2RAJA-RAJA 18 - Susula Malalaok Hehelu Palak Ma Hehelu Beuk

Hizkia manek Yehuda

¹ Manek Hosea, fo Ela anan-na, paleta Israel neu teu ka 3-na boema, Hizkia, fo Ahas anan-na, da'di manek Yehuda.

² Nai lelek ndia, teun 25, de ana paleta nai Yerusalem, nai teuk 29 dalen-na. Inan na'de Abia, fo Zakharia anan-na.

³ Hizkia tatao-nono'in, nandaa no Manetualain dalen-na, sama leo ba'i kaim Mane Dauk-ka.

⁴ Ana tao nakalulutuk lamatua daebafak-ka mamana sosongo-tatangon-nala, ma ana tao natu'u batu lutun-nala, boema ana tao nalutu lamatua daebafak Inak Asyera, dodoki-dudulan. Boeo ana tao nakalulutuk menge liti, fo Musa taok-ka, fo loken lae Nehustan. Nana, losa lelek ndia, hataholi Israel-la, bei tunu boomenik fo fe ha'da-holomata neu menge liti ndia.

⁵ Nai basa manek Yehuda-la lala'en-na, nau makahuluk-kala, do nai basa Hizkia tepo-lelen-na boe, ta hapu manek sama leo ndia fa. Namahele neu Amak, fo Israel Manetualain-na,

⁶ ma ana lilineka neun. Ana beita la'ban nita Manetualain fa. Hizkia tunga no te'e-te'ek, basa Manetualain paletan lala'en fo Ana fen tunga Musa.

⁷ Hu ndia de, Manetualain tulu-fali nahelen, nalosa ana hapu buna-boak nai basa ue-osan lala'en-na dalek. Ana ta nau tunga mane Asyur-ra paletan-na, ma ana ta nau nakatele neu fan.

⁸ Ana sengi hataholi Filistin-nala, ma ana kalo mamana leleon-nala, neme nggolo ana-kala, losa kota-kota matuaina-la, fo Gaza ma nusak manai boboa kaisun-nala, lai dalek boe.

⁹ Hizkia paleta neu teu ka 4-na, fo nde manek Hosea, paleta Israel neu teu ka 7-na boema, Salmaneser, fo manek Asyur-ra, sapu Israel, de nakahapin-na Samaria.

¹⁰ Lelek, Asyur nakahapi-na Samaria teuk 3 boema, ana tu'da. Manada'dik ndia, ana da'di nai Hizkia paleta neu teu ka 6-na, ma Hosea paleta neu teu ka 9-na.

¹¹ Basa boema, manek Asyur-ra, foo hataholi Israel-la, da'di leo hataholi nanafook leo Asyur neu; ana hataholi Israel-la seli, leo nai kota Halah, ma seli leo deka no Lee Habor-ra, nai nusak Gozan-na, ma seli seluk, leo lai kota-kota manai nusa Madai-a.

¹² Samaria tu'da nanahu, hataholi Israel-la, ta tunga neu sila Manetualain fa. Ala lalalesi hehelu-balataak, fo Manetualain taon no sila, ma ala la'olena basa Musa, fo Manetualain atan-na paletan-na. Ala ta nau lamanene, ma tunga fan.

Hataholi Asyur-ra fe nasane'dak mahelek neu Yerusalem

¹³ Hizkia, fo manek Yehuda, paleta neu teu ka 14-na boema, Sanherib, fo mane Asyur-ra, sapu-na, Yehuda kota makota musun-nala, de ana sengi.

¹⁴ Boema, Hizkia haitua halak ia, neu Sanherib, nai Lakhis nae, “Au asala so. Hu ndia de, au dokodoe, sa'di leo been-na, Tuan hahae sapu-ma ami. Basa Tuan nonoken lala'en-na, neukose au tau atetun.” Boema, Sanherib nataa nae, Hizkia muse haitua fen, lilofulak kilo 10.000, ma lilopilas kilo 1.000.

¹⁵ Hu ndia de, Hizkia haitua la'iesak lilofulak manai Manetualain Uman dale, ma manai uma manek-ka peti pepe'da doin dale, leo Sanherib neu.

¹⁶ Lilopilas manai Manetualain Uman-na lelesun-nala, ma lilopilas fo, Hizkia nde tao matan neu lelesu-la ai batubalan-nala, ana ho'i-nalas, de ana haituas leo Sanherib neu.

¹⁷ Tehu, mane Asyur ndia, haitua solda'du bubua matuaina esa, neme Lakhis mai, fo leu sapu-la Yerusalem. Malanga solda'du manai lain 3, lauli-lalanga solda'du bubuak ndia, fo nde malanga solda'du manai lain esa, malalu-maoono nininuk esa ma esa neme, manek-ka manamanean-nala, malangan-na mai, Lelek, ala losa kota ndia, boema ala ho'i mamanak nai tina, fo loken lae Tina Penatu, fo ana deka no, oelolok fo manafaa neme lifu manai lain-na mai.

¹⁸ Boema ala eki, fo laloo Manek Hizkia. Boema Hizkia hataholi mana'a ngga'din 3 leo deak mai, de latongo loos. Hataholi mana'a ngga'di ka 3-k sila nde, Elyakim fo Hilkia anan-na. Hilkia ia, nde da'di uma manek-ka, malanga uma loon-na, Sebna, fo nusaina, hataholi manasulak susulan-na, ma Yoah, fo Asaf anan-na. Asaf ia, nde da'di uma manek-ka, hataholi nanasulak susulan-na.

¹⁹ Asyur malanga solda'du manai lain sila-la, esa nafa'das nae, “Manduku-malosak, mane Asyur-ra halan ia, neu Hizkia mae: ‘Tao le'e de, o dodoo mae, o mabe'i-balakaik?

²⁰ O maedaenga, ka'da no hala-kokolak-ka, fo bisa nggati solda'du-la be'i-balakain do? O mamahenak-ka nde see, de nalosa, o mapalani la'ban Asyur?

²¹ Memak, o mamahena Masir tutulu-fafalin, tehu ndia sama-na leo o pake fii dook-ka, da'di leo aitete'ek; neukose, aitete'ek ndia la'din, fo ana pau tola o limam-ma. Mane Masir-ra, ha'da-tataon leondiak, ba'eneu basa hataholi fo, lamahena neun.’ ”

²² Basa boema, Asyur malanga solda'du manai lain ndia, nafa'da nae, “Do fafa'kama, emi mafa'da, mae emi mamahena neu emi Manetualain do? Nai lelek, Hizkia fe paleta, fo ela hataholi Yehuda-la, ma hataholi Yerusalem-mala, maso-kasasi ka'da nai mei tunu-hotuk manai Yerusalem-ma matan-na, ade nanatao nakalulutuk ndia, ta nde mei tunu-hotuk-ka, ma mamana sene-do'ok neu Manetualain-na hetu?

²³ Besak ia, no mane Asyur-ra na'den-na, au apalani ape'dak, ae metema, fe emi ndala 2.000 soona, tao leo bee-o, neukose emi hataholim-mala ta dai, soaneu sa'e ndala sila fa!.

²⁴ Soaneu la'ban ami malanga solda'du manai daeanak-kala boeo, emi ta bisa sengi fas. Tehu, emi mamahena Masir tulu-fali emi, nenik ana haitua fe emi kaleta musu ma solda'du manasa'e ndala boe!

²⁵ Emi maedaenga, ami sapu-ma emi, de ami sengi emi nusam-ma, ta no Manetualain tutulu-fafalin fa do? Manetualain nde nadenu ami sapu, ma ami tao makalulutuk mamanak ia!”

²⁶ Boema Elyakim, Sebna, ma Yoah lafa'da malanga solda'du manai lain ndia lae, “Tuan, kokolak mo ami, nenik ka'da dede'ak Aram, fo ami malelak-kana. Boso pake dede'a Ibrani, te neukose laun manai papala nanadamaak ndia lain, lalelak-kana.”

²⁷ Malanga solda'du manai lain ndia, nataa nae, “Ade, mane Asyur-ra, nadenu au anduku-alosak basa ia-la, ta ka'da neu emi ma emi manem-ma mesak-kana do? Ta! Au boeo kokolak o laun, fo langatuuk nai kota papala nanadaman ndia lain, fo neukose, emi basa-basam-mala, mi'a seluk emi teim-ma, ma minu seluk emi moem-ma.”

²⁸ Basa boema, malanga solda'du manai lain ndia, napadeik, de ana eki nai dede'a Ibrani-a dalek nae, “Mamanene hata fo, manek Asyur-ra nafa'dan nae;

²⁹ ‘Boso nau Hizkia ke'dindiu emi; ana ta bisa soi-tefa-nala emi fa.

³⁰ Boso mamanene fufu'di-oo'don, fo mamahena neu Manetualain. Boso maedaenga, neukose Manetualain soi-tefa-na emi, do kena-ka'i-na Asyur solda'dun-nala, fo latona-la emi kotam-ma.

³¹ Boso mamanene Hizkia. Au, fo mane Asyur-ra paleta, fo ela emi kalua meme kota dale mai, fo manaku kala leona. Mahani te, emi bole mi'a angol boak, neme emi osi mesam-ma mai, ma mi'a mita kaa boak, neme emi ai kaa mesam-ma mai, ma minu oe, neme emi oedolu masem-ma mai,

³² losa au lali heok emi leo nusak esa meu, fo nusak ndia, hii-hii nae sama leo emi nusam-ma boe. Nai naa, hapu osi angol, fo ana fe o buna-boak, ma tina gandum, fo ana fe buna-boa ha'de sopuk, soaneu emi nana'am-ma. Nai nusak ndia, hapu ai setun makadotok, mina setun, ma fanioe. Metema, emi tunga hata fo au paletan neu emi soona, neukose emi maso'da, te ta mate fa. Boso mamanene Hizkia! Ndia ka'da ke'di-ndiu emi nenik nafa'da nae, neukose Manetualain soi-tefa-na emi.

³³ Ade, leoina fe'ek-kala, lamatua daebafan-na, soi-tefa nita nusan-na neme au koasang-nga mai so do beik?

³⁴ Nusa Hamat ma Arpad-ta, lamatua daebafan-nala lai bee? Sefarwaim, Hena ma Iwa, lamatua daebafan-nala lai bee? Ade, hapu hataholi mai, fo soi-tefa-na Samaria do?

³⁵ Lamatua daebafak bee kande, soi-po'i nita nusan-na, neme au koasang-nga mai so. Hapu nai bee, Manetualain soi-tefa-na Yerusalem?’ ”

³⁶ Laun Yerusalem-mala lamanene ndia boema, ta lataa fa, nana Manek Hizkia fe basa paleta, fo ela ala bee denge.

³⁷ Boema Elyakim, Sebna, ma Yoah sii-sii-lulu'i bua papaken-nala, da'di neu ta'du-tana dale he'dik, boema leu lafa'da malanga solda'du manai lain ndia, hala-kokolan sneu manek-ka.