2TAWARIKH 3 - Susula Malalaok Hehelu Palak Ma Hehelu Beuk

¹ Manek Dauk-ka naketu basa nae Manetualain Uman ndia muse nafofo'an nai Yerusalem nai Letek Moria fo nai Arauna hataholi Yebus-sa mamana popo'de gandum-ma. Manek Salomo mulai nafofo'a Manetualain Uman ndia

² nai bula kadua fo ana paleta neu teu kahaan-na.

³ Uman ndia nalun-na metel duahulu hitu ma loan-na metel sio.

⁴ Kama manai muka nulun-na sama no Uma ndia loan-na fo metel sio. Deman-ma metel limahulu haa. Nai kama ndia dalen-na, nananakadiditak nenik liliopilas isik.

⁵ Kama makasososak-ka nanapapalak nenik ai kaiou neulauk mesa-mesan ma nananakadiditak nenik lilopilas. Nai lilopilas fo nananakadiditak ndia, hapu ai palem-ma dodoki-dudulan ma namosina dulan-na.

⁶ Manek-ka balias uma ndia nenik batu poemata mana'ahiik mesa-mesan ma nenik lilopilas fo ana asa neme nusak Parwaim-ma mai.

⁷ Ana pake lilopilas sila la boe, soaneu nakadiditak neu Manetualain Uman ndia papala nanadaman-nala, balon-nala, lelesu-la ai betubalan-nala ma lelesu la. Papala nanadaman-nala boeo nanadoki-dulak nenik mahahae nusa so'dak kerub-pa dulan-na.

⁸ Kama manai dalek fo nanafoik na'de Kama Malalao-Malalafu Nanseli-a, nalun-na metel sio ma loan-na metel sio, sama no Manetualain Uman ndia loloan-na. Ana pake lilopilas ton duahulu soaneu nakadiditak neu Kama Malalao-Malalafuk Nanseli ndia papala nanadaman-nala

⁹ ma ana pake lilopilas gram natun lima hituhulu soaneu tao pakuk. Ta'dak manai lain-nala kaman-nala boeo, nananakadiditak nenik lilopilas.

^10-13 Manek-ka boeo nadenu basa hataholi manatao-no'ik sila-la fo ala tao mahahae nusa so'dak dua doki-dulan neme liti mai. Doki-dulak sila-la nananakadiditak nenik lilopilas de nanape'da nakadadalak lai Kama Malalao-Malalafuk Nanseli-a fo lasale leo lelesu-a. Mahahaek nusa so'dak sila-la esa soona nanuu li'dak dua fo lidak sila-la esa soona nalu-na metel dua senti dua. Lidak sila-la lakapela nalosa li'da pe'dan nala esa koi la'e esa nai kama tala'da ma li'da pe'dak esak-ka losa papala nanadamak manai kii konan-nala. Da'di li'dak sila-la ala betubala losa nalun-nala metel sio fo loloan-na sama no kama ndia loloan-na.

¹⁴ Ala tao la tema jendela manaluina neme tema abalutu ma tema fe'ek momo'dok, pilabalanggeok ma pilas soaneu Kama Malalao-Malalafuk Nanseli ndia. Tema jendela manaluina ndia nanabalias nenik mahahaek nusa so'dak ka dulan-na.

Dii matuaina dua nanataok neme liti mai

¹⁵ Manek-ka taon-na dii dua fo esa soona dedeman-na metel sanahulu lima senti lima, boema napadedeik-kasa neu Manetualain Uman-na matan-na. Dii sila-la lanuu dii langak fo dii langak sila-la esa soona dedeman-na metel dua senti dua.

¹⁶ Dii sila-la poi lain-nala nanabalias nenik liti, fo nalupa namosina nananala'ek nenik dalima boak natun esa.

¹⁷ Dii sila-la lapadedeik-kasa lai lelesu masok leo Manetualain Uman-na boboan kii ma boboan kona; manai boboan konan-na, nanafoik na'de Yakhin, ma manai boboan kiin-na nanafoik na'de Boas.