2TAWARIKH 18 - Susula Malalaok Hehelu Palak Ma Hehelu Beuk

Nabi Mikha fe Ahab nasanene'dak

¹ Lelek Yosafat fo manek Yehuda namasu'i ma nanakoa-nanakiok boema, ana fe teidale-bobongin esa saon-na Ahab fo manek Israel-la teidale-bobongin esa.

² Basa teuk de'ubee boema, Yosafat neu donge-dama Ahab nai kota Samaria. Soaneu fe ha'da-holomata neu Yosafat no hataholi manatungan-nana, boema Ahab tao feta de nadenu fo do'do bi'ilopo ma sapi makadotok. Nai fai loak ndia, ana noke Yosafat fo neu sapu-na kota Ramot-ta nai Gilead.

³ Natane nae, “Ka'a nau sama-sama moo au fo teu sapu-ta Ramot do?” Yosafat nataa nae, “Hei, au solda'dung-ngala neukose lakabubua loo ka'a solda'dun-nala. Teu tatee-tatati sama-sama.

⁴ Tehu malolelenak ata tatane takahuluk Manetualain dei.”

⁵ Boema Ahab naloo nakabubua nabi fafa'kama natun haa de natanes nae, “Au bole u sapu-a Ramot do ta?” Lataa lae, “Bole! Neukose Manetualain fe kota ndia neu Ama Manek.”

⁶ Tehu Yosafat natane seluk nae, “Ade nai ia ta hapu nabi fe'ek fo ana hapu natane neu Manetualain soaneu ita fa do?”

⁷ Ahab nataa nae, “Bei hapu esa na'de Mikha fo Yimla anan-na. Tehu au amanasan, nana beita la'iesa fo nafa'da ela hata malole esa boen soaneu au; ka'da hata ta malole tataaesa.” Yosafat nataa nae, “Ah, boso kokolak mae leondia!”

⁸ Boema Ahab naloo-na uma manen-na hataholi mana'a ngga'din esa de nadenun lai-lai neu nala Mikha.

⁹ Nai lelek ndia Ahab ma Yosafat pake papake matua-madema, de langatuuk lai kandela manek lain nai mamanak popo'de gandum manai lelesuina Samaria matan-na, fo ndia te basa nabi-la mai lataa de landuku-lalosak sila hala nafa'da elan-na.

¹⁰ Hataholi esa neme nabi sila-la mai, na'de Zedekia fo Kenaana anan-na, ana tao bana susulak-kala neme besi mai, boema nafa'da Ahab nae, “Manetualain nafa'dan, ‘No bana susulak fo sama leoiak-ka, Ama Manek neukose hotu fe Siria ma tao makalulutuk-kasa.’ ”

¹¹ Basa nabi fe'ek-kala lakaheik de lafa'da lae, “Sapu-ma Ramot leona, te neukose Ama Manek hapu buna-boan. Neukose Manetualain fe Ama sengi.”

¹² Ndia te hataholi mananeu-nala Mikha, nafa'da Mikha nae, “Basa nabi fe'ek-kala lafa'da ela sesengik soaneu manek-ka. Ela leo bee na Ama boeo nafa'da ela hata malole sama leo sila nafa'dan-na boe.”

¹³ Tehu Mikha nataa nae, “No Manetualain fo maso'dak-ka na'den-na, au nau afa'da ka'da hata fo Manetualain nafa'dan neu au!”

¹⁴ Lelek Mikha losa Manek Ahab-pa matan boema, manek-ka natane nae, “Au ma Manek Yosafat-ta bole meu sapu-ma Ramot do ta?” Mikha nataa nae, “Sapu-man! Tao leo bee o Ama Manek neukose hapu buna-boak. Neukose Manetualain fe Ama Manek sengi.”

¹⁵ Ahab nataa nae, “Metema o kokolak moo au nenik Manetualain na'den-na soona, mafa'dan tunga ndoon-na. Au muse fe o nasanene'dak la'i de'ubee la'eneu dede'ak ndia?”

¹⁶ Mikha balas nae, “Au ita solda'du Israel-la tapasasala nai letek-kala. Sila sama leo bi'ilopo fo manafoon ta, de Manetualain kokolak la'eneus nae, ‘Hataholi ia-la mauli-malanga taak. Nemena fo ala fali le'us no so'da-molek.’ ”

¹⁷ Boema Ahab nafa'da Yosafat nae, “Au kokolang-nga la'en hetu? Beita la'i esa fo ana nafa'da ela hata fo malole soaneu au fa! Ka'da mangalauk tataasesa!”

¹⁸ Mikha nafa'da seluk nae, “Besak ia mamanene hata fo Manetualain nafa'dan! Au ita Manetualain nangatuuk nai kandela manen lain nai nusa so'dak-ka, ma basa ata nusa so'dan-nala lapadeik deka loon.

¹⁹ Manetualain natane nae, ‘Neukose Au fufu'di-oodok Ahab fo ela ana nau neu natee-natati fo maten nai Ramot nai Gilead?’ Ata nusa so'dak sila-la natataa-na ta matak esa fa.

²⁰ Mate'en-na dula dalek esa to'da mai. Ana deka no Manetualain de nafa'da nae, ‘Neukose au nde fufu'di-oo'don-nana.’ Manetualain natane nae, Enon-na leobeek?

²¹ Dula dalek ndia nataa nae, ‘Neukose au u fo au tao-a basa nabi sila-la lasapepeko-lasandandali.’ Manetualain nafa'da nae, ‘Hei, tao leondiak te, neukose o hapu fufu'di-oodok malan.’ ”

²² Basa boema Mikha kokolak nae, “Nah, manada'dik-ka nde ndia! Manetualain taon-na Ama Manek nabi-nala lasapepeko-lasandandali neu Ama Manek nana Manetualain naketu basa soaneu Ana fe soe-a tuni la'e Ama Manek!”

²³ Boema Nabi Zedekia tutulumatak fo neu deka no Mikha, boema ana fapan ma nafa'da nae, “Hapu nai bee Manetualain Dula dalen-na la'oela au fo ana kokolak no o?”

²⁴ Mikha nataa nae, “Mahani te neukose o mita buti-na nai lelek o masok leo kama esa dalek muu fo o ke'ke!”

²⁵ Manek Ahab-pa paleta nae, “Ho'u-man! Fo moon leo Amon, walikota, ma leo maneana Yoas-sa neu.

²⁶ Madenus fo ala taon leo bui dale neu, ma fen na'a ma ninu ka'da faa anak mesan losa au fali ma'ing-nga no so'da-molek.”

²⁷ Mikha nafa'da nae, “Metema Ama Manek fali ma'in no so'da-molek soona, sosoa-na nae Manetualain ta kokolak tunga au fa. Basa hataholi manai ia-la da'di sakasii.”

Ahab mamaten-na

²⁸ Basa boema Ahab fo manek Israel-la, ma Yosafat fo manek Yehuda leu sapu-la kota Ramot-ta nai Gilead.

²⁹ Ahab nafa'da Yosafat nae, “Neukose au tuka-nggati au papake-nggangaong fo tunga natee-natatik, tehu ka'a pake mahele o papake matua-mademam.” Leondiak manek Israel-la tuka-nggati papake-ngganggaon nai lelek neu natee-natati.

³⁰ Nai lelek ndia, basa malanga solda'du matuaina fo manaho'u kaleta musu Siria-la, nanapaleta basak soaneu sapu-la ka'da manek Israel-la.

³¹ Da'di nai lelek lita Manek Yosafat-ta boema, sila basa-basas laedaenga manek Israel-la nde ndia. Hu ndia de ala sapu-lan. Tehu Yosafat nggasi, boema Manetualain tulu-falin de Ana diluheok sasapuk ndia leo mamana fe'ek neu.

³² Lelek malanga solda'du matuaina fo manaho'u kaleta musu Siria-la bubuluk lae manek Israel-la ta nde ndia fa boema, ala ta sapu-lan so'on.

³³ Solda'du Siria esa ta name'da fa te ana po'i kokou isi-na su'di leo mamanak bee neu. Tehu kokou isik ndia la'e Ahab de ana tola sapiselik ba'du musu-na nai seseu-na. Ahab naloo bou neu manaho'u kaleta musu-na nae, “La'e au! Puta falik fo moo au kalua eme natee-natatik dale mai.!”

³⁴ Tehu hu kande natee-natati-ka bei makee, de Manek Ahab-pa napadeik nahele de lasala'dan nai kaletan dale, nasale leo solda'du Siria-la neu. Nai lelek le'do tenak boema maten.