2TAWARIKH 2 - Susula Malalaok Hehelu Palak Ma Hehelu Beuk

Sadia ai batu soaneu Manetualain Uman-na nafofo'an-na

¹ Manek Salomo naketu basa soaneu nafofo'a Manetualain Uman-na ma ndia uma manen-na.

² Hu ndia de, ana nadenu hataholi lifun hituhulu soaneu so'u uma ai batun, hataholi lifun faluhulu soaneu pa'a batu nai letelepak-ka ma mandoo lifun telu natun nee soaneu lanea tatao-nono'ik ndia.

³ Salomo haitua halak ia leo Hiram fo manek Tirus-sa nae, “Ela leo been-na Tuan dangan sama-sama moo au sama leo moo au amang Dauk. Tuan mase'o basa fen ai kaiou Libanon soaneu nafofo'a ndia uma manen-na.

⁴ Besak ia, au nau afofo'a uma nakalupu-nakatela hehelik esa soaneu fe ha'da-holomata neu au Manetualain. Nai uma ndia, au ma au laung-ngala neukose sene-do'ok neun nenik tunu boomenik kaboomenik, boema tunu-hotu fen loti tunga faik. Nai uma ndia boe, neukose ami tunu-hotu tutunu-hohotuk nanatunuk tunga-tunga fafain-na ma le'odaen-na nai fai Sabat-ta, fai malole Bula Beuk-ka ma fai hehelik fe'ek-kala soaneu fe ha'da-holomata neu ami Amam Manetualaim. Nana, Ana paleta basa fo ela hataholi Israel-la tao dede'ak ndia losa dodoo na.

⁵ Au ahiik fo ela Manetualain Uman fo neukose au afofo'an ndia, nalupa uma nanakoa-nanakiok, nana ami Amam Manetualaim nanakoa-nanakiok lena neme su'di lamatua daebafak bee mai boe.

⁶ Tehu tunga ndoon-na ta hapu hataholi esa boen hapu napadedeik uma ba'eneu Manetualain nana basa daebafa maloa lala'en-na ta matua soaneu da'di mamana leleon-na fa. Da'di, Manetualain Uman fo hapu apapdedeik-kana ndia, bole-bole ana da'di ka'da mamanak soaneu tunu boomenik ba'eneu Manetualain!

⁷ Hu ndia de, ela leo been-na Tuan haitua fe ami hataholi manadoki-dulak malelak esa ma ana hapu tutu nalelak lilopilas, lilofulak, liti, besi, boeo ana tenu nalelak tema momo'dok, pilabalanggeok ma pilas. Neukose ana tao-no'i sama-sama no hataholi malelak manai Yehuda ma Yerusalem fo au amang Dauk hele basas so.

⁸ Au bubuluk ae basa manalo'o ai manai Tuan nusan-na, ala lo'o lalelak ai, hu ndia de ela leo been-na Tuan haitua fe au ai kaiou mata-matak-kala ma ai kainituk neme Libanon mai. Neukose au adenu au hataholing-ngala fo ala tulu-fali Tuan hataholin-nala,

⁹ fo ela ala sadia ai makadotok. Nana Manetualain Uman fo au sanga afofo'an ndia, muse matuaina ma nanakoa-nanakiok.

¹⁰ Soaneu Tuan hataholin sila-la tua-lepan soona, neukose au haitua fe Tuan gandum matak dua, fo matak esa soona, ton lifun dua, angol litel lifun natun haa ma mina setun litel lifun natun haa.”

¹¹ Da'di leo babalak soaneu Manek Salomo susulan ndia, Manek Hiram-ma haitua susulak fo liin-na nae leo ia, “Nanahu Manetualain sue-lai anan-nala de Ana so'u basa Tuan da'di sila manen-na.

¹² Kokoa-kikiok neu Israel Manetualain fo Manamakadada'dik lalai ma daebafak-ka! Ana fe Dauk ana manek esa manatee tenok nanseli baite dodole da'uk, ma malelak, de besak ia ana bei sanga enok fo napadedeik uma esa ba'eneu Manetualain ma ba'eneu ndia uma manen-na.

¹³ No susulak ia, au haitua fe Tuan hataholi malelaina esa malelak ma manatee tenok, na'de Huram.

¹⁴ Inan da'di neme leo Dan-na mai, ma aman hataholi Tirus. Ana tao nalelak bua-lo'as neme lilopilas, lilofulak, liti, besi, batu ma ai mai. Ana bisa tenu tema momo'dok, tema pilabalanggeok, tema pilas, ma tema abalutu boe. Ana tao nalelak dodoki-dudulak mata-matak-kala tunga lupak bee boe fo loken ana taon. Malole lenak fen bela-ba'uk soaneu ana tao-no'i sama-sama no Tuan hataholi malelan-nala, ma no basa hataholi fo ala tao-no'i soaneu Tuan aman fo Manek Dauk-ka so.

¹⁵ Ami mahani Tuan haitua gandum matak kaduak-kala, angol ma mina setun fo Tuan helu basak ndia.

¹⁶ Neukose ami lo'o ai kaiou neme letelepak Libanon-na de'u Tuan paluu-ka boema ami pa'as da'di ofaanak, fo ami makabobonuk-kasa tunga tasi losa leo Yope leu. Tuan hapu ndolos neme naa mai leo Yerusalem neu.”

Manetualain Uman-na mulai nananafofo'ak

¹⁷ Manek Salomo leke basa hataholi nusa dea fo manaleo lai Israel-la, sama leo aman Dauk leke hain so. Ana leke boema, hapu hataholi nusa dea lifun natun esa limahulu telu natun nee.

¹⁸ Ana ba'e fe hataholi lifun hituhulu soaneu so'u uma ai batun, lifun faluhulu soaneu pa'a batu nai letelepak-ka, ma lifun telu natun nee soaneu lanea ma ala ho'u tatao-nono'ik ndia.