2RAJA-RAJA 24 - Susula Malalaok Hehelu Palak Ma Hehelu Beuk

¹ Nai tepo-lelek fo Manek Yoyakim-ma paleta, Nebukadnezar, fo manek Babel-la, neu sapu-na Yehuda, de ana sengin. Yoyakim nakatele neu Nebukadnezar, teuk 3 dalen-na, tehu basa boema, ana ta tunga paletan-na so'on, de ana la'ban-nana.

² Boema, Manetualain nadenu hataholi mangalauk-kala ho'u tafa-sisilo, leme leoina Babel, Siria, Moab ma Amon mai, de ala la'ban Yoyakim, boema ala tao lakalulutuk Yehuda, de nandaa no Manetualain nafa'da basan tunga atan-nala, fo nde nabi-la.

³ Memak, dede'ak ndia muse ana da'di, nanahu Manetualain nafa'da basa, nae neukose leoina Yehuda, nanatu'u-tapa henik, neme Manetualain fes nusak-ka mai. Sila nanatu'u-tapa henik, hu kande Mane Manasye-a, tao basa sala-singok-kala;

⁴ nakalenak, hu kande basa kanisak fo, ana taon soaneu hataholi sala taak-kala. Manetualain ta nau fe do'o do ampon neu Manasye fa, hu kande tatao-nono'in sila-la.

^5-7 Mane Babel-la, koasa la'iesak dae, fo neme Lee Efrat-ta, losa Masir dae toon kii, de Mane Masir-ra paleta nusak-ka, nai dalek boe. Hu ndia de, mane Masir-ra ta hapu kalua, fo neu natee-nata'ti so'on. Tutui fe'ek la'eneu Mane Yoyakim-ma, nanasulak nai Mane-manek Yehuda-la susula Tutuin dale. Mate basa Yoyakim boema, anamanen Yoyakhin nggatin da'di manek.

Yoyakhin manek Yehuda

⁸ Yoyakhin teun 18, nai lelek ana mane Yehuda, de ana paleta nai Yerusalem, bulak 3 dalen-na. Inan na'de, Nehusta, fo Elnatan neme Yerusalem, anan-na.

⁹ Yoyakhin sama leo aman boe, de nasala-nasingo neu Manetualain.

¹⁰ Nai tepo-lelek fo Yoyakim paleta, Nebukadnezar malanga solda'du manai lain-nala, lauli-lalanga solda'du Babel-la, de leu sapu-la Yerusalem, de lakahapi-lalan.

¹¹ Lakahapi-la kota ndia, boema, Nebukadnezar mesak-kana neu sapu-na Yerusalem,

¹² de Mane Yoyakhin-na no inan, anan-nala, malanga solda'du manai lain-nala, ma uma manek-ka, hataholi mana'a ngga'din-nala, lakatele neu Nebukadnezar. Boema Yoyakhin da'di hataholi nanafoo nenik. Dede'ak ndia, ana da'di ndek lelek Nebukadnezar, paleta neu teu ka 18-na.

¹³ Nebukadnezar tao nakalulutuk la'iesak, Mane Salomo-a taon-na basa hata-heto lilopilas soaneu Manetualain Uman-na. Boema ala ho'i leni la'iesak, hata-heto kabelik manai Manetualain Uman-na, ma manai uma manek-ka, leo Babel neu. Basa sila-la, ala da'di, fo nandaa no hata fo, Manetualain nafa'da nakahuluk-kana so.

^14-16 Mane Yoyakhin, inan, saon-nala, hataholi mana'a ngga'din-nala, ma mauli-malangan Yehuda-la, basa-basan lala'en-na, hataholi nananita – nalelak 7.000 – ala da'di hataholi nanafook, de foo lenis leo Babel neu. Boeo basa tuka ai-la, tuka besi-la, dede'un-na hataholi 1.000, basa-basas hataholi mabe'i-balakaik ma palani mesa-mesan, nai natee-natatik-ka dalek. Hataholi daa manek-kala, hataholi nananita-nalelak-kala boeo, foo lenis leo mamana ookak-ka neu – basa-basan lala'en-na, hataholi 10.000. Isabai-na, foo leni la'iesak laun Yerusalem-mala; ela ka'da laun nuu-taa hata-taak-kala.

¹⁷ Basa boema, Nebukadnezar so'u Matanya, fo Yoyakhin to'on-na, da'di mane Yehuda, boema ana foi nasafali na'den-na, de na'de Zedekia.

Zedekia manek Yehuda

¹⁸ Zedekia, teun 21, nai lelek ana da'di manek Yehuda, de ana paleta nai Yerusalem, teuk 11 dalen-na. Inan na'de, Hamutal, fo Yeremia neme kota Libna, anan-na.

¹⁹ Mane Zedekia, sama leo Mane Yoyakin-na boe, de nasala-nasingo neu Manetualain.

²⁰ Manetualain namanasa nanseli no laun Yerusalem-mala, ma hataholi Yehuda-la, de nalosa, Ana ta taoafik-kasa so'on.