2TAWARIKH 16 - Susula Malalaok Hehelu Palak Ma Hehelu Beuk

Natee-natati no Israel

¹ Asa paleta Yehuda neu teu kateluhulu neen-na boema, Baesa fo manek Israel-la sapu-na Yehuda de ana tao natea-nahele kota Rama fo ana kena eno masok kalua leo Yehuda neu-a.

² Boema Asa ho'i lilopilas ma lilofulak neme Manetualain Uman-na ma uma manek-ka mamana pepe'da hata-heton mai, boema ana haituas leo Damsyik fo leo Benhadad fo manek Siria neu no hala-heheluk-ka nde ia nae,

³ “Mai fo ata tao tia-laik sama leo ita ina-aman tao hain so boe. Au haitua lilopilas ma lilofulak da'di leo bua palsen, ma au oke Tuan boso boe tao tia-laik moo Baesa fo manek Israel-la, fo ela ana hela falik solda'dun-nala leme au nusang-nga mai.”

⁴ Benhadad sipok nonokek ndia boema nadenu malanga solda'du matuainan-nala sama-sama loo sila solda'dun-nala sapu-la Israel kotan-nala. Ala sengi Iyon, Dan, Abel-Bet-Maakha ma kota-kota fo mamana pepe'da tafa-sisilo ma nana'a-nininuk manai Naftali.

⁵ Lelek Manek Baesa namanene dede'ak ndia boema, ana hahae tao natea-nahele Rama de ana la'oela kota ndia.

⁶ Boema Manek Asa paleta hataholi-la leme basa Yehuda lala'en-na mai fo ala lu'a Baesa pake batu ma ai manai Rama fo tao natea-nahele kota ndia. Asa pake ai batu sila-la soaneu tao natea-nahele kota Geba ma Mizpa.

Nabi Hanani

⁷ Nai lelek ndia Nabi Hanani mai leo Manek Asa mai de nafa'da nae, “Hu kande o masalai o deam-ma neu manek Siria, te ta neu o Manetualain fa, de mopo o le'do-fai maloam-ma soaneu o sengi manek Israel-la.

⁸ Ade Sudan ma Libia ta lanuu solda'du makadotok ma kaleta musu ma solda'du manasa'e ndala makadotok fa do? Leomae leondiak boe, Manetualain fe o sengis, nanahu o masalai o deam-ma neun.

⁹ Manetualain mete leo daebafak-ka lala'en-na mai soaneu Ana fe be'ibalakain neu hataholi fo manalilinekak neun. O tao nakeketu ngoak so, hu ndia de mulai besak ia, neukose o la'ola'di natee-natatik tatasesa.”

¹⁰ Nabi Hanani hala-kokolan ndia, taon-na Asa namanasa nanseli nalosa ana tao nabi ndia leo bui dale neu. Nai lelek ndia boe, Asa tuni-ndeni laun de'ubee.

Asa paleta mate'en-na

¹¹ Basa manada'dik manai Asa paletan-na dalek neme makasososan-na losa mate'en-na nanasula basak nai Mane-manek Yehuda ma Israel-la susula Tutuin dale so.

¹² Asa paleta neu teu kateluhulu sio-na boema, ana hapu he'di belak nai ein duas. Leomae leondiak boe, ana ta sanga tutulu-fafalik neme Manetualain mai fa, te noke neme dotel-la mai.

¹³ Basa teuk dua boema maten.

¹⁴ Ala ho'i mo'do-akidok fo nanataok neme bumbu-bumbu ma kaboomenik-kala mai de ladiun neu popolan-na, boema latoin nai Mane-manek manai Kota Dauk-ka mamana laten-na. Ma soaneu fe ha'da-holomata neun de, laun-na lananau haikaa manafolokakaak matuaina.