1 TAWARIKH 29 - Susula Malalaok Hehelu Palak Ma Hehelu Beuk

Tutulu-fafalik soaneu Manetualain Uman-na nafofo'an-na

¹ Boema Dauk nafa'da basa hataholi manamakabubuak lai sila-la nae, “Neme basa au anamaneng-nala mai te, Manetualain helek-ka nde Salomo. Tehu Salomo bei muli-soluk nanseli ma malelan-na beita dai fa, te se'kona tatao-nono'ik ia ba'un-na seli. Basa bai te, nananafofo'ak ia ta uma manek soaneu hataholi daebafak fa, tehu uma soaneu Manetualain.

² Au sadia basa uma ndia ai batun ma hata-heton tunga au nabe'ing-nga so. Au sadia basa lilopilas, lilofulak, liti, besi, ai, batu kabelik-kala ma batu-batu poemata, batu madulak mata-matak-kala soaneu balias uma ndia, ma batu marmar makadotok nanseli.

³ Nakalenak hu kande au susue-lalaing ba'un-na seli soaneu au Manetualaing-nga Uman ndia de, au fe basa au lilofulang lilopilang neme hata-heton-nala mai boe;

^4-5 lilopilas neulauk ton natun esa ma lenak, ma lilofula isik fafa'kama ton natun dua haahulu soaneu nakadiditak-kasa neu Manetualain Uman-na papalan-na, ma soaneu bua-lo'as fo manatao-no'i malelak-kala muse tao-no'in. Nah, besak ia see seluk bai, fo anan nau fe tutunu-hohotun neu Manetualain no dalek-katematuak?”

⁶ Boema basa malangan teidale-bobongik-kala, mane leo-la, basa malanga solda'du matuaina-la ma basa manaho'u manek-ka hata-heton lala'en-na lafa'da lae sila boeo hii fe tutulu-fafalik.

⁷ Boema sila boeo fe tutulu-fafalik soaneu Manetualain Uman ndia nafofo'an-na nenik tutulu-fafalik-kala nde ia: lilopilas ton natun esa hituhulu ma lenak, lilofulak ton natun telu haahulu ma lenak, liti hihiinae ton natun nee duahulu, ma besi ton lifun telu natun haa ma lenak.

⁸ Hataholi mabatu poematak-kala ala fen leo Yehiel neu fo ana taos leo Manetualain Uman-na peti pepe'da doin dale neu. (Yehiel nde been-na hataholi Lewi esa fo neme teidale-bobongik Gerson-na mai.)

⁹ Laun-na fe no dalek-katematuak neu Manetualain, de ala lamahoko nanahu sila fe basa ba'uk-ka so. Dauk boeo namahoko nanseli.

Dauk koa-kio Manetualain

¹⁰ Manek Dauk-ka koa-kio Manetualain nai hataholi makadotok sila-la matan. Ana nafa'da nae, “Ou Manetualain fo ami bei-ba'i kaim Yakob sene-do'ok-ka, kokoa-kikiok soaneu O losa dodoon-na!

¹¹ Te'e-te'e O matua ma manakoasa. O Mandela-masa'ak, ua-nale malole, ma matua-madema. Basa hata lala'en fo manai lalai ma daebafak-ka nde been-na O nuum. O manek matua-madema ma manakoasa neu basa hata lala'en-na.

¹² Basa su'i-betes ma tetu-temak lala'en-na da'di neme O mai; O kasa basa hata lala'en-na nenik O be'ibalakaim ma O paletam-ma; O manuu koasa tao su'di see da'di hataholi matua ma balakaik.

¹³ Besak ia ou ami Manetualaim-ma, ami moke makasi neu O, ma ami koa-kio O na'dem fo matua-mademam-ma.

¹⁴ Te'e-te'e au ma au laung-nala ta hapu fe O hata esa boen, nanahu basa hata lala'en-na nde been-na O baba'e-babatim ma hata fo ami fek ia nde been-na O nuum boe.

¹⁵ O bubuluk ou Manetualain, mae sama leo basa ami bei-ba'i kaim-mala, ami boeo nai ami so'dam ia dalek da'di leo hataholi manamai ma hataholi nusa dea. Ami so'dam-ma sama leo salaok fo manasapu-lalok-ka, ma ami ta hapu matapo'i meme mamates-sa mai fa.

¹⁶ Ou Amak, fo ami Manetualaim-ma, basa hata-heto kabelik ia-la ami tao makabubuas mai ia soaneu mapadedeik uma esa ba'eneu O, fo ela ami hapu fe ha'da-holomata neu O na'dem fo malalao-malalafum-ma. Tehu basa sila-la, ami sipos leme O mesam-ma mai, ma basa sila-la nde been-na O nuum boe.

¹⁷ Au bubuluk O fola hataholi-a esa-esak dalen ma O mahiik hataholi fo dalen-na isik. No dalek-katematuak ma dalen-namahokok, au fe basa ia-la neu O. Au sakasii basa, tao leo beek de O anam fo manamakabubuak manai ia-la leni fe O sila tutunu-hohotun no dalek-katematuak.

¹⁸ Ou Manetualain, fo ami bei-ba'i kaim Abraham, Isak ma Yakob sene-do'ok-ka, ela leo been-na O manea O anam-mala fo ela ala sue-lai lahele O sama leo besak ia ma tulu-falis fo ela ala lilineka leu O losa dodoon-na.

¹⁹ Fe au anamaneng Salomo hihii-nanau matea-mahelek soaneu tunga basa O paletam-mala ma soaneu nafofo'a uma makaluku-makatele ndia, fo au sadia basa ai batun so.”

²⁰ Ana hule-haladoi basa nae leondia boema, nafa'da hataholi makadotok fo manamaka bubuak manai sila-la nae, “Koa-kio emi Manetualain leona.” Boema basa hataholi sila-la koa-kio Amak, Manetualain fo sila bei-ba'i kain sene-do'ok-ka. Boema ala sene-do'ok soaneu fe ha'da-holomata neu Manetualain ma manek-ka.

²¹ Balahaa boema, ala do'do bana-manu soaneu ala fen neu Manetualain da'di leo tutunu-hohotuk, boema ala baba'en neu basa laun-na lala'en-na. Fe'ek neme ndia mai, ala do'do sapi mane lifun esa, bi'ilopo mane lifun esa ma bi'ilopo ana lifun esa de ala tunu katemak-kasa nai mei tunu-hotuk lain. Ala boeo muse fe angol soaneu tutunu-hohotuk ndia.

²² Faik ndia la'a linu no namahokok nai Manetualain matan. Boema soaneu ka la'i duan-na, ala po'a-benga Salomo da'di leo manek. No Manetualain na'den-na, ala so'un da'di sila manen-na ma Zadok da'di imam.

²³ Boema Salomo nangatuuk kandela manek-ka nggati aman Dauk sama leo hata fo Manetualain naketu basan so. Ndia manek malole de basa leoina Israel-lala'en-na hiapengen.

²⁴ Basa manaho'u paleta-la ma solda'du-la losa Dauk anamane fe'en-nala boeo sipok Salomo koasan-na da'di leo manek.

²⁵ Manetualain tao na basa laun Israel-lala'en-na so'ulaik Manek Salomo-a ma ala taon da'di manek nananita-nalelak neme su'di manek bee mai, fo ana paleta hai Israel so boe.

No keke'uk, Dauk paletan-na nanasulak

²⁶ Dauk fo Isai anan-na, paleta Israel-lala'en-na

²⁷ teuk haahulu dalen-na. Ana paleta nai Hebron teuk hitu dalen-na, ma nai Yerusalem teuk teluhulu telu dalen-na.

²⁸ Ana namasu'i ma nanafe ha'da-holomata de maten nai fai lasin dale. Anamanen Salomo nggatin da'di manek.

²⁹ Tutuik la'eneu Manek Dauk-ka fai mao'dan-na neme makasososan-na losa mate'en-na, nanasula basak nai Nabi Semuel, Nabi Natan ma Nabi Gad-a susulan dale so.

³⁰ Nai susulak sila-la dalek, ala tui la'eneu paletan-na, koasan-na, ma basa manada'dik la'eneu aoinan-na lala'en-na, laeneu Israel ma nusa-nusak manai Israel titia-tatain-nala.