2RAJA-RAJA 12 - Susula Malalaok Hehelu Palak Ma Hehelu Beuk

Yoas Mane Yehuda

¹ Yehu paleta Israel neu teu ka hitun-na boema, Yoas da'di mane Yehuda. Ana paleta nai Yerusalem, teuk haahulu dalen-na. Inan na'de Zibya, fo neme kota Bersyeba mai.

² Hu kande, Imam Yoyada nanoli-nafa'dan-na, de nai Yoas maso'dan-na dalek, ana tao hata fo nandaa no Manetualain dalen-na.

³ Tehu, leomae leondiak boe, ana ta tao nakalulutuk lamatua daebafak-ka, mamana sosongo-tatangon fa, de nalosa laun-na bei tunu-hotu tutunu-hohotuk, ma tunu boomenik nai ndia.

⁴ Faik esa boema, Yoas naloo basa imam-nala, de nadenus, fo ala pe'da doik fo, ala hapus neme tutunu-hohotuk nai Manetualain Uman, nau doik fo nanaba'ek, nai lelek ala tao feta tutunu-hohotuk, do doi fee-feek, fo hataholi-a fe no dale hihii-nanau mesan-na.

⁵ Imam-mala esa-esak, muse pe'da doik fo, sila-lalau-laoono hataholi-la, tunu-hotuk-kala. Sanga pake doik sila-la, soaneu tao lahii Manetualain Uman-na nalutun-nala.

⁶ Losa Yoas paleta neu teu ka 23-na te, basa imam-mala, beita tao lahii Manetualain Uman-na nalutun-na boen.

⁷ Hu ndia de, Yoas naloo Imam Yoyada, no imam fe'ek-kala, de nafa'das nae, “Tao le'e de, emi beita tao mahii Manetualain Uman-na boen? Mulai faik ia, ta bole pe'da doik fo, emi sipok-kala fa. Emi muse fe la'iesak-kasa mai, soaneu tao nahii Manetualain Uman-na.”

⁸ Imam-imam-mala lakaheik, sila ta bole pe'da doik maneme laun-na mai fa, ma ala ta nau mete-lakanae Manetualain Uman-na tao nahiin-na so'on.

⁹ Boema, Yoyada ho'i-na peti anak esa, de ana tao bolok neu tatanan-na, boema ana pe'dan deka no mei tunu-hotuk-ka nai lelesu masok leo Manetualain Uman-na, boboan kona. Imam fo, nalalau-naoono nai lelesu leo dalek neu-a, muse tao doik fo, nanatunu-hotuk nai Manetualain Uman-na, leo peti ndia dalek neu.

¹⁰ Ma metema, doik manai peti ndia dalek ba'uk-ka soona, manek-ka hataholi manasulak susulan-na, sama-sama no Imam manai lain-na, ala mai, fo ala leke doik sila-la. Soona, ala pe'da falik-kana.

¹¹ Metema, ala sulak basa dede'un-na soona, ala fe doik sila-la, leo basa manamanea hataholi manatao lahii Manetualain Uman-na neu. Basa soona, basa manamanea sila, ala bae basa tuka ai-la, tuka uma,

¹² tuka batu, ma manapa'a batu-la. Manamanea sila-la boeo, nde asa ai ma batu, boema ala ito-ato basa doik fo manakaluak, soaneu tao nahii Manetualain Uman ndia.

¹³ Tehu ala ta pake doik sila-la faaanak boen, soaneu tao mango tee lilofulak, mango, pupuuk, banuk-ka bua-lo'an, do bua-lo'a fe'ek neme lilopilas do lilofulak-ka mai.

¹⁴ Ala bae basa doik sila-la, neu tuka-la, ma neu uma ndia paluun-nala.

¹⁵ Basa manamanea bela-ba'uk sila-la, dalen-nala ndoos, de ta paluu lafa'da doik-kala maso-kaluan fa.

¹⁶ Doik maneme tutunu-hohotuk soi salak-ka, tutunu-hohotuk fe do'o do ampon neu sala-singok-ka, ta taos leo peti ndia dalek neu fa. Ala fe doik sila-la, leo imam-imam-mala neu.

¹⁷ Nai tepo-lelek ndia, Hazael, fo mane Siria, ana sapun-na kota Gat-ta, de nangatuu-nan. Boema, ana tutu'u seluk, fo neu sapu-na Yerusalem boe.

¹⁸ Boema, Yoas haitua fe Hazael doik, fo boso neu sapu-na Yerusalem. Ana hapu doik sila-la, neme basa tutunu-hohotuk, fo makahulun-na Yoas, ma Yosafat, Yoram boema Ahazia, fo manek sila-la, ala paleta lakahuluk neme Yoas mai. Manek sila-la, ala fe basa doik sila neu Manetualain so. Yoas fe basa lilopilas manai kas, fo nai Manetualain Uman dale, ma manai manek-ka uma manen-na boe. Hu ndia de, Hazael ta da'di sapun-na Yerusalem fa.

^19-21 Basa boema, nusa Yehuda hataholi mana'a ngga'din-nala, tao nakabua makahatuk, fo la'ban Mane Yoas-sa. De nakabua makahatuk ndia, hataholin 2, fo nde Yozakar, fo Simeat anan-na, ma Yozabad, fo Somer anan-na, ala taolisa Yoas nai uma esa dalek. Uma ndia napadeik nai dae nanapo'ak lain, nai Yerusalem boboan dulu, fo nai eno loloek leo kota Sila neu. Latoi Yoas nai mane-manek fo manai kota Dauk-ka, mamana loo-laten-na. Boema Amazia, fo Yoas anan-na nggatin da'di manek. Tutui fe'ek la'eneu Mane Yoas-sa, nanasulak nai Mane-manek Yehuda-la susula Tutuin dale.