2TAWARIKH 35 - Susula Malalaok Hehelu Palak Ma Hehelu Beuk

Yosia tao feta Paskah

¹ Basa boema Yosia tao feta Paskah nai Yerusalem soaneu fe ha'da-holomata neu Manetualain. Bi'ilopo soaneu feta ndia, nanado'dok nai bula kaesa fain sanahulu haa.

² Yosia baba'e fe basa imam-mala tatao-nono'ik fo muse ala tao-no'in nai Manetualain Uman, ma nadenus fo ela ala tao-no'in no malole-na.

³ Hataholi Lewi fo nanahele hehelik soaneu Manetualain, ma manada'di Israel mesen-nala hapu paleta nde ia neme Yosia mai nae, “Tao Manetualain Peti Hehelu-balataan malalao-malalafun ndia leo Dauk amamanen Manek Salomo napadedeik-na Manetualain Uman dale neu. Emi ta bole laliheok-kana so'on. Malalau-maoono emi Manetualain ma leoina Israel-la fo Anan-nala.

⁴ Maheheleaom nai Manetualain Uman tunga emi kelompok-ka, nandaa no baba'e bela-ba'uk fo nananaketu basak soaneu emi neme Manek Dauk-ka ma amamanen Manek Salomo mai.

⁵ Ito-ato emi kelompok ndia leondiak, nalosa hapu hataholi tataasesa neme emi mai, hapu tulu-fali kelompok hataholi Israel manai Manetualain Uman-na.

⁶ Emi muse do'do bi'ilopo soaneu feta Paskah. Hu ndia de maheheleaom leona, fo ela nandaa sene-do'ok neu Manetualain, ma sadia tutunu-hohotuk fo muse nanatunu-hotuk ba'eneu Manetualainboe, fo ela no enok ndia, hataholi Israel fe'ek-kala hapu lakalala'ok hata fo Manetualain paletan tunga Musa.”

⁷ Fo ela hataholi manai feta Paskah ndia hapu tunu-hotu tutunu-hohotu Paskah. Manek Yosia fe tutulu-fafalik neme bana-manun mai, bi'ilopo lifun teluhulu, bi'ilopo ana, ma bi'ihii ana, boema sapi mane lifun telu.

⁸ Basa Yosia hataholi mana'a ngga'din-nala boeo fe tutulu-fafalik soaneu imam-mala, ma hataholi Lewi fo maneme laun-na lala'en-na mai. Hataholi mana'a ngga'di manahapu bela-ba'uk soaneu Manetualain Uman-na, fonde Imam Matuaina Hilkia, ma Zakharia, boema Yehiel, telus fe basa imam-mala bi'ilopo ana lifun dua natun nee, ma bi'ihii ana boema sapi mane natun telu soaneu tutunu-hohotuk nai feta ndia.

⁹ Basa mauli-malanga hataholi Lewi fonde: Konanya, Hasabya, Yeiel, ma Yozabad, ala fe hataholi Lewi-la bi'ilopo ana lifun lima ma bi'ihii ana boema sapi mane natun lima soaneu tunu-hotu nai feta ndia.

¹⁰ Basa hata lala'en-na nanasadia basak soaneu feta Paskah boema, imam-mala ma kelompok hataholi Lewi-la esa-esak ho'i mamanak sama leo manek-ka paletan-na.

¹¹ Boema ala do'do bana soaneu feta Paskah; hataholi Lewi-la ali lou-na, ma basa imam-mala pisi bana sila-la daan-na leo mei tunu-hotuk lain neu.

¹² Kelompok teidale-bobongik manai sila-la, esan-na hapu bana esa neme bana fo neukose nanatunu-hotuk da'di leo tutunu-hohotu nanatunuk. No enok ndia, ala hapu fe tutunu-hohotuk tunga nakanenetek fo nanasulak nai Musa susula hoholo-lalanen dale.

¹³ Boema hataholi Lewi-la dala tutunu-hohotu Paskah ndia nai ha'i lain nandaa no nakanenetek-ka, ma ala nasu tutunu-hohotuk fo nanafe hehelik-kala nai ulek dale, basa soona, no lai-laik ala baba'e paan-na neu hataholi-la.

¹⁴ Basa ndia soona, besak-ka hataholi Lewi-la sadia sila baba'en-na, ma soaneu basa imam fo Harun tititi-nonosin-nala. Nana basa imam sila-la tao-no'i lakandoo losa le'odae ala tunu-hotu bana sila-la da'di leo tutunu-hohotu nanatunuk, ma ala tunu tutunu-hohotuk sila-la minan-na.

¹⁵ Basa manamakaminak lalelak sasanu-la leme teidale-bobongik Asaf-a nai leo Lewi dalek, lai mamanak fo Manek Dauk-ka naketu basan soaneu sila so. Hataholi sila-la na'den-nala nde ia: Asaf, Heman, ma Yedutun, nabi esa fo naue-nale'di soaneu manek-ka Basa manamanea lelesuina-la ta paluu la'oela sila mamanan-nala fa, nanahu ala hapu tunga feta Paskah nai sila mamanan-na nenik hataholi Lewi fe'ek-kala tulu-falis.

¹⁶ Nai faik ndia, ala tao-no'i basa hata lala'en fo Manek Yosia paletan soaneu feta Paskah, fo nai dalek hapu tutunu-hohotuk manai mei tunu-hotuk-ka boe.

¹⁷ Faik sanahulu hitu dalen-na, basa laun Israel-la lala'en-na lai ndia fo ala tunga feta Paskah ma Feta Loti Ta Pake Laluteik-ka.

¹⁸ Paskah leondiak-ka, ala ta tao litan so'on mulai neme Nabi Semuel-la tepo-lelen-na mai. Ta hapu manek esa boen neme mane-manek makahuluk-kala mai, ala tao hai feta Paskah sama leo ala taon

¹⁹ nai Yosia paleta neu teu kasanahulu falu-na, neme manek ndia mesak-kana sama-sama no imam-mala, hataholi Lewi-la, hataholi Yehuda-la ma Israel-la, boema laun Yerusalem-mala.

Yosia paletan-na mate'en-na

²⁰ Manek Yosia tao basa sila-la soaneu Manetualain Uman-na boema, Nekho fo manek Masir-ra nauli-nalanga solda'dun-nala soaneu latee-latati nai Karkemis, deka no Lee Efrat-a. Yosia sanga enok fo napanggenggen,

²¹ tehu Nekho haitua fe Yosia halak-ka nde ia nae, “Natee-natatik ia ta la'e o fo manek Yehuda fa! Au mai soaneu la'ban o fa, tehu soaneu la'ban au musu noong-ngala, de Manetualain nadenu au fo au taon no lai-laik. Manetualain nook au, hu ndia de boso mapanggengeen, te neukose Ana tao nakalulutuk o.”

²² Tehu Yosia natea nahele soaneu la'ban, ma ana ta nau tunga hata fo Manetualain nafa'dan tunga Manek Nekho-a fa. Yosia pake papake-ngganggao fe'ek fo boso lalelak-kana, boema ana masok leo natee-natatik dalek nai masadokek Megido.

²³ Kou latola Manek Yosia nai natee-natatuik ndia dalek. Boema ana pleta atan-nala fo ela loon kalua neme natee-natatik dale mai, nanahu nakahina belak.

²⁴ Ala ko'on neme kaletan lain mai de ala laliheok-kana leo kaleta fe'ek esa nai ndia lain neu, de basa boema loon leo Yerusalem neu. Maten nai naa de latoi-latonon nai mane-manek-kala late mamana-na. Basa Yehuda ma Yerusalem laun-na lala'en-na falu mamaten-na.

²⁵ Nabi Yeremia taon-na nakamee kii-makaleleuk esa soaneu Manek Yosia. Losa besak ia, nakameek ndia nanapakek nai Israel fo basa manamakameek-kala, nau inak do touk boe, ala paken nai fai nasanene'dak soaneu Yosia fai mamaten-na. Ala sulak nakameek ndia leo susula nakamee kii makaleleuk-ka dalek neu.

²⁶ Tutui fe'ek la'eneu Yosia, la'eneu susue-lalain neu Manetualain, ma ana tunga Manetualain hoholo-lalanen-nala,

²⁷ dede'a keke'eu-na, la'eneu basa tutuik lala'en fo la'eneu maso'dan-na neme makasososan-na losa mate'en-na, nanasula basak nai Mane-manek Israel ma Yehuda-la susula Tutuin dale so.