2TAWARIKH 8 - Susula Malalaok Hehelu Palak Ma Hehelu Beuk

Salomo tatao-nono'i malolen-nala soaneu laun-nala

¹ Salomo nafofo'a Manetualain Uman-na ma uma manek-ka nai teuk duahulu dalen-na.

² Manek Hiram-ma fen kota-kota-la, nafofo'a falik-kasa, boema nadenu hataholi Israel-la leo leu ndia.

³ Ana loso-na nusak Hamat-ta ma nusak Zoba,

⁴ boema ana tao natea-nahele kota Tadmor-ra nai mook maloa, boema nafofo'a falik basa mamana pepe'da nana'a-nininuk ma bua-lo'as manai Hamat-ta.

⁵ Nafofo'a falik kota Bet-Horon Lain ma Bet-Horon Dae da'di kota fo nanuu kota musu no lelesuinan-na nanuu ai betubalak.

⁶ Boeo nafofo'a falik kota Baalat-ta ma basa kota ma basa kota-kota pepe'da nana'a-nininuk ma bua-lo'as, boema kota-kota fo kaleta musu-la loo ndalan-nala mamana-nala. Basa dale tutu'un fo nafofo'a nai Yerusalem, Libanon ma nai ana koasa basa nusak lala'en-na, ana tao la'iesak-kasa so.

^7-8 Basa leoina Kanaan-na tititi-nonosin fo hataholi Israel-la ta hapu taolisa fas nai lelek langatuu-la nusak ndia, Salomo fo'a la'iesak-kasa soaneu da'di kuli. Hataholi sila nde hataholi Het, Amori, Feris, Hewi ma Yebus-ala. Losa besak ia, hataholi sila-la tititi-nonosin-nala bei da'di ata.

⁹ Ta nadenu hataholi Israel-la da'di kuli fa; ala hapu bela-ba'uk da'dileo solda'du, malanga solda'du matuaina, malangan kaleta musu, ma solda'du manasa'e ndala.

¹⁰ Hataholi mana'a ngga'di natun dua limahulu hapu bela-ba'uk lanea hataholi-hataholi fo manada'di kuli manai tatao-nono'ik mata-matak-kala dalek.

¹¹ Salomo no heok saon-na fo manek Masir-ra anafe'on-na, neme Kota Dauk-ka leo uma fo ana taon fen-na neu. Nana Salomo dodoo nae, “Au saong-nga ta bole leo nai Dauk fo manek Israel-la uma manen-na fa, nanahu basa mamanak fo nai bee Peti Hehelu-balataak-ka nanape'dak-ka nde been-na, mamanak malalao-malalafuk.”

¹² Salomo tunu-hotu tutunu-hohotu nanatunuk neu Manetualain nai mei tunu-hotuk fo nafofo'an nai Manetualain Uman-na matan-na.

¹³ Ana tunu-hotu tutunu-hohotuk sila-la tunga Musa Hoholo-lalanen soaneu tunga-tunga fai malole: fai Sabat, fai malole Bula Beuk, ma fai malole tunga teuk ka telu kala, fo nde fai malole Loti Ta Pake Laluteik-ka, fai malole Keketu-kokoluk-ka, ma fai malole Lalaa Akidook-ka.

¹⁴ Salomo ito-ato tatao-nono'i tunga-tunga faik soaneu basa imam-mala ma soaneu hataholi Lewi fo muse lakamee nakameek soaneu Manetualain-na ma ala tulu-fali basa imam-mala nai lakalala'ok feta makaluku-makatele-la dalek, nanadaa no aman Dauk nakaneneten-nala. Boeo basa manamanea Manetualain Uman-na, ana ba'en neu bubua-buak-kala soaneu lelesuina-la esa-esak nandaa no Manetualain atan Dauk natutu'dun-na.

¹⁵ Basa Dauk fe natutu'duk neu basa imam-mala ma hataholi Lewi-la la'eneu gudang-ngala, ma dede'a fe'e-fe'ek-kala, ana tungan no matetun-na.

¹⁶ Boema Salomo tao nakababasak basa dale tutu'un soaneu uma ndia nafofo'an-na. Basa tatao-nono'ik lala'en-na, mulai neme kali uma laten-na losa Manetualain Uman-na basan, ana tao nakababasak-kana no malole so.

¹⁷ Basa ndia boema Salomo neu leo Ezion-Geber ma Elot fo kota ofa seseek manai Namo Akaba su-un-na fo nai nusak Edom-ma neu.

¹⁸ Manek Hiram-ma haitua fen ofak-kala fo Hiram anaboan-nala loo ofaisi malelan-nala nde ho'u matan ofak sila-la. Ala la'o sama-sama loo Salomo anaboan-nala leo Ofir leu de ala ho'i leni lilopilas kilo lifun sanahulu lima leme naa mai, boema lenis leo Salomo neu.