2TAWARIKH 7 - Susula Malalaok Hehelu Palak Ma Hehelu Beuk

Manetualain Uman-na nakateman-na

¹ Manek Salomo-a hule-haladoi basa boema, ha'i-a kona neme lalai mai de ana hotu tutunu-hohotuk fo nanafek neu Manetualain-na. Boema Manetualain mai de mangale'do-na henu Manetualain Uman ndia,

² nalosa basa imam-mala ta hapu leo dalek leu fa.

³ Lelek laun Israel-la lita ha'i-a kona neme lalai mai ma Manetualain mai de mangale'do-na henu Manetualain Uman-na boema, ala bala leu lante lain boema ala sene-do'ok ma ala koa-kio Manetualain, nanahu Manetualain malole ma susue-lalain manaketu basa taak losa dodoon-na.

⁴ Basa ndia boema, Manek Salomo ma basa hataholi fo lakabubua lai ndia ala fe tutunu-hohotuk neu Manetualain.

⁵ Manek Salomo-a tunu-hotu sapi lifun duahulu dua ma bi'ilopo lifun natun esa duahulu soaneu tutunu-hohotuk mole-dame. Leondiak manek-ka ma basa laun-na lala'en-na tao feta fo fe uma makaluku-makatele ndia neu Manetualain.

⁶ Basa imam-mala lapadeik lai mamanak fo nananaketu basak ba'eneus; lasasalematak loo hataholi Lewi fo manakoa-kio Manetualain nenik sasanu fo Manek Dauk-ka tao-kala, boema lakamee nakameek-ka nae, “Susue-lalain manaketu basa taak losa dodoon-na!” fo nandaa no Dauk nonoken-na. Basa imam-mala fuu trompet lelek basa laun-na lala'en-na lapadeik.

⁷ Boema Salomo fe uma makaluku-makatele ndia so'dan manai ta'dak tala'da-na leo Manetualain neu. Basa ndia boema nai mamanak ndia, ana fe tutunu-hohotu nanatunuk, tutunu-hohotu gandum, ma bana-manu minan-na soaneu tutunu-hohotu mole-dame. Ana tunu-hotu basa sila-la lai ndia nanahu mei tunu-hotu liti fo ana taon-na ka, anak-ka nanseli soaneu tutunu-hohotuk sila-la.

⁸ Salomo ma basa laun Israel-la lala'en-na tao feta Lalaa Akidook-ka faik hitu dalen-na. Hataholi makadotok nanseli lakabubua soaneu ala tunga feta ndia. Ala mai leme enok masok leo Hamat nai kii losa leo dae too Masir-ra nai kona.

⁹ Ala lakabubua faik hitu dalen-na soaneu feta nakatema Manetualain mei tunu-hotun, basa boema faik hitu seluk soaneu feta Lalaa Akidook-ka. Nai fai mate'en-na, ala tao feta fai mate'ek-ka,

¹⁰ ma balahaa, fo nai bula kahitu-a fain duahulu telu boema, Salomo nadenu hataholi sila-la fali. Ala lamahoko nanahu hata malole fo Manetualain taon soaneu leoina Israel fo anan-nala, soaneu Dauk ma Salomo.

Manetualain natu'du seluk aoinan-na neu Salomo

¹¹ Leondiak Salomo tao basa Manetualain Uman-na ma manek-ka uma manen-na nandaa no dale tutu'un-na,

¹² Manetualain natu'du seluk aoinan-na neun nai fai le'odaek. Manetualain nafa'dan nae, “Au amanene o huhule-haladoim so ma Au sipok uma ia da'di leo mamana hehelik soaneu fe tutunu-hohotuk ba'eneu Au.

¹³ Metema Au ta fe u'dan-na mai do Au haitua lamak-ka mai soaneu la'aheni buna-boak manai daebafak-ka do Au fe he'di-laus neu Au anang-ngala,

¹⁴ boema Au anang fo manapake Au na'deng sila-la lakaloe-lakadae aon-nala ma ala hule-haladoi boema ala mai leo Au mai ma ala tuka tei sale dale leme sila tatao-nono'i mangalaun-nala mai, soona neukose Au amanene sila huhule-haladoin neme nusa so'dak-ka mai. Neukose Au fe do'o do ampon neu sala-singon-nala ma Au tao asafali sila nusan-na da'di nusak tetu-temak seluk.

¹⁵ Neukose Au taoafik ahele Au Umang ia ma Au amanene tataasesa basa huhule-haladoik fo neme mamanak ia mai.

¹⁶ Basa sila-la, neukose Au taon nanahu Au hele basa mamanak ia ma Au taon da'di mamana makaluku-makatele hehelik neu Au losa dodoon-na. Neukose Au taoafik-kana ma Au asulu-ahapan neme doon losa doon-na.

¹⁷ Metema o sama leo o amam Dauk, maso'da tunga Au hihii-nanaung ma tunga Au hoholo-lalaneng boema tao basa hata fo Au paletan neu o,

¹⁸ soona neukose Au atetu Au hehelu-balataang neu o amam Dauk ae neukose hapu hataholi esa tataasesa neme tititi-nonosin mai, da'di manek nai Israel.

¹⁹ Tehu metema o ma o laum-mala la'olena Au hoholo-lalaneng ma Au paletang-ngala boema sene-do'ok neu lamatua daebafak fe'ek-kala,

²⁰ soona neukose Au kaluaheni emi neme nusak fo Au fe basan neu o so. Neukose Au boeo la'oela uma ia, fo Au aketu basan da'di mamana makaluku-makatele neu Au. Neukose uma ia nananakamumulu-nakamamaek ma nanahikak nai mamanak lala'en-na.

²¹ Besak ia uma mamaso-kakasi ia nanafe ha'da-holomata nanseli, tehu nai lelek ndia, hataholi manala'ok tunga ndia, neukose litan fo ala dodoo-doak-kana. Neukose lafa'da lae, ‘Taole'e de Manetualain tao leondiak soaneu nusak ma uma ia?’

²² Boema neukose hataholi nataa nae, ‘Nanahu ala la'oela Amak, fo sila Manetualain manahela-nole sila bei-ba'i kain-nala kalua leme Masir mai. Ala sene-do'ok ma laheluk lilineka neu lamatua daebafak fe'ek-kala. Hu ndia de, Manetualain fe soe ia tuni nalas.’ ”