2RAJA-RAJA 1 - Susula Malalaok Hehelu Palak Ma Hehelu Beuk

Elia ma Mane Ahazia

¹ Mate basa Ahab, fo mane Israel-la boema, nusa Moab-pa, ta nau tunga paleta so'on, de ala la'ban Israel.

² Faik esa boema, Mane Ahazia neme Israel mai, de ana tu'da neme uma manek manai Samaria, ta'dak lain mai, nalosa makahina belak. Boema nadenu hataholi, fo neu natane Baal-Zebub, fo kota Ekron-na nai Filistin, lamatua daebafan-na, ade neukose ana lea-hai do ta.

³ Tehu Manetualain ata nusa so'dan esa, nadenu Elia, fo nabi esa neme Tisbe mai, fo neu natongon-no Mane Ahazia, hataholi nadedenun sila-la, fo nafa'das nae, “Ade, nai Israel ta hapu Manetualain so'on, de nalosa, emi nau meu moke natutu'duk, neme Baal-Zebub, fo kota Ekron-na lamatua daebafan ndia mai?

⁴ Mafa'da manek-ka mae Manetualain nafa'da nae leo ia, ‘Neukose, o ta lea-hai fa, te neukose mate o!.’ ” Elia nakalala'ok basa Manetualain paletan ndia boema,

⁵ hataholi nadedenuk sila-la, fali le'us leo manek-ka leu, boema manek-ka natane nae, “Tao le'e de, emi fali ma'im-ma?”

⁶ Boema lataa lae, “Touk esa mai, de nadenu ami fali ma'im-ma, fo ami mafa'da Manetualain halan-na, neu Ama Manek nae leo ia, ‘Ade ta hapu Manetualain nai Israel so'on, de nalosa o madenu ami neu moke natutut'duk neme Baal-Zebub, fo kota Ekron-na, lamatua daebafan-na? O ta lea-hai so'on, de neukose mate o!.’ ”

⁷ Boema, manek-ka natane nae, “Hataholi ndia mataaon leo beek?.”

⁸ Boema lataa lae, “Ba'du manalun-na, no kalikee-na, nanataok neme bana louk-ka mai.” Manek-ka nae, “O, Elia nde ndia!”

⁹ Boema, nadenu malanga solda'du manai lain esa, no solda'du anan 50, fo leu ho'u Elia. Malanga solda'du manai lain ndia neu boema, nita Elia bei nangatuuk nai pupukuk esa lain. Malanga solda'du manai lain ndia, nae, “Hai Manetualain atan-na nei, manek-ka paleta o, fo kona leona!.”

¹⁰ Boema, Elia nata nae, “Metema, memak au ia Manetualain atan soona, ela leo been-na, ha'i-a kona neme lalai mai, fo ana hotunisa, o moo basa o solda'du anam-mala!” No hatematak ndia boe, ha'i kona mai, de ana hotunisa malanga solda'du manai lain ndia, no solda'du anan ka 50-nala.

¹¹ Boema, manek-ka nadenu malanga solda'du manai lain fe'ek esa, no solda'du anan 50, ala leu boema lafa'da Elia lae, “Hey, Manetualain atan-na, Manek-ka paleta nae besak ia boeo o kona!”

¹² Boema Elia nataa nae, “Metema, memak Manetualain atan au soona, ela leo been-na, ha'i-a kona neme lalai mai, fo ana hotunisa o moo basa o solda'du anam-mala!” No hatematak ndia boe, ha'i neme Manetualain mai, de ana hotunisa malanga solda'du manai lain ndia, no solda'du anan ka 50-nala.

¹³ La'iesa seluk, manek-ka nadenu malanga solda'du manai lain esa, no solda'du anan 50. Malanga solda'du manai lain ndia, kae leo pupukuk lain neu, de ana losa Elia matan-na, boema ana senek, ma nae “Fe do'o do ampon neu ami, ou Manetualain atan-na! Sue-lai au, ma au solda'du anang ia-la. Boso taomisa ami!

¹⁴ Ha'i-a neme lalai mai, de na'anisa malanga solda'du manai lain fe'ek dua, loo solda'du ana-nala, tehu au dokodoe, fo sue-lai au!.”

¹⁵ Nai hatematak ndia boe, Manetualain ata nusa so'dan-na, nafa'da Elia nae, “Boso bii! Tungan, fo kona meme pupukuk ia lain mai leona” hu ndia de, Elia no malanga solda'du manai lain ndia, leu leo manek-ka leu.

¹⁶ Boema Elia nafa'da manek-ka nae, “Manetualain nae, ‘O madenu hataholi neu noke natutu'duk neme Baal-Zebub, fo kota Ekron-na, lamatua daebafan-na, nono'ka bai, ta hapu Manetualain nai Israel so'on, fo o bole matane neun fa. Hu ndia de, o ta lea-hai so'on, de neukose mate o!’ ”

¹⁷ Boema, mate Ahazia, sama leo Manetualain nafa'dan tunga Elia. Hu kande, Ahazia ana taon ta, de tolanoon Yoram, ana nggatin da'di manek. Ndia da'di ndek Yehoram, fo Yosafat anan-na, ana da'di manek nai Yehuda, de ana paleta nai teu ka dua-na.

¹⁸ Tutui fe'ek la'eneu hata fo mane Ahazia taon, nanasulak nai Mane-mane Israel-la susula Tutuin dale.