2TAWARIKH 27 - Susula Malalaok Hehelu Palak Ma Hehelu Beuk

Yotam manek Yehuda

¹ Yotam da'di manek nai lelek teun duahulu lima, de ana paleta nai Yerusalem, teuk sanahulu nee dalen-na. Inan nde Yerusa fo Zadok anan-na.

² Yotam nandaa no Manetualain dalen-na, sama leo aman Uzia. Ka'da ana ta hotu boomenik nai Manetualain uman sama leo hata fo aman tao-ka.

³ Yotam nde nafofo'a Lelesuina Kii nai Manetualain Uman, ma ana tao natea-nahele papala nanadamak Yerusalem-ma nai mamanak fo loken lae Ofel.

⁴ Ana napadedeik kota-kota-la nai Yehuda letelepan-na, ma kota musu-la boema uma puni madema-la nai nula-la dalek.

⁵ Ana natee-natati no manek Amon-na de ana sengin sama-sama no solda'dun-nala, boema nakaseti hataholi Amon-nala fo ala bae bea. Tunga teuk fo nai teuk telu dalen-na tunga-tunga, ala muse bae lilofulak kilo lifun telu natun haa, gandum matak dua, fo mata esa soona, ton lifun esa.

⁶ Yotam koasan-na boetai namatuak-ka nanahu ana lilineka ma ana tunga neu Manetualain.

⁷ Manada'di fe'e-fe'ek-kala nai Yotam paletan-na dalek, natee-natatik-kala ma keke'din-nala, basa-basan nanasula basak nai Mane-manek Israel ma Yehuda-la susula Tutuin dale so.

⁸ Yotam teun duahulu lima nai lelek ana da'di manek, de ana paleta nai Yerusalem teuk sanahulu nee dalen-na.

⁹ Maten de latoin nai Kota Dauk-ka, boema anamanen Ahas nggatin da'di manek.