mai, ma basa bua-lo'as manai Mamana Nula Libanon-na boeo, nanataok neme lilopilas isik-ka mai. Nai Salomo tepo-lelen-na, lilofulak-ka belin ta.

²¹ Salomo nanuu ofak matuaina makadotok fo ala laok lai tasi maloaina-la sama-sama loo Manek Hiram-ma ofan-nala. Teuk telu soona, ofak sila-la ala fali ma'is fo leni lilopilas, lilofulak, ngga'di dui kode ma manupui merak.

²² Manek Salomo-a su'i-beten lena ma manatee tenon-na lena neme su'di manek bee mai boen nai daebafak-ka.

²³ Basa manek-kala sanga enok latongo loo Salomo soaneu lamanene nanoli manatee tenon fo Manetualain fen-nana.

²⁴ Manek sila la mai no esa-esak neni bua palsen soaneu Salomo. Ala fe bua-lo'a lilfulak, lilopilas, papake-ngganggaok, tafa-sisilo, bumbu-bumbu, ndala ma bagal. Ala tao leondiak neme teuk leo teuk neu.

²⁵ Manek Salomo-a boeo nanuu lalae lifun haa soaneu ndala ma kaletan-nala. Ndala musun lifun sanahulu dua. Ana pe'da seli nai Yerusalem ma lenan-na ana pe'das lai kota manai ofa seseek-kala soaneu kaleta musun-nala.

²⁶ Ana koasa basa manek manai nusak fo natabaa neme Lee Efrat-ta losa leo nusak Filistin-na ma Masir dae toon-na neu.

²⁷ Nai tepo-lelek Salomo paleta, lilofulak-ka nalupa bua-lo'a biasa nai Yerusalem, sama leo batu, ma ai kaiou Libanon-na makadotok nanseli sama leo ai kaak biasa.

²⁸ Salomo asa ndala neme Masir ma neme nusa fe'e-fe'ek-kala mai.

Salomo paletan-na nanatui keke'uk

²⁹ Tutui fe'ek la'eneu Salomo paletan-na neme makasososan-na losa mate'en-na, nanasula basak nai Nabi Natan-na susula bei-ba'in dale ma nai Ahia fo hataholi Silo ndia susula Nafa'da elan dale ma nai Nabi Idon-na susula Ninintan dale, fo nai ndia boeo nanasulak tutuik la'eneu Yerobeam fo manek Israel-la paletan-na.

³⁰ Salomo paleta Israel mabasa-basa nai Yerusalem teuk hahulu dalen-na.

³¹ Basa boema maten de latoin nai Kota Dauk-ka. Boema anamanen Rehabeam nggatin da'di manek.