2RAJA-RAJA 13 - Susula Malalaok Hehelu Palak Ma Hehelu Beuk

Yoahas mane Israel

¹ Yoas, fo Ahazia anan-na, paleta Yehuda neu teu ka 23-na boema, Yoahas, fo Yehu anan-na, da'di mane Israel, de ana paleta nai Samaria, teuk 17 dalen-na.

² Sama leo mane Yerobeam-ma, fo ana paleta nakahuluk neme Yoahas mai, Yoahas nasala-nasingo neu Manetualain de ana taon-na hataholi Israel-la boeo, lasala-lasingo. Ana ta tu'u-tapa heni tatao-nono'i mangalaun-na, makandondook fa.

³ Hu nde de Manetualain namansa Israel, nalosa Ana po'ilotak Hazael, fo mane Siria, no anan Benhadad, sengi Israel-la'i nono'ik.

⁴ Boema, Yoahas hule-haladoi neu Manetualain, de Manetualain namanene hule-haladoin ndia, nanahu Manetualain nita mane Siria no tatao-nono'i ha'da hataholi taa-na, de ana tuni-ndeni nangge'a hataholi Israel-la.

⁵ Manetualain fe hataholi Israel-la, mauli-malangan esa, fo ana so'i-pois leme Siria koasan-na mai, nalosa laso'da no mole-dame seluk, sama leo makasososan-na.

⁶ Leomae leondiak boe, hataholi Israel-la, ta hahae tao sala-singok-ka fa, fo mane Yerobeam-ma nde mulai nakahuluk-ka. Ala tao lakandoo sala-singok sila-la, ma ala po'ilotak lamatua daebafa Inak Asyera, dodoki-dudulan nahele neme Samaria.

⁷ Mane Siria, ana tao nakalulutuk Israel solda'dun-nala so, nalosa ela ka'da mane Yoahas-sa, solda'du manasa'e ndalan 50, kaleta musu 10, ma solda'du anak 10.000.

⁸ Tutui fe'ek la'eneu mane Yoahas-sa, ma basa tatao-nono'i malolen-nala da'di leo, palani tati batun-na, nanasulak nai Mane-manek Israel-la, susula Tutuin dale.

⁹ Maten, de latoin nai Samaria. Boema, anan Yoas, nggatin da'di manek.

Yoas mane Israel

¹⁰ Mane Yoas-sa, paleta Yehuda neu teu ka 17-na boema, Yoas, fo Yoahas anan-na, ana da'di mane Israel, de ana paleta nai Samaria teuk 16 dalen-na.

¹¹ Ndia boeo, nasala-nasingo neu Manetualain nanahu ana tunga mane Yerobeam-ma, tatao-nono'i mangalaun-na, de ana tao-na hataholi Israel-la, tao sala-singok.

¹² Tutui fe'ek la'eneu Mane Yoahas-sa, ma palani ta'ti batun-na nai natee-natatik, la'ban Amazia, fo mane Yehuda, nanasulak nai Mane-manek Israel-la susula Tutuin dale.

¹³ Yoas maten, de latoin nai Mane-manek manai Samaria-la, mamana loo-laten-na. Boema, Yerobeam 2, fo anan-na, ana nggatin da'di manek.

Elisa mamaten-na.

¹⁴ La'iesa boema, Nabi Elisa namahe'di belak, de Mane Yoas-sa, neu donge-daman. Lelek, nita Elisa hihii maten boema, manek ndia kii ma nae, “Au Amang, au Amang, o manamasala'e matuaina, ba'eneu Israel!”

¹⁵ Boema, Elisa paletan nae, “Ho'i-ma kokouk-ka, no ma isin-na!” Boema, Yoas ho'i-nan,

¹⁶ boema Elisa nadenun, fo naheheleaon, fo ana kou. Manek-ka naheheleaon leona, de Elisa tao liman-na neu manek-ka liman lain.

¹⁷ Basa boema, nandaa no nabi ndia paletan-na, de manek-ka soi heni jendela fo mananasale leo Siria neu-a. Boema, Elisa paleta nae, “Po'i o kokou-ma, isin-na neu leona!” Tutik-ka, manek-ka po'i kokou isin-na neu, boema nabi ndia naloo bou-bou nae, “O nde been-na, Manetualain kokou isin-na. No kokou isik ndia, neukose Manetualain sengi Siria. Neukose o matee-mata'ti la'ban hataholi Siria manai Afek-kala, losa o sengis.”

¹⁸ Elisa nadenu mane Yoas-sa, ho'i-na kokou isi fe'en-nala, fo ana fepas neu dae-a. Manek-ka fepa dae-a, la'i 3, boema ana hahae.

¹⁹ Elisa namanasa, de nafa'da nae, “Tunga ndoon-na, o muse fepa la'i 5 do la'i 6, soona o hapu taom-ma, leoina Siria, lutu-lutu. Tehu besak ia, neukose o sengin ka'da la'i 3.”

²⁰ Basa ndia boema, mate Elisa, de latoin. Nai tepo-lelek ndia, Moab hataholin manatao nakabua makahatun-nala, biasan-na, teuk 1 soona, ala sapu-la nusa Israel-la la'i 1.

²¹ Nai faik esa, fo nai lelek hataholi de'ubee bei latoi mamates-sa te, no kaiboik, lita Moab hataholin manatao nakabua makahatun-nala, ala mai. Tutika, ka'da ala tapa mamates ndia, leo Elisa bolo mamaten dale neu, de lalai. Leondiak, mamates ndia koila'e Elisa duin-nala, tutika naso'da falik, de ana fo'a napadeik.

Israel no Siria latee-lata'ti

²² Nai tepo-lelek Yoas paleta, Hazael, fo mane Siria, ana tuni-ndeni hataholi Israel-la.

²³ Tehu, Manetualain dalen-na, tu'da kasian neu anan-nala, de Ana fe do'o do ampon neus. Ana ta nau po'ilotak-kasa nanatao namopo-namatek fa, de Ana tulu-falis, hu kande hehelu-balataan no Abraham, Isak ma Yakob. Losa besak ia, ta nafandele heni anan-nala la'iesa boen.

²⁴ Basa boema, mate Hazael, fo mane Siria, de anan Benhadad, da'di manek.

²⁵ Boema Yoas, fo mane Israel-la, sengi Benhadad la'i 3, de ana ho'i falik kota-kota fo, Benhadad natona nalas ndek tepo-lelek Yoas aman, fo mane Yoahas-sa, ana paleta.