2RAJA-RAJA 9 - Susula Malalaok Hehelu Palak Ma Hehelu Beuk

Yehu nanandoo eik da'di mane Israel

¹ Nai lelek ndia, Elisa naloo hataholi esa, neme basa nanoli nabi-la mai, de nafa'da nae, “Mahehele aom, fo muu leo Ramot nai Gilead muu, ma ho'i meni boto mina setun-na nai dalek ia.

² O losa naa soona, sanga Yehu, fo Yosafat anan-na, ma Nimsi upun-na. Lelekon, fo mesak-kana neu leo kama esa dalek neu,

³ fo po'a mina ia neu langan lain, soona mafa'da mae, ‘Manetualain nafa'da nae Ana so'u o, da'di mane Israel.’ O tao basan soona, lai-lai la'o leona.”

⁴ Nabi muli-soluk ndia, neu leo Ramot neu,

⁵ boema ana hapu Yehu, no basa malanga solda'du manai lain fe'en-nala, bei lakokolaok nai naa. Nabi ndia nafa'dan nae, “Tuan, au ini halak soaneu Tuan.” Boema, Yehu nataa nae, “Soaneu see?” Nabi ndia balas nae, “Soaneu Tuan mesak-kana.”

⁶ Basa boema, duas leu leo uma dale leu, de nabi muli-soluk ndia, ana po'a mina setun-na neu Yehu langan lain, boema nafa'da nae, “Amak, fo Israel Manetualain-na, nafa'da nae, ‘Au so'u o da'di manek, neu Au anang Israel.

⁷ Neukose, o tao momopo-mamate o tuan Ahab, teidalen-nala. No enok ndia, Au huku Izebel, fo mana taonisa Au nabing-ngala, ma Au atang fe'e-fe'eng-ngala so.

⁸ Basa Ahab teidalen-na, upu-anan lala'en-na, muse mates. Basa touk-kala, nau lasik do mulik boe, neukose Au tao amopo-amates.

⁹ Neukose, Au tao teidalen-nala, sama leo Au tao Yerobeam teidalen-nala, ma Baesa teidalen-nala, fo mane-manek Israel-la.

¹⁰ Neukose, Izebel ta nananatoi-natonok fa. Neukose, busa manai nusak Yizreel-la, la'a popolan-na.’ ” Nabi muli-soluk ndia, kokolak basa dede'ak sila-la boema, ana leo deak neu, de nalai.

¹¹ Yehu fali ne'un leo nonoon-nala neu, boema latanen lae, “Hapu halak-ka leo beek? Tao le'e de, hataholi kamulus ndia, ana mai leo o mai?” Yehu nataa nae, “Ah emi bubuluk so.”

¹² Tehu, hataholi sila-lataa lae, “Ta, ami ta bubuluk fa, de mafa'da leona!” Yehu nataa nae, “Ana nanduku-nalosak Manetualain hala-hehelun-na, nae Manetualain so'u au da'di mane Israel.”

¹³ No lai-laik, Yehu nonoon-nala, ala o'du heni ba'du manalun-nala, de ala belan neu e'dahuuk-ka, nai Yehu matan-na. Boema, ala puu pupuuk-ka, ma ala eki lae, “Yehu da'di manek!”

Yoram fo mane Israel-la nanataonisak

^14-15 Boema, Yehu tao nakabua makahatuk, fo la'ban mane Yoram-ma, fo nai lelek ndia nai Yizreel. Yoram neu leo naa neu, fo puli-namo'do hina-hinak fo, nakahina nai natee-natatik la'ban Hazael, fo mane Siria, neme Ramot. Yehu nafa'da nonoo malanga solda'du manai lain-nala nae, “Metema, emi makaheik, au da'di manek soona, manea leona, fo ela boso hapu hataholi esa boen, hapu kalua neme Ramot mai, fo neu nafa'da hataholi manai Yizreel-La.”

¹⁶ Basa ndia boema, ana sa'e neu kaleta musun lain, boema neu leo Yizreel neu. Nai lelek ndia, Yoram beita lea-hai fa, de Ahazia, fo mane Yehuda, neu donge-daman nai naa.

¹⁷ Lelek, kota Yizreel-la, manamanea uma puni madema kota Yizreel-la, nita Yehu no hataholin-nala mai boema, naloo bou-bou nae, “Hapu hataholi bubuak esa, ala la'ok lasale leo ia mai!” Boema, Yoram nataa nae, “Madenu solda'du manasa'e ndala esa, fo neu palisak matololole, ade hataholi sila-la, tolanook do musu.”

¹⁸ Solda'du ndia sa'e-na ndalan-na, de neu natongon-no Yehu, de nafa'dan nae, “Manek-ka nau bubuluk, ade Tuan mai, da'di leo tolanook do.” Boema, Yehu nataa nae, “Ta paluu, o bubuluk fa! Ka'da makabubua moo au leona.” Manamanea uma puni madema ndia, nita solda'du ndia losa hataholi bubuak ndia, tehu ana ta fali ma'i fan. Boema, neu nafa'da dede'ak ndia,

¹⁹ de ala haitua solda'du fe'ek esa neu. Solda'du ndia boeo, natane Yehu leondiak boe, de Yehuda nataa la'i esa seluk nae, “Ta paluu o bubuluk fa! Ka'da makabubua moo au leona!”

²⁰ Manamanea uma puni madema ndia, neu nafa'da seluk nae, hataholi nananadenuk ndia, ana losa nai hataholi bubuak ndia so, tehu ana ta fali ma'i fan. Boema ana popo-tama seluk-kana nae, “Fafa'kama, Yehu nde nauli-nalanga hataholi bubuak ndia, nana ana sa'e kaleta musun-na, sama leo hataholi kamulus-sa.”

²¹ Mane Yoram-ma, ana paleta nae, “Sadia au kaletang-nga.” Ala sadia-la kaleta boema, Yoram ma Mane Ahazia, esa-esak nai ndia kaletan dale, de leu leo Yehu leu. Ala hapu Yehu nai tina, fo makahulun-na, Nabot tinan ndia.

²² Yoram natane Yehu nae, “Ade, o mai, da'di leo tolanook do?” Yehu nataa nae, “Hapu nai bee, da'di leo tolanook, metema manale'a tee bei makadotok lai ia, ma bei hapu manasongo-tangok, fo o inam Izebel ndia, de mulai sosongo-tatangok ndia?”

²³ “Nalelesik esa ia, Ahazia!” Yoram lepos falik kaletan-na, de nalai, ma ana nggasi nae, “Dede'ak ia, nalelesik esa, Ahazia!”

²⁴ Boema, Yehu hela kokoun-na, nenik basa be'i-balakain lala'en-na, de ana kou la'e Yoram muliha'in-na, de ana tola nakandoo leo bade'en-na neu. Yoram bala neu dae, de maten nai kaletan dale.

^25-26 Boema, Yehu nafa'da Bidkar, fo solda'du manamanean-nana, nae, “Ade o bei mafandendelek, lelek ita sa'e ndala tunga Ahab, fo Yoram aman boe do? Nai lelek ndia, Manetualain nafa'da Ahab nae, ‘Au bubuluk, see nde huas-sa, taonisa Nabot, ma anan-nala, de Au aheluk, neukose Au huku o, nai osi ia dalek boe.’ ” Yehu kokolak nakandoo no solda'du manamanean-nana nae, “Hu ndia de, tapa Yoram popolan ndia, leo Nabot osin dale neu, fo ela Manetualain huhukun neu ndia, nanatao natetuk.”

Ahazia fo mane Yehuda nanataonisak

²⁷ Ahazia, nita manada'dik so, boema ana nalai heok kaletan-na, leo kota Bet-Hagan-na neu. Yehu usi tungan, ma ana eki neu solda'du anan-nala nae, “Taomisa hataholi ndia boe!” Ala kou lahinan, nai enok manaleo Gur neu-a, deka no kota Yibleam-ma. Tehu, ana hapu nalai losa Megido, de maten neme ndia.

²⁸ Hataholi mana'a ngga'din-nala, ko'o leni popolan-na, de lenin no kaleta fali leo Yerusalem neu, boema latoin nai, mane-manek manai kota Dauk-ka, mamana loo-laten-na.

²⁹ Ahazia da'di mane Yehuda, nai lelek Mane Yoram, fo Ahab anan-na, paleta Israel teuk 11 so.

Ina manek Izebel-la nanataonisak

³⁰ Yehu losa nai Yizreel. Lelek Izebel namanene hata fo ana da'di so, boema ana sau langan-na, de ana lose badaak neu mata-panan, de basa boema, ana mete neme uma manek-ka jendelan-na, leo dae neu.

³¹ Lelek, Yehu masok tunga lelesuina boema, Izebel naloo bou-bou nae, “Hai Zimri, kanisak-konei! Tao le'e de, o mai leo ia mai?”

³² Yehu nanganalo leo jendela neu, de nae, “See kande nok au-a?” Boema, uma manek-ka, hataholi mana'a ngga'din dua do telu, lamanene boema, ala mete leo dae leu.

³³ Yehu nafa'das nae, “Tapa inak ndia leo dae neu!” Boema, ala tapa Izebel leo dae neu, de kaleta loli-nan, nalosa daan-na pisok leo papala nanadamak-ka neu, ma leo kaleta ndia ndalan-nala neu.

³⁴ Boema, Yehu neu leo uma manek dale neu, de na'a. Basa boema, nafa'da nae, “Inak ndia nanasoo-supak. Leomae leondiak boe, matoi popolan-na, nana manek-ka anafe'on ndia boe.”

³⁵ Tehu, lelek hataholi-la leu ho'i popolan-na, fo leu latoin te, ala hapu ka'da langa so'en-na, ma lima duin-nala, boema ein-na.

³⁶ Lelek, leu lafa'da manada'dik ndia neu Yehu, boema Yehu nae, “Manetualain nafa'da nakahuluk manada'dik ia, nai lelek, nafa'dan tunga atan Elia nae leo ia, ‘Neukose, busa na'a Izebel popolan-na, nai nusak Yizreel-la,

³⁷ ma neukose, popolan fo bei elak-kala, lalefu-le'ak, sama leo bana-la tein-na, nalosa hataholi esa boen, ta hapu nalelak, see popolan ndia fa.’ ”