2TAWARIKH 26 - Susula Malalaok Hehelu Palak Ma Hehelu Beuk

Uzia manek Yehuda

^1-3 Mate basa Amazia boema, basa laun Yehuda lala'en-na hele anamanen-na da'di manek. Nai lelek ndia teun sanahulu nee. Inan na'de Yekholya, fo ina Yerusalem. Uzia paleta nai Yerusalem teuk limahulu dua dalen-na. Ndia nde natona ma nafofo'a falik kota Elot-ta.

⁴ Sama leo aman, de Uzia boeo tao hata fo nandaa no Manetualain dalen-na.

⁵ Manamanoli-mafa'da anan-nala so'on-na nde Zakharia. Nai lelek Zakharia bei naso'da, Uzia sene-do'ok neu Manetualain no lilinekak, nalosa Manetualain ba'e-palan.

⁶ Uzia natee-natati la'ban hataholi Filistin-nala. Ana tao nakalulutuk kota Gat, Yabne, ma Asdod papala nanadaman-nala, boema napadedeik kota-kota fo lanuu kota musu deka no Asdod ma nusa fe'ek-kala nai Filistin.

⁷ Manetualain tulu-falin de ana sengi hataholi Filistin-nala, ma hataholi Arab fo manaleo lai Guur-Baal boema hataholi Meunim-mala.

⁸ Hataholi Amon-nala bae bea leo Uzia neu. Koasan-na boetai namatua-ka nalosa na'de-na nananita-nalelak losa Masir.

⁹ Soaneu tao natea-nahele kota Yerusalem-ma, de Uzia napadedeik uma puni madema nai Lelesuina Bu'uk-ka, nai Lelesuina Bafak-ka ma nai papala nanadamak-kala bu'u-nala.

¹⁰ Boeo ana napadedeik uma puni madema makota musu-kala lai moo maloa, ma ana kali-na oedolu ba'uk-ka, nanahu bana-manun makadotok nanseli, nau manai lete lepak-kala do manai masadokek manai boboak muli. Hu kande ana tao dalen-na neu tina-osi, de ana pake hataholi manamaue-male'di makadotok, fo ala tao osi angol nai letelepa-kala ma foi-fala dae maoe-maisik-kala.

¹¹ Uzia solda'dun makadotok nanseli fo laheheleaon tataasesa soaneu latee-latati. Solda'du sila-la bubua-bubuak-kala fo manek-ka hataholi manasulak kadua-nala fo nde Yeiel ma Maaseya ala sulak-kasa fo manek-ka lima-ein esa na'de Hananya nde nauli-nalanga hataholi manasulak susula kaduak sila-la.

^12-13 Solda'du sila-la lala'en-na lifun natun telu ma hitu natun lima, fo malanga solda'du matuaina lifun dua natun nee lauli-lalangas. Solda'du sila-la basa-basas ao kahelek ma palani tatibatu mesa-mesan. Latee-latati fali manek-ka fo ala sengi musu-a.

¹⁴ Uzia tao natea-nahele solda'dun sila-la nenik sisili musu, tee-dongi ti'ilanga bai, ba'du besik, kokouk ma kokou isik boema batu pipiluk.

¹⁵ Hataholi malelaina-la lai Yerusalem, ala tao lalelak sisilo fo bisa silo nenik kokouisik ma batu matuaina-la leme uma puni madema-la dalek mai, ma neme kota papala nanadaman-nala bu'u-bu'un-nala mai. Uzia nananita-nalelak mamanak lala'en-na, ma ana da'di manakoasa matuaina nanahu Manetualain tutulu-fafalin ba'un-na seli soaneun.

Uzia nanahukuk nanahu koao-ndaeaon

¹⁶ Lelek manek Uzia natea-nahele boema, ana da'di manakoao-ndaeaok, de koao-ndaeaon ndia nde tao nakalulutuk-kana. Ana la'o lena Manetualain paletan-na, nanahu neu leo Manetualain Uman dale neu fo ana hotu boomenik nai mei tunu-hotu boomenik lain.

¹⁷ Tehu Imam Azarya noo imam fe'ek faluhulu mabe'i-balakaik ma manamapalanik mesa-mesan de ala tungan,

¹⁸ soaneu ala lena-la'ban tatao-nono'in ndia. Lafa'da lae, “Ama Manek Fo Mandela-masa'ak! Ama Manek ta nanuu hak hotu boomenik soaneu Manetualain fa. Imam-imam fo Harun tititi-nonosin bela-ba'un ndia, nana sila nde nanahele hehelik soaneu bela-ba'uk ndia. Ela leo bee na Ama Manek la'oela mamana malalao-malalafuk ia.! Ama Manek la'ban basa Manetualain so, de Ama Manek ta hapu ha'da-holomatan so'on.”

¹⁹ Nai lelek ndia, Uzia bei napadeik deka no mei tunu-hotu boomenik-ka nai Manetualain Uman no mamana hohotu boomenik-ka nai liman-na. Ana namanasa imam-imam sila-la de no kaiboboianak he'di lou mangalauk-ka da'di nai dedein-na.

²⁰ Azarya ma imam-imam fe'ek-kala meten no nggenggengek nanseli, boema lakasetin fo ela ana la'oela Manetualain Uman-na. Ana kalua no lai-laik nanahu Manetualain huku basan so.

²¹ Losa Manek Uzia maten te, he'di-laun ndia ta lea-hai makandondook fa. Ala fen leo pasi fe'e nai uma esa dalek, ma ala ta fen loak masok leo Manetualain Uman dale neu so'on. Ala fen hahae neme bela-ba'un mai, de anamanen Yotam paleta laun-na da'di leo limaboa konan-na.

²² Tutui fe'ek la'eneu Manek Uzia paletan-na, Nabi Yesaya fo Amos anan-na sulak basan so.

²³ Lelek Uzia maten boema, latoin nai dae fo deka no mane-manek-kala late mamanan-na, tehu ta nai late mamanak ndia fa, nana ana hapu he'di lou mangalauk. Anamanen Yotam nggatin da'di manek.