2TAWARIKH 36 - Susula Malalaok Hehelu Palak Ma Hehelu Beuk

Yoahas manek Yehuda

¹ Laun Yehuda-la hele Yoahas de ala so'un da'di manek nai Yerusalem nggati aman Yosia.

² Yoahas teun duahulu telu nai lelek ana manek Yehuda, de ana paleta nai Yerusalem bulak telu dalen-na.

^3-4 Nekho fo manek Masir-ra ho'un-na Yoahas de ana foo nenin leo Masir neu, boema nadenu Yehuda bae bea dede'un-na lilofulak kilo lifun telu natun haa, ma lilopilas kilo teluhulu haa. Basa bema ana so'u Elyakim fo Yoahas tolanoon-na da'di manek, de ana foi nasafali Elyakim na'de-na da'di Yoyakim. Basa boema foo neni Yoahas leo Masir neu.

Yoyakim manek Yehuda

⁵ Yoyakim teun duahulu lima, nai lelek ana da'di manek Yehuda, de ana paleta nai Yerusalem teuk sanahulu esa dalen-na. Ana nasala-nasingo neu Manetualain.

⁶ Lelek Nebukadnezar fo manek Babel-la loso-na Yehuda boema, ana ho'un-na Yoyakim, de noon no nanalangek leo Babel neu.

⁷ Bua-lo'a kabelik manai Manetualain Uman-na, Nebukadnezar ho'ineni seli, de ana pe'das nai uma manen dale nai Babel.

⁸ Tutui fe'ek la'eneu Yoyakim, fo nai dalek hapu tatao-nono'i manggenggeon-nala, ma tatao-nono'i mangalaun-nala boeo, nanasula basak nai Mane-manek Israel ma Yehuda-la susula Tutuin dale so. Anamanen Yoyakhin nggatin da'di manek.

Yoyakhin manek Yehuda

⁹ Yoyakhin teun sanahulu falu, nai lelek ana da'di manek Yehuda, de ana paleta nai Yerusalem bulak telu, faik sanahulu dalen-na. Ndia boeo nasala-nasingo neu Manetualain.

¹⁰ Neu teu manamaik-ka boema, Manek Nebukadnezar-ra foo neni Yoyakhin leo Babel neu da'di leo hataholi nanafook, ma ana ho'i neni bua-lo'a kabelik-kala leme Manetualain Uman-na mai boe. Basa boema Nebukadnezar so'u Zedekia, fo Yoyakhin to'o-na da'di manek neu Yehuda ma Yerusalem.

Zedekia manek Yehuda

¹¹ Zedekia teun duahulu esa, nai lelek ana da'di manek Yehuda. Ana paleta nai Yerusalem teuk sanahulu esa dalen-na.

¹² Ndia boeo nasala-nasingo neu Manetualain Ana ta nau nakaloe-nakadae aoinan-na ma ana ta nau tunga Nabi Yeremia fo manamanduku-malosak hala heheluk neme Manetualain mai soaneun fa.

Yerusalem tutu'da-na

¹³ Manek Nebukadnezar-ra nakaseti Zedekia fo ana soo-supa nenik Manetualain na'den-na nae neukose ana lilineka neu Nebukadnezar. Tehu makabuin-na Zedekia tao nakabubua mangalauk la'ban Nebukadnezar. Zedekia nalanga bat neu Amak fo Israel Manetualain-na. Ana ta nau tuka tei-sale dale neme sala-singon mai, ma ana ta nau fali leo Manetualain mai fa.

¹⁴ Fe'ek neme ndia mai, Manetualain Uman fo Manetualain mesak-kana nde taon da'di Uma hehelik ba'eneun-na, mauli-malangan Yehuda-la, imam-imam-mala, ma laun-nala taon langgenggeon, nanahu ala tunga sene-do'ok neu sosongo-tatangok, ma ala tunga leoina manai sila titia-tatain-nala, maso'da masala-masingo-nala.

¹⁵ Amak fo sila bei-ba'i kain Manetualain-na, fali-fali Ana haitua nabi-nala soaneu fe nasanene'dak neu anan-nala, nanahu Ana sue-lai sila ma Ana sue-lai Uman-na.

¹⁶ Tehu ala lakamiminak Manetualain hataholi nadedenun sila-la, ma ala hika nabi-nabin-nala boema ala ta taoafik neu hala-kokolan fa. Mate'en-na Manetualain namanasa nanseli neus, nalosa ta hapu eno kaluak seluk ba'eneus soaneu latapo'i leme huhuku-dodokin mai.

¹⁷ Manetualain nakababale manek Babel-la dalen-na fo ela ana sapu-nalas. Manek ndia taonisa hataholi Yehuda fo muli-solu-kala, ma sila fo manai Manetualain Uman dale boe. Ana ta sue-lai neu hataholi esa boen, nau lasik do mulik, touk do inak, kamahe'dik do so'da-la'dak boe. Manetualain fe basa-basas leo manek Babel-la neu.

¹⁸ Manek Babel ndia loso neni la'iesak Manetualain Uman-na hata-heton, ma bua-lo'a kabelin-nala, manek-ka ma basa hataholi mana'a ngga'din-nala hata-heton boema nenis leo Babel neu.

¹⁹ Ana tao nakalulutuk kota Yerusalem-ma papala nanadaman-na, de ana hotu heni kota ndia, de Manetualain uman-na ma basa uma manek-kala sama-sama loo bua-lo'a kabelik fo bei manai uma manek sila-la dalek-ka, nanalekek nai dalek boe.

²⁰ Laun fo manaladeak-kala, ana foo nenis leo Babel neu. Nai naa, ala da'di ndia atan ma tititi-nonosin atan losa tepo-lelek nusak Persia ana koasa.

²¹ Leondiak hata fo Manetualain nafa'dan tunga Yeremia, ana da'di nae neukose nusak ndia ana da'di dae tokotiik teuk hituhulu dalen-na da'di leo ngganggatik neu teu-teuk Sabat fo ala ta taoafik-kana fa.

Kores paleta hataholi Yahudi-la fo ala fali le'us

²² Nai Kores fo manek Persia paleta neu teu makasososan-na, Manetualain nakalala'ok hata fo nafa'da basan tunga Nabi Yeremia. Manetualain nakababale Kores dalen-na soaneu ana kalua paleta esa fo nanalees nai basa nusak-ka lala'en-na. Liin-na nae leo ia:

²³ “Kores fo manek Persia paletan-na nde ia! Amak, fo Manetualain manakoasa nai nusa so'dak-ka, nakadada'dik basa au da'di manek neu daebafak-ka lala'en-na, ma Ana fe au bela-ba'uk soaneu afofo'a uma ba'eneun nai Yerusalem fo nai nusak Yehuda. Da'di, emi basa-basam fo manada'di Manetualain anan-nala muse fali leo naa meu! Ela leo bee na emi Manetualain nasulu-nahapa emi.”