2RAJA-RAJA 15 - Susula Malalaok Hehelu Palak Ma Hehelu Beuk

Uzia, mane Yehuda

¹ Mane Yerobeam II, paleta Israel neu teu ka 27-na boema, Uzia, fo Amazia anan-na, da'di manek Yehuda.

² Nai lelek ndia, teun 16, de ana paleta nai Yerusalem, teuk 52 dalen-na. Inan na'de Yekholya, fo ina Yerusalem ndia.

³ Sama leo aman Uzia boe, de ana tao hata fo, nandaa no Manetualain dalen-na.

⁴ Tehu, susuek la'iesak-kana, ana ta tao nakalulutuk, mamana sosongo-tatangok neu, lamatua daebafak-ka fa, de nalosa laun-na tunu-hotu nahele tutunu-hohotuk, ma ala tunu boomenik, nai ndia.

⁵ Boema, Manetualain taon-nan, doi-doso no he'di lou mangalauk-ka, losa maten te, he'din ndia, ta lea-hai fa. Ala fen leo fe'e, mesak-kana nai uma esa dalek, ma ala ta fen tao bela-ba'uk fa. Anamanen Yotam, ana paleta laun-na, da'di leo lima boa konan-na.

⁶ Tutui fe'ek la'eneu mane Uzia, nanasulak nai Mane-manek Yehuda-la susula Tutuin dale.

⁷ Uzia maten, de latoin nai mana-manek manai Kota Dauk-ka, mamana loo-laten-na. De anamanen Yotam, nggatin da'di manek.

Zakharia, mane Israel

⁸ Mane Uzia, paleta Yehuda neu teu ka 38-na boema, Zakharia, fo Yerobeam II anan-na, da'di mane Israel-la, de ana paleta nai Samaria, bulak 6 dalen-na.

⁹ Saman-na leo mane-manek manapaleta makahuluk-kala, de ndia boeo, nasala-nasingo neu Manetualain. Ana tunga mane Yerobeam ka 1 tatao-nono'i mangalaun-na, de ana taon-na Israel nasala-nasingo.

¹⁰ Salum, fo Yabesh anan-na, tao nakabua makahatuk, fo la'ban mane Zakharia, de ala taolisan neme Yibleam, boema ana nggatin da'di manek.

^11-12 No enok ndia, hata fo Manetualain helu basan neu Mane Yehu-a, ana da'di, fo nae upu-anan losa tititi-nonosi ka 4, neukose da'di manek neu Israel. Tutui fe'ek la'eneu mane Zakharia, nanasulak nai Mane-manek Israel-la susula Tutuin dale.

Salum, mane Israel

¹³ Mane Uzia, paleta Yehuda neu teu ka 39-na boema, Salum, fo Yabesh anan-na, da'di mane Israel. Ana paleta nai Samaria ka'da bulak 1,

¹⁴ nanahu Menahem, fo Gadi anan-na, neme Tirza leo Samaria neu boema, ana taonisa Salum, de ana nggatin da'di manek.

^15-16 Nai leleo-lala'on neme Tirza dalek mai, Menahem tao nakalulutuk la'iesak kota Tifsah, ma nggolo-nggolok manai boboa-kaisun-nala, boema ana tao namopo-namate basa laun-nala lala'en-na. Hu kande, kota ndia ta nau nakatele neu fan, boema ana saika'di inak-kaiulus manai kota ndia, tein-nala. Tutui fe'ek la'eneu Mane Salum-ma, ma nakabua makahatun-na boeo, nanasulak nai Mane-manek Israel-la, susula Tutuin dale.

Menahem, mane Israel

¹⁷ Mane Uzia, paleta Yehuda neu teu ka 39-na boema, Menahem, fo Gadi anan-na, da'di mane Israel, de ana paleta nai Samaria, teuk 10 dalen-na.

¹⁸ Nai fai maso'dan-na dalek, ana nasala-nasingo neu Manetualain, nanahu ana tunga Mane Yerobeam 1 tatao-nono'i mangalaun-na, de ana taon-na hataholi Israel-la, lasala-lasingo.

¹⁹ Lelek Pul fo Manek Asyur-ra sapu-na Israel, boema Menahem fen lilofulak kilo 34.000 fo ela ana tulu-falin, fo tao natea-nahele Menahem koasan-na neu Israel.

²⁰ Menahem hapu doik sila-la, tunga enok kande, nakaseti hataholi kamasuik manai Israel-la, fo esan-na fe doi fulak 50. Hu ndia de, Pul la'oela nusak ndia, de ana fali ne'un leo nusan-na neu.

²¹ Tutui fe'ek la'eneu Mane Menahem-ma, nanasulak nai Mane-manek Israel-la, susula Tutuin dale.

²² Maten de latoin, boema anan Pekahya nggatin da'di manek.

Pekahya, mane Israel

²³ Mane Uzia paleta Yehuda neu teu ka 50-na boema, Pekahya, fo Menahem anan-na, da'di mane Israel, de ana paleta nai Samaria teuk 2 dalen-na.

²⁴ Ana nasala-nasingo neu Manetualain, nanahu ana tunga Mane Yerobeam I tatao-nono'i mangalun-na, de ana taon-na hataholi Israel-la lasala-lasingo boe.

²⁵ Malanga solda'du manai lain esa, fo nde Pekah, fo Remalya anan-na, ana tao nakabubua makahatuk no hataholi 50, leme Gilead mai. Boema, ala taolisa Pekahya, sama-sama no hataholi fe'ek 2, fo nde Argob ma Arye, neme kama esa dalek, fo nai uma manek manai Samaria. Basa boema, Pekah da'di manek nggati Pekahya.

²⁶ Tutui fe'ek la'eneu Mane Pekahya, nanasulak nai Mane-manek Israel-la, susula Tutuin dale.

Pekah, mane Israel

²⁷ Mane Uzia, paleta Yehuda neu teu ka 52-na boema, Pekah, fo Remalya anan-na, da'di mane Israel. Ana paleta nai Samaria, teuk 20 dalen-na.

²⁸ Ana nasala-nasingo neu Manetualain, nanahu ana tunga Mane Yerobeam 1 tatao-nono'i mangalun-na, de ana taon-na hataholi Israel-la nasala-nasingo.

²⁹ Nai tepo-lelek Pekah paleta, Tiglat-Pileser, fo mane Asyur-ra, natona-na kota Iyon, Abel-Bet-Maakha, Yanoah, Kedes, Hazor, nusa Gilead, Galilea ma Naftali. Laun-nala nanafook boe, da'di leo hataholi nanafook leo Asyur leu.

³⁰ Mane Yotam, fo Uzia anan-na, paleta Yehuda neu teu ka 20-na boema, Hosea, fo Ela anan-na, tao nakabua makahatuk, fo la'ban mane Pekah, de ana taonisan, boema ana nggatin da'di manek.

³¹ Tutui fe'ek la'eneu Mane Pekah, nanasulak nai Mane-manek Israel-la, susula Tutuin dale.

Yotam, mane Israel

³² Mane Pekah, fo Remalya anan-na, paleta Israel neu teu ka 2-na boema, Yotam, fo Uzia anan-na, da'di mane Yehuda.

³³ Nai lelek ndia, teun 25, de ana paleta nai Yerusalem, teuk 16 dalen-na. Inan nde Yerusa, fo Zadok anan-na.

³⁴ Yotam tao hata fo, nandaa no Manetualain dalen-na, sama leo aman Uzia.

³⁵ Tehu susuek la'iesak-kana, ana ta tao nakalulutuk mamana sosongo-tatangok neu lamatua daebafak-ka fa, nalosa laun-na ka'da tunu-hotu, tutunu-hohotuk lahele ma ala tunu boomenik nai ndia. Yotam nde nafofo'a Lelesuina Kii, fo nai Manetualain Uman.

^36-37 Nai tepo-lelek Yotam paleta, Manetualain mulai haitua Rezin, fo mane Siria, ma Pekah, fo mane Israel-la, fo leu sapu-la Yehuda. Tutui fe'ek la'eneu Mane Yotam-ma, nanasulak nai Mane-manek Yehuda-la, susula Tutuin dale.

³⁸ Maten, de latoin nai Mane-manek manai Kota Dauk-ka, mamana loo-laten-na. Anan Ahas, ana nggatin da'di manek.