2RAJA-RAJA 19 - Susula Malalaok Hehelu Palak Ma Hehelu Beuk

Manek-ka noke nanoli-nafa'dak neme Nabi Yesaya mai

¹ Nai lelek, Manek Hizkia namanene hataholi ka 3-k sila-la hala nafafa'dan-na boema, ana sii-sii lulu'i bua papaken-na, ma ana pake si'di kalong, da'di neu ta'du-tana dale he'dik, boema neu leo Manetualain Uman-na neu.

² Basa boema, nadenu Elyakim, fo uma manek-ka malangan-na, Sebna, fo nusaina hataholi manasulak susulan-na, ma basa imam lasik-kala, fo leo latongo loo Nabi Yesaya, fo Amos anan-na. Sila boeo pake si'di kalong.

³ Hizkia hala hehelun, fo ala landuku-lalosak-kana neu Yesaya, nde ia, “Faik ia fai luu-mata pinu-iduk; ita nanahukuk, ma nananakamumulu-nakamamaek. Ita sama leo, inak fo hii-hii nae bongi, tehu be'i-balakain ta so.

⁴ Manek Asyur-ra, nadenu basa, malanga solda'du manai lain esa, fo nakamumulu-nakamamaek Manetualain fo maso'dak-ka. See bubuluk, emi Aman Manetualain namanene basa nakamumulu-nakamamaek ndia, de neukose, Ana huku sila fo, manakokolak-kana! Hu ndia de, hule-haladoi leona, neu Manetualain, ba'eneu ita hataholin fo, bei maso'dak-kala.”

⁵ Yesaya sipo basa Manek Hizkia, hala hehelun ndia boema,

⁶ nadenu basa hataholi nadedenuk sila-la, fo landuku-lalosak natataak-ka nde ia nae, “Manetualain nafa'da nae, Ama manek, ta bole bii-mamata'u neu, mane Asyur ndia, atan-nala hala nafa'dan lae, Manetualain ta hapu soi-po'i nala ita fa.

⁷ Neukose, Manetualain taon-na manek Asyur-ra, taoafik neu dede'a anin esa, fo nalosa ana fali ne'un leo nusan-na neu, fo neukose tao lisan nai naa.”

Hataholi Asyur-rala haitua nasanene'dak mahele fe'ek

⁸ Asyur, malanga solda'du manai lain ndia, hapu halak, lae ndia manen-na, ana la'o neme kota Lakhis-sa mai so, de natee-nata'ti la'ban kota Libna, fo ta dook-ka neme ndia mai fa. Boema, Malanga solda'du manai lain ndia, neu leo naa neu, fo natongon-no manen ndia.

⁹ Manek Asyur-ra, sipo basa halak, lae Tirhaka, fo manek Sudan-na, nauli-nalanga solda'du Masir-rala, de ala mai fo sapu-la sila. Hu ndia de, mane Asyur-ra, haitua susulak leo Hizkia, fo mane Yehuda neu.

¹⁰ Susulak ndia liin-na nae leo ia, “Boso nalosak, o Manetualaim, fo o mamahenak ndia, hehelu-balataan ke'di-ndiu nala o, nae neukose, o ta tu'da leo au limang dale mai fa.

¹¹ O mamanene basa, lae basa mane Asyur-ra sapu-la nusak bee soona, ana tao nakalulutuk la'iesak-kana. Boso maedaenga, o bisa maladeak!

¹² Nai lelek, au bei-ba'i kaing-ngala tao lakalulutuk kota Gozan, Haran ma Rezef-pa, boema ala taolisa hataholi Eden fo manaleo lai Telasar-ra, sila lamatua daebafan-nala ta hapu esa boen, soi-tefa-na sila fa.

¹³ Kota Hamat, Arpad, Sefarwaim, Hena ma Iwa manen-nala lai bee?”

¹⁴ Hizkia sipon-na susulak ndia neme hataholi nadedenun-nala mai boema, ana lees-sana. Basa boema, neu leo Manetualain Uman neu, de nakapepela susulak ndia neu Manetualain matan-na,

¹⁵ boema ana hule-haladoi nae, “Manetualain, fo Israel Manetualain fo nangatuuk nai Kerub lain-na, ka'da O mesa-mesam-ma, nde Manetualain fo koasa basa nusak lala'en-na nai daebafak-ka poin-na. O nde makadada'dik lalai ma daebafak-ka.

¹⁶ Manetualain, sa'di leo been-na, taoafik neu hata fo, besak ia ana da'di neu ami. Mamanene basa Sanherib nakamumulu-nakamamaen soaneu O, Manetualain fo maso'dak-ka!

¹⁷ Ami basa-basam-mala bubuluk ou Manetualain, lae mane-manek Asyur-ra, tao lamopo-lamate basa leoina makadotok, ma ana tao nakalulutuk leoina sila-la nusan-nala.

¹⁸ Ana hotu heni lamatua daebafan-nala boeo, nana lamatua daebafak sila-la, ta lanuu koasa makandondook fa. Sila ka'da dodoki-dudulak neme ai ma batu mesan, fo hataholi daebafak-ka nde taon-nana.

¹⁹ Ou Manetualain, fo ami Manetualaim-ma soi-po'i ami neme hataholi Asyur sila-la mai, fo ela basa leoina manai daebafak-ka lala'en-na bubuluk, lae ka'da O mesa-mesam-ma nde Manetualain.”

Yesaya hala-hehelun neu manek-ka

²⁰ Basa boema, Yesaya haitua fe Manek Hizkia, hala-heheluk, fo da'di leo natataak neu manek-ka huhule-haladoin,

²¹ Manetualain nafa'da nae, “Kota Yerusalem-ma hika, ma hakinonoli o, Sanherib.

²² Ade, o bubuluk, see kande o dodoki-aalin, ma o makamumulu-makamamaek-kana ndia, do ta? Au, Israel Manetualain, Manetualain fo malalao-malalafuk! O heheo-hihilum koao-ndaeaok nanseli soaneu Au.

²³ O madenu hataholi neu, fo ana kokolak bafa maloa, nae no o kaleta musu makadotom-mala, o bisa kae-mala lete mademaina-la lai Libanon. O mamatutua-mamadedema o aoinam-ma, mae o lo'o mabuu, ai kaiou mademainan-nala, ma mana'ahiin-nala, boema o tola-mala, lasi manggion-nala selik.

²⁴ Boeo o mamatutua-mamadedema, mae o kali oedolu, ma minu oe nai nusa dea-la, ma o mafa'da mae, o solda'dum-mala, heheta-aa'i Lee Nil-la, losa ma'dan.

²⁵ Ade, o beita mamanene, lae basa sila la, Au tutu'u basan, neme makahulun eli mai so do? De besak ia, Au akalala'ok-kana. Au nde fe o koasa, fo tao makalulutuk kota-kota-la, ma kota musu-la, fo ala da'di ai batu manatapasasalak.

²⁶ Basa hataholi manaleo manai naa-la, mopo bei-bala kain-nala; ala nggenge, ma bii-lamata'u. Sila sama leo na'u manai mook-ka do na'u-a, fo ana moli nai uma punin-na, de namatuu, metema ani timu mato'bik-ka fuu la'en.

²⁷ Tehu, Au bubuluk basa, hata lala'en-na, la'eneu o aoinam-ma. Au bubuluk, hata fo o taon, ma o muu leo, su'di bee muu boe.

²⁸ Au bubuluk, o mamanasa Au nanseli, ma Au amanene basa, la'eneu o koao ndaeaom ndia so. Besak ia, Au nato kakaik neu o panam-ma, ma lapa neu o bafam-ma, fo ela Au hela falik o, tunga enok fo o tungan, nai lelek o mai.”

²⁹ Yesaya haitua hala-heheluk ia neu Hizkia boe, nae, “Neukose manada'di ta'du-tana ba'eneu o-a, nde ia. Teuk ia, ma teuk manamaik-ka, neukose hataholi-a, na'a gandum manamoli aok-ka. Tehu basa ndia soona, ala hapu sele gandum ma angol, fo la'a lita buna-boan.

³⁰ Hataholi Yehuda bei maso'dak-kala. Neukose tetu temak sama leo bubu'u-palusa, fo okan-na tola demak-ka, ma labuna-laboa.

³¹ Nai Yerusalem, ma nai Lete Sion-na lain, neukose hapu hataholi-la laso'da, nanahu Manetualain naketu basa, nae neukose, dede'ak ndia, ana da'di.

³² Manetualain nafa'da la'eneu manek Asyur-ra, nde ia, ‘Neukose, ana ta bisa masok Yerusalem, do ana kou kokou isik leo kota ndia neu fa. Solda'du manapake babaa fanak-kala, neukose ta hapu esa boen, fo ana bisa deka kota ndia fa, ma neukose, ta nadodou dae, fo da'di papala nanadamak, soaneu nakahapin-nan fa.

³³ Neukose, mane Asyur-ra, fali ne'un tunga enok fo ana tungan, nai lelek ana mai, te ana ta masok kota ndia fa. Au, fo Manetualain nde manakokolak-ka.

³⁴ Neukose, Au asala'e ma Au asulu-ahapa kota Yerusalem-ma, hu kande Au na'deng-nga, ma hu kande, Au hehelu-balataang no Au atang Dauk.’ ”

³⁵ Le'odaek ndia boe, Manetualain ata nusa so'dan esa, ana mai leo hataholi Asyur-ra ofun-na mai, de ana taonisa solda'du 185.000. Balahaa fafaik te, popolan-nala lalefu-le'ak.

³⁶ Boema Sanherib, fo manek Asyur-ra nakadedeak, de ana fali ne'un leo Niniwe neu.

³⁷ Nai faik esa, fo lelek ana bei songo nai Lamatua Daebafak Nisrokh-ka uma sosongon dale, boema Adramelekh ma Sarezer, fo ana manen-nala, ta'ti lisan nenik tafaina. Basa ndia boema, lalai leo nusa Ararat-ta leu. Boema Esarhadon, fo anamanen fe'en esa, nggatin da'di manek.