2TAWARIKH 25 - Susula Malalaok Hehelu Palak Ma Hehelu Beuk

Amazia manek Yehuda

¹ Amazia da'di manek nai lelek teun duahulu lima, de ana paleta nai Yerusalem teuk duahulu sio dalen-na. Inan nde Yoadan neme Yerusalem mai.

² Amazia tao hata fo nandaa no Manetualain dalen-na, tehu ana tao no dale bibia-seselik.

³ No lai-laik nangatutuu-na natea-nahele tutik-ka ana hukunisa hataholi mana'a ngga'din fo manataolisa aman.

⁴ Tehu ana ta taonisa hataholi mana'a ngga'di sila-la anan-nala fa, nanahu ana tunga Manetualain paletan-na nai Musa Susulan dale fo liin-na nae, “Boso hukumisa ina-amak nanahu tatao-nono'i managalauk fo sila anan-nala tao-no'ik-ka, boema boso hukumisa ni'iana-la nanahu tatao-nono'i mangalauk fo sila ina-aman tao-no'ik-ka. Bole hukunisa ka'da hataholi see fo hu kande ndia mesak-kana tatao-nono'i mangalaun-na.”

Natee-natati la'ban Edom

⁵ Manek Amazia nakabubua basa leo Yehuda ma leo Benyamin hataholin-nala, boema nadenus fo lapadeik tunga esa-esak teidale-bobongin, fo malanga solda'du ka lifuk-ka ma malanga solda'du ka natuk-ka lauli-lalangas. Basa boema ana hele hataholi fo teun duahulu leo lain neu, fo labe'i natee-natati-ka ma ala pake lalelak tee-dongi ma sisili musu. Hataholi sila dede'un-na lifun natun telu.

⁶ Fe'ek neme ndia mai boe, ana seba solda'du Israel lifun natun esa, de ana bae lilofulak fafa'kama kilo lifun telu natun haa.

⁷ Tehu nabi esa mai leo manek-ka mai de nae, “Boso pake solda'du Israel sila-la, nana Manetualain ta tulu-fali hataholi Israel fo leme Nusak Kii ndia mai.

⁸ Tehu metema Ama Manek-ka'da pakes soona, neukose Manetualain po'ilotak musu-a sengi Ama Manek leomae Ama Manek solda'dun-nala mabe'i-balakaik ma palani. Nana ka'da Manetualain mesak-kana nde nanuu koasa fe sesengik do kakalak.”

⁹ Amazia natane nae, Tehu tao leo beek no basa lilofulak fo au fe basan neu sila so? Nabi ndia nataa nae, “Manetualain bisa fe falik Ama Manek lena neme ndia mai!”

¹⁰ Hu ndia de Amazia nadenu falik solda'du nanabaek sila-la, de nadenus fali leus leo sila nusan-na leu. Ala fali le'us boe, tehu no nasak nanseli.

¹¹ Amazia napalalani ao de noo solda'dun-nala leo Bafak Asin leu. Nai naa, latee-latati boema ala taolisa solda'du Edom lifun sanahulu.

¹² Ala foo leni fe'ek lifun sanahulu. Loos leo lete batu manai kota Sela poin-na neu, boema ala ko'o las de ala tapas leo dae leu nalosa mates.

¹³ Ndia te Amazia nadenu falik solda'du Israel-la, ma ana ta fes loak latee-latati fa, ala sapu-la Yehuda kota-kotan manai Samaria ma Bet-Horon tala'da so. Ala taolisa hataholi lifun telu ma ala kalo leni hata-heto makadotok.

¹⁴ Ala sengi basa solda'du Edom-mala boema, Amazia fali no neni hataholi Edom-mala dodoki-dudula sosongo-tatangon, de ana pe'dan nai Yehuda. Boema ana tunu fe dodoki-dudulak sila-la boomenik, de ana sene-do'ok neus.

¹⁵ Tatao-nono'in ndia taon-na Manetualain namanasa nanseli. Ana nadenu nabi esa neu leo Amazia neu. Nabi ndia nafa'da nae, “Tao le'e de Ama Manek sene-do'ok neu leoina fe'ek lamatua daebafan fo ana ta hapu soi-tefa-na leoinan neme Ama Manek koasan-na mai fa?”

¹⁶ Amazia nae, “Denge-denge! Metema ta soona, ami taomisa o! Beita la'iesa fo ami so'u o da'di manek-ka manamanoli-mafa'dan fa!” Boema nabi ndia denge-denge, tehu ana bei hapu loak faa anak kokolak nae, “Besak ia au bubuluk ae Manetualain naketu basa soaneu tao namate-namopo Ama Manek, nanahu Ama Manek tatao-nono'in ndia, ma hu kande Ama Manek ta taoafik neu au nanoli-nafa'dang fa.”

Yehuda natee-natati la'ban Israel

¹⁷ Amazia, fo manek Yehuda no basa manamanoli-mafa'dan-nala tao nakabubua makahatuk fo la'ban Israel. Ana haitua hataholi neu leo Yoas manek Israel-la, fo Yoahas anan-na, Yehu upun-na, soaneu noke natee-natatik non.

¹⁸ Tehu Manek Yoas-sa haitua natataak-ka nde ia nae, “La'iesa boema, makatema dila-nggauk manai letelepak Libanon-na haitua fe ai kaiou hala nonokek-ka nde ia nae, ‘Hai, ai kaiou, fe anafe'o-ma neu anang-nga fo ana da'di saoinan-na.’ Tehu basa boema bana fuik esa la'ok tunga ndia, de ana heheta-aa'i makatema dila-nggauk ndia.

¹⁹ O, Amazia, o kokolak dede'a me'i-afek mae o sengi hataholi Edom-mala so, tehu malole lenak o mahele ka'da uma. Sosoak hata o sanga ka'da dede'ak fo neukose o tao soe o aoina-ma ma o laum-mala?”

²⁰ Tehu Amazia, fo manek Yehuda ta taoafik neu Yoas fo manek Israel-la hala-kokolan fa. Ma memak Manetualain nau fo ela Amazia kala, nanahu ana sene-do'ok hataholi Edom-mala dodoki-dudula sosongo-tatangon so.

²¹ Hu ndia de Yoas no ana boa-nala leu leo Bet-Semes leu de latee-latati loo Amazia nai naa.

²² Solda'du Yehuda-la kala, de basa solda'dun-nala esa-esak nalai fali leo uman neu.

²³ Yoas ho'un-na Amazia de noon leo Yerusalem neu, boema ana tao nakalulutuk kota ndia papala nanadama-na, nanalun-na fafa'kama metel natun dua, mulai neme Lelesuina Efraim-ma losa Lelesuina Bu'uk-ka.

²⁴ Basa lilopilas ma lilofulak boema basa bua-lo'as manai Manetualain Uman ma bua-lo'as fo Obed-Edom nanea-kala, boeo basa uma manek-ka hata-heton, sama-sama loo hataholi nanafook de'ubee, Yoas kalo neni la'iesak-kasa leo Samaria neu.

²⁵ Mate basa Yoas fo manek Israel-la, te Amazia, fo manek Yehuda bei naso'da seluk teuk sanahulu lima.

^26-28 Lelek Amazia la'oela Manetualain boema hataholi-a tao nakabubua makahatuk fo la'ban-nana nai Yerusalem. Hu ndia de nalai leo kota Lakhis neu, tehu musu noon-nala usi tungan leo naa leu de taolisan. Ala fua popolan-na nenik ndala leo Yerusalem neu, boema latoin nai mane-manek manai Kota Dauk-ka late mamana-na. Tutui fe'ek la'eneu Manek Amazia neme makasososan-na losa paletan-na mate'e-na, nanasulak nai Mane-manek Yehuda-la ma Israel susula Tutuin dale.