2TAWARIKH 20 - Susula Malalaok Hehelu Palak Ma Hehelu Beuk

Natee-natati la'ban Edom

¹ Teuk de'ubee makabuin-na boema Moab ma Amon solda'dun-nala sama-sama loo solda'du Meunim-mala sapu-la Yehuda.

² Boema hataholi neni halak ia leo Manek Yosafat-ta neu, nae, “Hataholi Edom makadotok nanseli ala mai leme Tasi Mates-sa selik mai fo sapu-la Ama Manek. Ala langatuu-la Hazezon-Tamar so.” (Hazezon-Tamar nde bee na En-Gedi na'den esa nde ndia.)

³ Yosafat bii-namata'u nanseli, boema ana hule-haladoi noke tutulu-fafalik neme Manetualain mai. Bas boema ana fe paleta fo ela basa laun-na lala'en-na okaaon-nala.

⁴ Hataholi-la leme basa kota manai Yehuda leu leo Yerusalem leu soaneu loke tutulu-fafalik neu Manetualain.

⁵ Sama-sama loo Yerusalem laun-nala lakabubua lai uma so'da beu-ka nai Manetualain Uman. Manek Yosafat-ta napadeik neu hataholi sila-la matan-nala,

⁶ de ana hule-haladoi no napane'e hala-na nae, “Ou Amak, fo ami bei-ba'i kaim-mala Manetualain-na! O Manetualain manai nusa so'dak-ka, ma manapaleta basa leoina lala'en-na nai daebafak-ka. O manakoasa ma mabe'i-balakai; ta hapu hataholi esa boen fo nabe'i la'ban O.

⁷ O nde ami Amam Manetualaim. Lelek O anam-mala, fo leoina Israel-la, mai leo nusak ia mai, O usiheni hataholi-hataholi fo nai lelek ndia ala leo leme ia. Boema O fe nusak ia neu O tia-laim Abraham tititi-nonosin, fo da'di sila dae-oen losa dodoon-na.

⁸ Ala leo lai a, de lapadedeik-la uma esa da'di mamana sene-do'ok neu O. Ala bubuluk

⁹ lae metema sila hapu huhuku-dodokik nanahu sila sala-singo-nala, ma natee-natatik, he'di-laus, do la'andoes tuni-ndeni nalas soona, ala mai neu O fo lapadeik leu uma mamaso-kasasi ia matan-na. Nai sila toto'a-sosota-na dalek, sila hapu hule-haladoi neu O, ma neukose O mamanene ma O tulu-falis.

¹⁰ Besak ia leoina Amon, Moab ma Edom sapu-la ami. Lelek ami bei-ba'i kaim leme Masir mai, O ta fes loak langatuu-la leoina sila-la nusan-na fa. Boema ala la'ok tunga eno dook de ala ta tao lakalulutuk leoina Amon, Moab ma Edom sila-la fa.

¹¹ Besak ia, leoina sila-la tatao-nono'in leoiak soaneu ami. Ala nau usiheni ami neme nusak fo O fen neu ami.

¹² O nde ami Amam Manetualaim-ma! Huku-doki hataholi sila leona, nanahu ami balakaim ta soaneu masasalematak moo solda'du makadotok fo ala nau sapu-la ami. Ami ta bubuluk muse tao beek-ka fa, hu ndia de ami mai moke tutulu-fafalik neu O.”

¹³ Boema basa touk Yehuda-la lala'en-na sama-sama loo sila sao-ana-nala lapadeik lai Manetualain Uman.

¹⁴ Nai hataholi makadotok sila-la tala'daheon, hapu hataholi Lewi esa na'de Yahaziel. Aman nde Zakharia fo ana da'di neme teidale-bobongik Asaf-fa nai Benaya, Yeiel, Matanya, tititi-nonosin dale. Nai hatematak ndia, Manetualain Duladalen-na koasan-na Yahaziel,

¹⁵ de nafa'da nae, “Ama Manek fo Mandela-masa'ak, boema tolano-tolanoong-ngala lemin. Manetualain nafa'da nae ta bole ketu emi namahehena-ma do bii-mamata'u masasalematak moo solda'du makadotok sila-la. Nana manatee-matati-ka ta nde emi fa, te Manetualain dei.

¹⁶ Balahaa, fo nai lelek ala kae tunga eno kakaek manai Zis-sa soona, sapu malas leona. Neukose emi masasalematak moos nai bafak-ka pe'dan-na nai moo maloa uluk fo deka no Yeruel.

¹⁷ Emi ta paluu matee-matati nai natee-natatik ia dalek fa. Meu leo mamanak fo nananafa'da basak neu emi so, fo mahani ka'da ndia. Neukose emi mita Manetualain fe emi sengi. Hai laun Yehuda ma Yerusalem-mala lemin, dalem-mala boso ba'ihana do bii-mamata'u. Ka'da masok leo natee-natatik ndia dalek meu, te neukose Manetualain tulu-fali emi!”

¹⁸ Boema Manek Yosafat-ta nakaluku-nakatele. Basa laun-na lala'en-na boeo tungan fo lakaluku-lakatele neu Manetualain.

¹⁹ Boema hataholi Lewi-la leme Kehat ma Korah teidale-bobongin mai fo'a lapadeik, de ala eeki-latadale koa-kio Amak fo Israel Manetualain-na.

²⁰ Balahaa fafaianan-na, laun-na kalua de leu leo moo maloa deka no Tekoa. Lelek ala sanga la'o boema, Yosafat fes hala-heheluk-ka nde ia nae, “Yehuda ma Yerusalem laun-nala lemin! Mamahele neu emi Manetualain leona, neukose emi makatatakak mabe'i. Sipok-ma nanoli-nafa'dak neme emi nabi-mala mai, soona neukose emi hapu buna-boan!”

²¹ Nakokolaok basa no laun-na boema, manek-ka nadenu manamakameek-kala pake papake-ngganggaok matak esa fo biasan-na ala paken nai agama feta hehelik-nala dalek. Manamakameek sila-la muse lapadeik lakadadalak no malole-na nai solda'du-la dalak manai uluk-ka, boema lakamee, “Koa-kio Manetualain leona! Susue-lalain manaketu basa taak losa dodoon-na!”

²² Nai lelek manamakameek sila-la eeki-latadale koa-kio boema, Manetualain fe tasibu da'di nai solda'du musu fo bei latee-latati, tala'daheon.

²³ Amon ma Moab solda'dun-nala sapu-la Edom solda'dun-nala de ala tao lakalulutuk la'iesa-kasa. Basa boema lasafali mai de esa sese'do lena neu esa.

²⁴ Lelek solda'du Yehuda-la losa uma naneak puni madema manai moo maloa de ala mete besa-besa loo mamana natee-natati-ka te, lita musu noo-ka popolan-nala lalefule'ak lai dae lain. Ta hapu hataholi esa boen neme solda'du musu sila-la, naso'da fa.

²⁵ Boema Yosafat sama-sama no anaboa-nala leu kalo musu bua-lo'a-nala. Ala hapu bana-manu, tafa-sisilo, bua papakek, ma bua-lo'a kabelik fe'ek makadotok. Ala hehele lakabubua bua-lo'as sila-la faik telu dalen-na, te bua-lo'a fe'ek bei makadotok, nalosa ka'da ala la'oelas.

²⁶ Neu fai ka haa-na boema, sila basa-basas lakabubua lai Bafak Kokoa-kikiok-ka de ala koa-kio Manetualain nana basa hata fo Ana taon. Hu ndia de bafak ndia loken lae, “Kokoa-kikiok”.

²⁷ Boema Yosafat nauli-nalanga la'iesak solda'du-la de ala fali leo Yerusalem leu no namahokok nanahu Manetualain sengi sila musu-na.

²⁸ Lelek ala losa kota boema, ala la'ok lakadadalak leo Manetualain Uman leu de kacapi ma trompet-ta lii-na la'ok nos.

²⁹ Basa nusaina fe'ek-kala ala bii-lamata'u nai lelek lamanene tao leo beek de Manetualain sengi Israel musu-nala.

³⁰ Hu ndia de Yosafat paleta no tetu-temak, ma mole-dame nai basa nusak-ka lala'en-na.

Yosafat paletan-na mate'e-na

³¹ Yosafat da'di manek Yehuda nai lelek teun teluhulu lima, ma ana paleta nai Yerusalem teuk duahulu lima dalen-na. Inan nde Azuba fo Silhi anan-na.

³² Yosafat sama leo aman Asa boe, de ana tao hata fo malole tunga Manetualain mata memete-na.

³³ Tehu ana ta tao nakalulutuk mamana sosongo-tatangok-kala fa. Laun-na sene-do'ok neu sila bei-ba'i kain Manetualain-na beita no dale katematuak boen.

³⁴ Tutui fe'ek la'eneu Yosafat, neme paleta makasososan-na losa mate'e-na, nanasulak nai Yehu fo Hanani anan-na susula tutuin dale, de basa boema, ala sulak-kana leo Mane-manek Israel-la susula Tutuin dale neu.

³⁵ Nai faik esa boema, Yosafat fo manek Yehuda tao tia-laik no Ahazia, manek Israel fo manatao tatao-nono'i managalauk makadotok-ka.

³⁶ Ala tao ofak nai namo see-seek manai Ezion-Geber-a fo ala sa'e leo Tarsis leu.

³⁷ Tehu Nabi Eliezer fo Dodawa neme kota Maresa anan-na, fe Yosafat nasanene'dak nae, “Hu kande Ama Manek tao tia-laik moo Ahazia, de neukose Manetualain tao nakalulutuk Ama Manek ue-osan.” Boema ana taon-na ofak-kala heanakalulutuk-kasa, de nalosa ala ta hapu la'o makandondook fa.