2TAWARIKH 17 - Susula Malalaok Hehelu Palak Ma Hehelu Beuk

Yosafat da'di manek

¹ Yosafat da'di manek nggati aman, de ana tao teas soaneu la'ban Israel.

² Ana pe'da solda'du neu basa kota-kota fo lanuu kota musu manai Yehuda, ma nai mamanak manai kota Yehuda deak, boema nai aman loso-na kota-kota manai nusak Efraim-ma.

³ Manetualain ba'e-pala Yosafat nanahu ana tunga aman ei tata'bu-na; ana ta sene-do'ok neu Baal fa,

⁴ te ana sene-do'ok neu Manetualain. Ana tunga Manetualain paletan-nala, ma so'da-na ta sama leo Israel manen-nala fa.

⁵ Manetualain fe Yosafat nangatutuu matea-mahelek da'di leo manek Yehuda. Basa laun-na lala'en-na fen bua palsen de ana da'di kamasu'ik boema ala fe ha'da-holomata nanseli neun.

⁶ No dale matea-mahelek, ana tunga Manetualain hihii-nanaun de ana tao nakalulutuk basa mamana sosongo-tatangok-kala boema lamatua daebafak inak Asyera manai Yehuda dodoki-dudulan.

⁷ Ana paleta neu teu katelu-na boema, nadenu hataholi manaho'u paleta mademaina-la fo lanoli Manetualain hoholo-lalanen nai Yehuda kota-kota-nala. Hataholi sila-la nde: Benhail, Obaja, Zakharia, Netaneel ma Mikha.

⁸ Hataholi Lewi sio ma imam dua sama-sama loos. Hataholi Lewi sila-la nde Semaya, Netanya, Zebaja, Asael, Semiramot, Yonatan, Adonia, Tobia, ma Tob-Adonia. Imam kaduak sila-la nde Elisama ma Yoram.

⁹ Ala ho'ileni Manetualain susula Hoholo-lalanen fo leu leo basa mamanak lala'en-na nai basa Yehuda kota-kota-nala fo lanoli laun manai naa-la.

Yosafat koasan-na

¹⁰ Manetualain taon-na basa nusak manai Yehuda titia-tatain-nala bii latee-latati la'ban Manek Yosafat-ta.

¹¹ Ana sipo lilofulak ma bua palsen fe'e-fe'ek makadotok neme hataholi Filistin-nala mai, ma ana sipo bi'ilopo lifun hitu natun hitu ma bi'ihiik lifun hitu natun hitu neme hataholi Arab-ala mai.

¹² No enok ndia Yosafat koasan-na boetai namatua-ka. Ana nafofo'a kota musu-la ma kota fo mamana pepe'da tafa-sisilo ma nana'a-nininuk nai basa Yehuda lala'en-na.

¹³ Ana pe'da nadodou nana'a-nininuk makadotok nai kota sila-la. Ana pe'da malanga solda'du matuaina palani-la nai Yerusalem,

¹⁴ esa-esak nok ndia solda'du-nala tunga teidale-bobongin. Adna nde bee na malanga solda'du matuaina neme teidale-bobongik Yehuda mai. Ana nauli-nalanga solda'du lifun natun telu.

¹⁵ Hataholi kadua nde Yohanan; ana nauli-nalanga solda'du lifun natun dua faluhulu.

¹⁶ Hataholi katelu nde Amasia fo Zikhri anan-na; ana nauli-nalanga solda'du lifun natun dua. (Amasia nde bee na hataholi esa no dale hihii-nanau mesan-na, ana nau tunga neu Manetualain.)

¹⁷ Malanga solda'du matuaina neme teidale-bobongik manai leo Benyamin-na dalek nde Elyada, fo hataholi palani tatibatu kahelek esa; ana nauli-nalanga solda'du lifun natun dua no kokouk ma sisili musu manadaik.

¹⁸ Hataholi kadua manai solda'du ia-la dalek nde Yosabad; ana nauli-nalanga solda'du lifun natun esa faluhulu, no tee-tafa manadaik.

¹⁹ Hataholi sila-la nde hapu bela-ba'uk nai Yerusalem. Fe'ek neme ndia mai boe, manek-ka pe'da solda'du fe'e-fe'ek nai basa kota musu manai nusak Yehuda-la.