2TAWARIKH 21 - Susula Malalaok Hehelu Palak Ma Hehelu Beuk

¹ Mate Yosafat de latoin nai mane-manek manai Kota Dauk-ka late mamana-na. Anamanen Yehoram nggatin da'di manek.

Yehoram manek Yehuda

² Yosafat anamanen Yehoram, fo manek Yehuda, tolanoo toun nee, fo nde: Azarya, Yehiel, Zakharia, Azariahu, Mikhail ma Sefaca.

³ Ala hapu lilopilas, lilofulak, ma bua-lo'a kabelik fe'e-fe'ek makadotok neme sila aman mai, ma ana fe esan-na kota esa nanuu kota musu nai Yehuda boe. Tehu hu kande Yehoram ana uluk, de Yosafat natu'du ndia nde da'di manek.

⁴ Lelek Yehoram name'da-nana ndia nangatutuun da'di leo manek-ka natea-nahele so, boema nadenu taonisa la'iesak tolanoon-nala, ma manaho'u paleta mademaina de'ubee.

⁵ Yehoram da'di manek nai lelek teun teluhulu dua, de ana paleta nai Yerusalem teuk falu dalen-na.

⁶ Ana ta'bu tunga Manek Ahab-pa ma mane-manek Israel fe'e-fe'ek-kala so'dan-nala eno-dalan, nanahu ana saon-na Ahab anafe'on esa. Ana nasala-nasingo neu Manetualain,

⁷ tehu Manetualain ta nau tao namate-namopo manek fo neme Dauk tititi-nonosin-na mai fa, nanahu Ana helu-balataa basa nae Dauk tititi-nonosin neukose ala paleta lahele.

⁸ Nai Yehoram paletan-na dalek, Edom lena-la'ban Yehuda, de napadedeik fe'e nusa-na

⁹ Hu ndia de, Yehoram ma basa malanga solda'du matuainan-nala kalua loo sila kaleta musu-nala boema ala sapu-la Edom. Solda'du edom-mala okofeo-lan, tehu le'odae boema ala tola leni okofefeok ndia, de lalai.

¹⁰ Mulai neme lelek ndia mai, Edom ta nakatele neu Yehuda so'on. Nai tepo-lelek ndia boe, kota Libna boeo lena-la'ban. Basa sila-la ala da'di nanahu Yehoram la'oela Manetualain fo bei-ba'i kain sene-do'ok-ka.

¹¹ Lena-lenak, ana napadedeik mamana sosongo-tatangok nai Yehuda nggolo letelepa-na, de ana taon-na Yehuda ma Yerusalem laun-nala lasala-lasingo neu Manetualain.

¹² Boema Yehoram hapu susulak esa fo Nabi Elia nde sulak-kana nai lelek ana bei naso'da. Susulak ndia liin-na nae leo ia, “Manetualain fo Dauk sene-do'ok-ka, huku Ama Manek nana Ama Manek ta tunga Ama Manek aman ma ba'in ei tata'bu-na fa.

¹³ Nasafali-na, Ama Manek naso'da sama leo Israel manen-nala, ma Ama Manek taom-ma Yehuda ma Yerusalem laun-nala ta lilineka neu Manetualain fa. Ama Manek tao sama leo Manek Ahab-pa ma ngganggatin-nala. Nakalenak Ama Manek taonisa Ama Manek tolanoo-nala, te se'kona sila nde malole lena neme Ama Manek mai.

¹⁴ Huhuku-dodoki mabelaina neme Manetualain mai, fo neukose ana tuni-ndeni-na laun-na, Ama Manek ana-nala, saoina-nala, ma Ana tao namate-namopo basa Ama Manek hata-heton lala'en-na.

¹⁵ Ama Manek boeo, neukose hapu he'di ngganggaek fo tunga faik boetai namabela!”

¹⁶ Nai lelek ndia hataholi Filistin ma hataholi Arab leo deka nai hataholi Sudan-nala nggolon-na nai tasi su'un-na. Manetualain nakababale hataholi sila dalen-nala soaneu leu latee-latati loo Yehoram.

¹⁷ Ala sapu-la Yehuda, de ala kalo manek-ka uma manen-na, boema loo la'iesak Yehoram sao anan da'di leo hataholi nanafook, ela ka'da Ahazia fo anamane mulin-na.

¹⁸ Basa manada'dik ndia da'di basa boema, Manetualain huku Yehoram nenik he'di ngganggaek de ana ta hapu lea-hai fa.

¹⁹ Hihii nae teuk dua dalen-na, he'dis ndia boetai namabelak-ka, de losa mate'en-na ana mate no doidosok nanseli. Laun-na ta lananau ha'i kaa manafofolok da'di leo ta'du-tana manafaluk sama leo ala taon soaneu bei-ba'i kain fa.

²⁰ Ta hapu hataholi esa boen nasasale dale mamaten-na fa. Latoin nai Kota Dauk-ka, tehu ta nai mane-manek-kala late mamana-na fa. Lelek Yehoram teun teluhulu dua boema, ana da'di manek, de ana paleta nai Yerusalem teuk falu dalen-na.