2RAJA-RAJA 8 - Susula Malalaok Hehelu Palak Ma Hehelu Beuk

Inak-ka neme Sunem mai, de ana fali ne'un leo nusa Israel-la neu

¹ La'i esa boema, Manetualain fe soe la'a-ndoes-sa nai nusa Israel-la, teuk hitu dalen-na. Manada'dik ndia, beita da'di fa te, Elisa nafa'da basa dede'ak ndia, neu inak-ka neme Sunem mai, fo anan-na nanatao naso'da falik. Elisa boeo nadenun, fo no teidalen-nala, lali heok leo nusa fe'ek leu.

² Inak ndia, tao tunga Elisa hala nafa'dan-na, de ana la'o leo nusa Filistin-na neu, fo ana leo neme ndia.

³ La'a-ndoes ndia nate'e boema, ana fali ne'un leo Israel neu. Boema, no anan-na, leu leo manek-ka leu, fo ala dokodoe, fo ela fe falik ndia uman-na, ma tinan-na.

⁴ Nai lelek ndia, manek-ka noke Gehazi, fo Elisa atan-na, fo ana tui la'eneu, Elisa tao manada'di beuk-kala.

⁵ Nandaa no, nai lelek inak fo maneme Sunem ndia, neu leo manek-ka neu, fo nanduku-nalosak ndia dokodoen-na, te Gehazi bei tui, la'eneu tao leo beek de, Elisa tao naso'da falik ni'iana manamate basak esa so. Boema Gehazi nae, “Ama Manek fo Mandela-masa'ak, inak-ka nde ia, ma Elisa tao naso'da falik anan-na nde ia!”

⁶ Boema, manek-ka natane, de inak ndia, ana tui la'eneu ni'iana ndia. Basa ndia boema, manek-ka naloo hataholi mana'a ngga'din esa, de ana paletan, fo ela fe falik la'iesak, inak ndia hata-heton lala'en-na, leken no basa tinan-nala buna-boan lala'en-na, nai lelek nai nusa dea, teuk 7 dalen-na.

Elisa ma Mane Benhadad-ta, neme Siria mai

⁷ La'i esa boema, Elisa neu leo Damsyik neu. La'e Mane Benhadad-ta, namahe'di. Lelek manek-ka namanene, lae Elisa nai Damsyik boema,

⁸ nafa'da Hazael, fo hataholi mana'a ngga'din esa nae, “Meni fe nabi ndia bua palsen, fo moken, fo ela natane Manetualain ade, neukose au ia, lea-hai do ta.”

⁹ Hazael ho'i-na kota Damsyik-ka buna-boa mata-matan lala'en-na, de ana fuas neu keledei 40 lain, boema neu leo Elisa neu. Lelek, Hazael losa Elisa mamanan-na, boema nae, “O atam, Mane Benhadad-ta, nadenu au mai, fo au atane, ade, neukose ana lea-hai do ta.”

¹⁰ Boema, Elisa nataa nae, “Manetualain nafa'da au, nae neukose maten. Tehu, ka'da mafa'dan mae, neukose ana lea-hai.”

¹¹ Basa boema, Elisa nanganalo Hazael no mata memeten-na, namatane, nalosa Hazael dalen-na, ta tesa-tama fa. No kaiboik, Elisa kii.

¹² Hazael natane nae, “Tao le'e de, Tuan kii?” Boema, Elisa nae, “Nana au bubuluk, tatao-nono'i mangalauk fo, neukose o taon soaneu hataholi Israel-la. Neukose, o hotu heni kota-kota makota musun-nala, o taomisa hataholi muli-solu neulaun-nala, ma o ki'dumisa, ni'iana bongi beuanan-nala, boema o saika'di, inak-kailun-nala te'in-nala.”

¹³ Boema, Hazael nataa nae, “Ah, au ia hataholi sosoa-ndandaa taak, de hapu nai bee, au anuu koasa matuaina ndia!” Tehu, Elisa nataa nae, “Manetualain natu'du basa au, nae neukose, o da'di mane Siria.”

¹⁴ Lelek, Hazael fali ne'un leo uma manek-ka neu boema, Benhadad natanen nae, “Elisa nae le'e?” Boema, Hazael nataa nae, “Nafa'da nae, tao leo bee-o, neukose Ama Manek lae-hai.”

¹⁵ Tehu balahaa boema, Hazael ho'i-na lafa esa, de ana dopen leo oe dale neu, boema ana ko'on neu manek-ka mata-panan, nalosa maten. De Hazael da'di mane Siria, nggati Benhadad.

Yehoram mane Yehuda

¹⁶ Yehoram, fo Yosafat anan-na, da'di mane Yehuda, nai lelek Mane Yoram, fo Ahab anan-na, paleta Israel teuk lima so

¹⁷ Nai lelek ndia, Yehoram teuk 32, de ana paleta Yerusalem teuk 8 dalen-na.

¹⁸ Ana sao Ahab anan-na, de sama leo Ahab teidalen-nala tatao-nono'in, ndia boeo, nasala-nasingo neu Manetualain sama leo mane-manek Israel-la.

¹⁹ Tehu, Manetualain ta nau tao namopo-namate Yehuda fa, nanahu Ana helu basa neu atan Dauk, nae neukose tititi-nonosin, da'di manek lahele.

²⁰ Nai Yehoram paletan-na dalek, Edom ta tunga Yehuda paletan-na fa, de napadeik fe'e nusan-nusa.

²¹ Hu ndia de, Yehoram kalua no basa kaleta musun-nala, de leu leo Zair leu. Nai naa, Edom solda'dun-nala, lakahapi-lan, tehu le'odae boema, ndia ma basa solda'du manasa'e kaleta-la malangan manai lain-nala, tola lakandoo musu tala'da, de sila solda'dun-nala, lalai fali leo esa-esak uman neu.

²² Mulai neme ndia mai, Edom ta nakatele neu Yehuda so'on. Nai tepo-lelek ndia boe, kota Libna boeo, ta tunga paleta fa.

²³ Tutui fe'ek la'eneu Yehoram, nanasulak nai Mane-manek Yehuda-la, susula Tutuin dale.

²⁴ Maten, de latoin nai mane-manek manai kota Dauk-ka mamana loo-laten. Boema, anan Ahazia, ana nggatin da'di manek.

Ahazia mane Yehuda

²⁵ Ahazia, fo Yehoram anan-na, ana da'di mane Yehuda, nai lelek Mane Yoram, fo Ahab anan-na, ana paleta Israel, teuk 12 so.

²⁶ Nai lelek ndia, Ahazia teuk 22, de ana paleta nai Yerusalem, teuk 1 dalen-na. Inan na'de Atalya, fo Mane Ahab-pa anan-na, ma Omri, fo mane Israel-la, upun-na.

²⁷ Hu kande, sasaon-na ndia, de Ahazia teidalen-nala, bisa latutik loo Mane Ahab-pa teidalen-nala. Ahazia nasala-nasingo neu Manetualain sama leo Ahab teidalen-nala, tatao-nono'in.

²⁸ Mane Ahazia, ana tunga natee-natatik no Yoram, fo mane Israel-la, de ala la'ban Hazael, fo mane Siria. Latee-lata'ti nai Ramot, fo nusa Gilead-ta. Yoram nakahina nai natee-natatik ndia dalek,

²⁹ boema ana fali ne'un leo kota Yizreel-la neu, fo puli-namo'do, de Ahazia neu donge-daman nai naa.