2TAWARIKH 33 - Susula Malalaok Hehelu Palak Ma Hehelu Beuk

Manasye manek Yehuda

¹ Manasye teun sanahulu dua nai lelek ana da'di maek Yehuda de ana paleta nai Yerusalem teuk limahulu lima dalen-na.

² Ana nasala-nasingo neu Manetualain, nanahu ana tunga ha'da-tatao mangalauk neme leoina fo Manetualain usihenis leme Kanaan mai, nai lelek Israel masok nusak ndia.

³ Mamana sosongo-tatangok fo aman Hizkia tao nakalulutuk-kasa, ana nafofo'a falik-kasa. Ana nafofo'a mei tunu-hotuk soaneu sene-do'ok neu Baal-la, ma ana tao lamatua daebafa Inak Asyera dodoki-dudulan, boema ana sene-do'ok neu nduuk-kala.

⁴ Manetualain nafa'da basa nae Yerusalem nde bee na mamana mamaso-kakasi soaneun losa dodoo na, tehu nai naa fo nai Manetualain Uman ndia, Manasye napadedeik mei tunu-hotuk soaneu lamatua daebafak-kala so.

⁵ Ana napadedeik mei tunu-hotuk soaneu sene-do'ok neu nduuk-kala nai Manetualain Uman ndia uma so'dak-kadua-nala.

⁶ Ana tunu-hotu anan-nala da'di leo tutunu-hohotu nanatunuk nai Bafak Hinom-ma. Boeo ana da'di hataholi malelak, manasiula-tongonok, manasuangi, ma noke natutu'duk neme dula dalek-kala mai. Ana nasala-nasingo nanseli neu Manetualain nalosa ana tao nafo'a Manetualain nasa-melun.

⁷ Ana pe'da dodoki-dudulak sosongo-tatangok leo Manetualain Uman dale neu, te se'kona la'eneu mamanak ndia, Manetualain nafa'da basa neu Dauk ma anamanen Salomo nae, “Au Umang manai Yerusalem ia, fo Au hele basan neme Israel leo kasanahulu dua-nala nusa-na mai so, nde bee na ana da'di mamanak fo Au aketun da'di leo mamanak makaluku-makatele neu Au losa dodoon-na.

⁸ Metema hataholi Israel-la tunga basa Au paletang-ngala, ma ala tunga hoholo-lalanek fo Au atang Musa fe neus-sala, soona neukose Au ta po'ilotak sila nanausihenik neme nusak fo Au fe basan neu sila bei-ba'i kain-nala fa.”

⁹ Manasye taon-na laun Yehuda-la tao sala-singok fo mangalau-na lena neme sala-singok leoina fo Manetualain usihenis leme Kanaan mai, nai lelek Manetualain anan-nala masok nusak ndia, tao-no'ik-ka.

Manasye tukatei-saledale

¹⁰ Manetualain ka'i Manasye no laun-nala, tehu ala ta nau lamanene fa.

¹¹ Hu ndia de Manetualain nadenu basa Asyur malanga solda'du matuaina-nala fo leu sapu-la Yehuda. Ala ho'u-la Manasye nenik ai kakaik, boema ala langen, de ala foo lenin leo Babel neu.

¹² Nai doi-doson-na dalek, besak-ka ana nakaloe-nakadae aoinan-na neu Manetualain ma ana hule-haladoi noke tutulu-fafalik neun.

¹³ Manetualain sipok Manasye huhule-haladoin, de Ana fe falik-kana eo Yerusalem neu fo ana paleta seluk. Hu kande manada'dik ndia de, Manasye da'di namahele nae Amak-ka nde bee na Manetualain.

¹⁴ Basa boema Manasye tao namadema papala nanadamak manai Kota Dauk-ka boboan dulu. Ana mulain neme mamanak esa nai bafak fo manadeka no oemata Gihon-na, boema nakandoo leo kii neu losa Lelesuina I'ak-ka, ma kota fo loken lae Ofel. Nai basa kota fo lanuu kota musu nai Yehuda, boeo ana pe'da malanga solda'du matuaina esa neu ndia.

¹⁵ Ana pe'da nadook leoina fe'ek-kala lamatua daebafan-nala dodoki-dudulan, boema sosongo-tatangok fo nanape'dak nai Manetualain Uman-na. Ana ofeheni mei tunu-hotu sosongo-tatangok fo manai pupukuk manai Manetualain Uman-na, ma nai mamana fe'e-fe'ek manai Yerusalem-mala. Neni basa sila-la leo kota deak neu, boema ana tapahenis.

¹⁶ Basa boema ana tao nahii mei tunu-hotuk fo mamana makaluku-makatele neu Manetualain-na, boema ana fe tutunu-hohotu mole-dame ma tutunu-hohotu makasi neu ndia. Nadenu basa hataholi Yehuda-la sene-do'ok neu Israel Manetualain.

¹⁷ Laun-na bei fe tutunu-hohotuk nai mamanak tutunu-hohotu fe'ek-kala, tehu tutunu-hohotuk sila-la nde bee na soaneu Manetualain.

Manasye paletan-na mate'en-na.

¹⁸ Tutui fe'ek la'eneu Manasye, ma la'eneu huhule-haladoin neu Manetualain-na, boema Manetualain hala-hehelun fo nabi-la landuku-lalosak-kana nenik Israel Manetualain na'den-na, basa-basas nanasula basak nai Mane-manek Israel-la susula Tutuin dale so.

¹⁹ Nai Nabi-la susula Tutuin dale boeo, nanasulak Manasye huhule-haladoin ma Manetualain natataan neu huhule-haladoik ndia, boema tutuik la'eneu sala-singok nai lelek ana beita tukatei-saledale fa, mamanak fo sene-do'ok neu sosongo-tatangok, ma ana taon-na lamatua daebafa Inak Asyera dodoki-dudulan-nala, ma sosongo-tatangok fo ana sene-do'ok neus-sala.

²⁰ Manasye maten boema latoin nai uma manek-ka. Anamanen Amon nggatin da'di manek.

Amon manek Yehuda

²¹ Amon teun duahulu dua, nai lelek ana da'di manek Yehuda, de ana paleta nai Yerusalem teuk dua dalen-na.

²² Ana nasala-nasingo neu Manetualain sama leo aman boe. Ana sene-do'ok neu sosongo-tatangok fo aman sene-do'ok-kala, ma ana fe tutunu-hohotuk neu sosongo-tatangok sila-la.

²³ Tehu, Amon ta sama leo aman fa, ana ta nakaloe-nakadae aoinan-na ma ana ta fali leo Manetualain mai fa; nakalenak ana nasala-nasingo lena neme aman mai.

²⁴ Amon hataholi mana'a ngga'din-nala tao nakabubua mangalauk fo la'ban-nana, de taolisan neme uma manek-ka.

²⁵ Tehu laun Yehuda taolisa basa manataonisa Manek Amon ndia, boema ala so'u anan Yosia da'di manek.