2RAJA-RAJA 22 - Susula Malalaok Hehelu Palak Ma Hehelu Beuk

Yosia manek Yehuda

¹ Yosia teun 8, nai lelek ana da'di mane Yehuda, de ana paleta neme Yerusalem, teuk 30 dalen-na. Inan na'de, Yedida, fo Adaya neme Bozkat mai, anan-na.

² Yosia tao hata, fo nandaa no Manetualain dalen-na. Ana tunga bei-ba'i kain Mane Dauk-ka heo-hilun, de ana tunga basa Manetualain hoholo-lalanen lala'en-na, no dalek-katematuan-na.

Hapu falik Manetualain susula hoholo-lalanen

^3-4 Mane Yosia nanuu hataholi manasulak susulak esa, nai nusainan-na dalek, na'de Safan, fo Azalya anan-na, fo Mesulam upun-na. Mane Yosia, ana paleta neu teu ka 18-na boema, ana fe paleta nde ia, neu hataholi manasulak susulak ndia nae, “Muu leo Imam Manai lain-na, fo Hilkia, nai Manetualain Uman muu. Moken, fo nafa'da, lakabubua-la doik-kala, dede'un-na, neme imam-imam fo, lalalau-laoono nai lelesu masok leo Manetualain Uman dale neu-a.

^5-6 Mafa'dan, fo ana fe doik sila-la, leo basa manamanea ndolu uma, fo manatao lahii Manetualain Uman-na. Sila muse pake doik sila-la, soaneu bae basa tuka ai, tuka uma, ma tuka batu-la, ngga'din-nala, boema ala asa ai ma batu fo sila paluu-kala.

⁷ Basa hataholi manamanea bela-ba'uk sila-la, ala tao tunga ka'da ndoon-na, da'di ta paluu mokes, fo lafa'da doik-kala dede'un-na fa.”

⁸ Boema Safan nanduku-nalosak manek-ka paletan ndia neu Hilkia, boema Hilkia tui Safan nae, ndia hapu falik Manetualain susula hoholo-lalanen, neme Manetualain Uman-na so. Hilkia fe susulak ndia, leo Safan neu, de Safan lees-sana.

⁹ Basa ndia boema, Safan fali ne'un leo manek-ka neu, de nafa'dan nae ana ho'in-na doik fo nanape'dak manai Manetualain Uman-na so, de manek-ka atan-nala fes leo basa tuka manai Manetualain Uman-na neu.

¹⁰ Basa boema, Safan nafa'dan nae, “Hilkia fe au susulak ia-la.” Boema Safan lees fe manek-ka, susulak sila isi-liin.

¹¹ Manek-ka namanene susulak sila isi-liin boema, ana sii-sii lulu'i bua papaken-na, nanahu dalen-na he'dis-sa.

¹² Boema, manek-ka fe paleta nde ia, neu Imam Hilkia, Ahikam, fo Safan anan-na, Akhbor, fo Mikha anan-na, Safan, fo nusaina hataholi manasulak susulan-na, ma Asaya, fo solda'du manamanea manek-ka nae:

¹³ “Meu leona, fo matane Manetualain soaneu au, ma soaneu laun Yehuda lala'en-na, la'eneu susulak ia, isi-liin. Manetualain namanasa ita, nanahu ita bei-ba'i kain-nala, ta lakalala'ok basa paleta, fo nanasulak nai susulak ia dalek fa.”

¹⁴ Boema, Hilkia, Ahikam, Akhbor, Safan ma Asaya leu loke natutu'duk neme inak esa, na'de Hulda. Inak ndia, nabi esa, fo ana leo nai nggolo beuk manai Yerusalem-ma. Saon-na, na'de Salum, fo Tikwa anan-na, ma Harhas upun-na; Salum ia, nde ito-ato papake-ngganggaok makaluku-makatele-a, nai Manetualain Uman. Lelek Hulda namanene, sila hala nafa'dan ndia boema,

¹⁵ nadenus, fo ala fali le'us leo manek-ka leu, fo landuku-lalosak

¹⁶ Manetualain dede'a-kokolan nde ia nae, “Neukose, Au huku Yerusalem no basa laun-na lala'en-na, sama leo hata fo, nanasulak nai susulak fo, besak-ka manek-ka lees ndia dalek

¹⁷ Ala lasadea Au so, de ala tunu-hotu tutunu-hohotuk fe lamatua daebafak fe'ek-kala. Basa hata fo sila tao-no'ik-ka, ana tao nafo'a Au nasa-melung. Au amanasa Yerusalem, de Au nasa-melung ndia, ta bisa tenak fa.

¹⁸ Tehu, la'eneu Mane Yosia soona, Au, fo Israel Manetualain, fen hala heheluk-ka nde ia, ‘O mamanene basa, hata fo nanasulak nai sususlak ndia dalek soona,

¹⁹ o muse masasale dale, ma makaloe-makadae aoinam-ma, nai Au matang. Au fe basa nasanene'da mahelek so, fo huku Yerusalem no laun-nala. Neukose, Au tao kota ndia da'di hata naniluk esa, fo nini bibii-namata'uk, ma neukose Au tao Yerusalem na'den-na, da'di na'de nanasoo-supak. Tehu lelek o mamanene, la'eneu Au fe nasanene'da mahelek ndia boema, o kii ma o sii-sii lulu'i o bua papakem-ma, fo da'di leo ta'du-tana dale he'dik. Au amanene basa o huhule-haladoim so,

²⁰ hu ndia de, Au ta aketu huhukuk soaneu Yerusalem, nai lelek o bei maso'da. Neukose, o mate no mole-dame.’ ” Boema, hataholi nadedenuk sila-la, ala fali le'us leo manek-ka leu, de landuku-lalosak hala heheluk ndia.