2TAWARIKH 32 - Susula Malalaok Hehelu Palak Ma Hehelu Beuk

Hataholi Asyur-ra fe nasanene'da mahelek neu Yerusalem

¹ Manek Hizkia tao-no'i basa dede'ak fo natu'du lilinekan neu Manetualain boema, Sanherib fo manek Asyur-ra sapu-na Yehuda. Ana nakahapi-na kota-kota fo lanuu kota musu de ana paleta solda'dun-nala fo ala loso lalas.

² Lelek Hizkia bubuluk nae Sanherib dodoo nae neu sapu-na Yerusalem boema,

^3-4 ana sama-sama no hataholi mana'a ngga'din-nala ma malanga solda'du matuainan-nala ho'i nakeketuk soaneu kenaketu mamana oe manai kota deak-kala, metema ala sanga losa Yerusalem. Ana fo'a hataholi makadotok nanseli fo leu kenaketu basa oemata fo manafaa leo kota deak neu.

⁵ Boema manek-ka tao natea-nahele kota nenik tao nahii kota papala nanadama-na, de napadedeik uma puni madema neu lain ma nafofo'a papala nanadama fe'ek nai kota deak. Fe'ek neme ndia mai, ana tao nahii kota musu fo napadedeik-kana nai dae madodouk lain nai kota Yerusalem palaak-ka boboan dulu. Ana nadenu tao tee ma sisili musu makadotok nanseli boe.

⁶ Ana so'u malanga solda'du matuaina-la fo lalanga basa touk manai kota dalek, de nadenus fo lakabubua nai mook manai lelesuina matan-na. Boema nafa'das nae,

⁷ “Matetea dalem-mala ma mahele leona; boso bii-mamata'u neu manek Asyur-ra, do neu solda'dun-nala. Ita be'ibalakain ba'ulena ndia be'ibalakain.

⁸ Ndia namahena hataholi daebafak-ka be'ibalakain, tehu ita tamahena neu ita Manetualain fo Ana tulu-fali ma natee-natati nggati ita.” Laun-na lamanene sila manen-na hala-kokolan ndia boema, lapalani.

⁹ Faik de'ubee makabuin-na, fo nai lelek manek Asyur-ra sama-sama no solda'dun-nala bei lai Lakhis, te ana haitua hataholi nadedenuk neu leo Hizkia ma Yehuda laun manai Yerusalem-ma soaneu nanduku-nalosak hala-heheluk-ka nde ia nae,

¹⁰ “Au Sanherib, fo manek Asyur-ra, au ahiik atane huu beek de, emi mapalani manseli soaneu leo mahele meme Yerusalem fo nananakahapi naak ndia so.

¹¹ Ade Hizkia mafa'da mae o Manetualain neukose soi-po'i emi neme ami koasa-ma mai do? Boso mamahele, nana ka'da Ana ke'dindiu emi. Neukose Ana po'ilotak emi mate moo la'a-ndoes-sa ma maa ma'dak-ka.

¹² Ndia de tao nakalulutuk mamana makaluku-makatele ma mei tunu-hotuk-kala soaneu Manetualain, boema nadenu hataholi Yehuda-la ma Yerusalem-mala sene-do'ok boema ala tunu boomenik nai ka'da mei tunu-hotuk esa.

¹³ Ade emi ta bubuluk, hata fo au ma au bei-ba'i kaing-ngala taon soaneu leoina fe'ek-kala fa do? Beita la'i esa fo leoina fe'ek-kala lamatua daebafa-nala soi-po'i leoinan neme manek Asyur-ra koasan-na mai fa!

¹⁴ Sila see-kande tao hai dede'ak ndia so? Hapu nai bee emi lamatua daebafa-ma hapu soi-po'i emi!

¹⁵ Boso o'ilotak emi manem ndia ke'dindiu ma tao namanggonggoa emi! Boso mamahele neun! Nana beita la'iesa fo su'di lamatua daebafak bee boe, napalani soi-po'i leoinan neme manek Asyur-ra koasan-na mai fa. Tao leo bee o emi lamatua daebafam ndia boeo, neukose ana ta hapu soi-po'i emi fa!”

¹⁶ Bei hapu dede'a-kokolak fe'ek fo Asyur hataholi nadedenun sila-la kokolak-kana soaneu lakamumulu-lakamamaek Manetualain ma Hizkia, fo Manetualain atan ndia.

¹⁷ Manek Asyur-ra boeo sulak susulak fo la'ban Manetualain fo hataholi Israel-la sene-do'ok-ka. Susulak lii-na nae leo ia, “Leoina fe'ek lala'en-na lamatua daebafa-na ta hapu soi-po'i leoinan neme au koasa-nga mai fa, leondiak boe Hizkia lamatua daebafan ndia ta hapu soi-po'i leoinan neme au koasa-nga mai fa.”

¹⁸ Asyur hataholi nadedenun sila-la basa-basas eki basa dede'ak sila-la nai dede'a Ibrani dalek fo lakabibiik ma tao lamale hataholi Yerusalem manai papala nanadamak kota lain-na, dalen-nala, fo ela ala hapu loso-la kota ndia no mudak.

¹⁹ Ala kokolak la'eneu Manetualain fo nanasene-do'ok nai Yerusalem sama-na leo la'eneu leoina fe'e-kala lamatua daebafa-nala, fo nde dodoki-dudulak fo hataholi daebafak-ka nde taon-nana.

²⁰ Boema Manek Hizkia ma Nabi Yesaya fo Amos anan-na hule-haladoi. Ala laloo bou-bou loke tutulu-fafalik neu Manetualain.

²¹ Boema Manetualain haitua ata nusa so'dak esa neu fo taonisa Asyur solda'dun-nala ma malanga solda'du matuaina-nala. Manek Asyur-ra fali ne'un leo nusa-na neu no bibii-mamaek nanseli. Nai faik esa, fo lelek bei nai lamatua daebafa-na uman dale, te anan de'ubee mai de ala taolisan nenik tafaina.

²² Enon-na leondiak, Manetualain soi-po'i Manek Hizkia ma laun Yerusalem-mala leme manek Sanherib-pa koasan-na mai ma, ma neme sila musu fe'e-fe'en-nala mai. Manetualain fes maso'da nee nee-lino lino-ka de ala ta hapu nakasese'bok neme nusaina manai sila titia-tatain-nala mai fa.

²³ Hataholi makadotok ala mai leo Yerusalem mai leni tutunu-hohotuk soaneu Manetualain ma bua palsen soaneu Hizkia, nalosa mulai neme ndia mai-a, leoina lala'en-na fe ha'da-holomata neun.

Hizkia he'di-laun ma koao-ndaeaon

²⁴ Bei nai lelek ndia boe, Manek Hizkia namahe'di-napalau. He'din ndia belak-ka, nalosa hihii nae maten. Ana hule-haladoi, boema Manetualain fen ta'du-tana nae neukose ana lea-hai.

²⁵ Tehu hu kande ana koao-ndaeao, de ana ta noke makasi neu lelea-hahaik fo Manetualain fen neu-na fa. Hu ndia de Manetualain namanasa Yehuda ma Yerusalem.

²⁶ Tehu mate'e-na Hizkia ma hataholi Yerusalem-mala lakaloe-lakadae aoina-nala, de nai Hizkia fai maso'da-na dalek, ana ta nakalala'ok huhukuk ndia fa.

Hizkia su'i-beten ma matua-mademan

²⁷ Manek Hizkia da'di hataholi kamasu'ik nanseli, de basa hataholi-la fe ha'da-holomata neun. Ana tao kama-kama fo ana pe'da hata-heton, fo nde: lilopilas, lilofulak, batu poemata, bumbu-bumbu, sisili musu, ma bua-lo'a kabelik fe'ek-nala.

²⁸ Nanuu uma pepe'da nana'a-nininuk soaneu dae-oen isi-minan sama leo: gandum, angol, ma mina setun; boeo nanuu lalae soaneu sapi-nala, ma bi'ilopo-nala fo makadotok nanseli sila.

²⁹ Fe'ek neme ndia mai, napadedeik kota makadotok boe. Su'i-betes fo Manetualain fen-nana, ana sasi kao-kao.

³⁰ Manek Hizkia ndia nde bakate'te oemata Gihon-na oen-na, de ana fe oen-na faa tunga besi oe-la lai dae dale leo kota Yerusalem-ma dalek neu. Basa hata lala'en fo Hizkia tao-no'in neni buna-boak.

³¹ Ma nai lelek hataholi nadedenuk-kala leme Babel mai fo latanen la'eneu ana lea-hai no kaiboik, Manetualain po'ilotak Hizkia nataa tunga dale hihii-nanau mesan-na, fo ela Manetualain hapu fola dalen-na.

Hizkia paletan-na mate'en-na

³² Tutui fe'ek la'eneu Manek Hizkia ma susue-lalain neu Manetualain nanasulak nai susula Wahyu neme Manetualaim mai Neu Nabi Yesaya fo Amos Ana-na susulan dale ma nai Mane-manek Yehuda ma Israel-la susula Tutuin dale.

³³ Mate Hizkia boema latoin nai ndanda'ek fo dae manai mane-manek-kala late mamana-na. Yehuda ma Yerusalem laun-nala lala'en-na fe ha'da-holomata matuaina neun, nai lelek maten-nana. Anamanen Manasye nggatin da'di manek.