1 TAWARIKH 28 - Susula Malalaok Hehelu Palak Ma Hehelu Beuk

Dauk fe natutu'duk la'eneu Manetualain Uman-na

¹ Manek Dauk-ka paleta fo ela basa mauli-malangan Israel-la lakabubua. Da'di basa maneleo, malangan teidale-bobongik, basa manamanea manek-ka ma anamanen-nala hata-heton boema bana-manun-nala – dede'a keke'un-na, basa uma manek-ka hataholi matua-mademan-nala, malanga solda'du matuaina-la ma hataholi nananita-nalelak-kala, fo basa-basas lakabubua lai Yerusalem.

² Dauk napadeik neu matan-nala de nafa'da nae, “Au tolano-tolanoong fo leoina esa, mamanene dei! Dook-ka so, au tutu'u apadedeik uma batu esa soaneu Peti Hehelu-balataak fo da'di ita Manetualain tata'bu ein-na. Au sadia basa hata lala'en-na soaneu apadedeik uma sene-do'ok esa neun.

³ Tehu Manetualain kena-ka'i au tao dede'ak ndia, nanahu au solda'du esa de au taoisa hataholi ba'u so.

⁴ Amak, Manetualain, fo Israel sene-do'ok-ka, hele basa au ma au tititi-nonosing soaneu paleta Israel losa dodoon-na. Soaneu sadia mauli-malangan esa, boema Ana hele leo Yehuda, de neme leo ndia mai de Ana hele au amang teidalen-na. Ma neme basa au amang teidalen sila-la mai, Ana nau hele au, de Ana tao au da'di manek neu basa Israel-lala'en-na.

⁵ Ana fe au anak makadotok, de neme basa au anang sila-la mai, Ana hele Salomo soaneu paleta Israel, fo Manetualain nusan-na.

⁶ Manetualain nafa'da au nae leo ia, ‘Salomo, fo o anam-ma, neukose nafofo'a uma soaneu Au. Au hele basan da'di Au anang so, ma neukose Au da'di ndia aman.

⁷ Metema no te'e-te'ek ana tunga basa Au hoholo-lalaneng ma Au paletang-ngala nahele sama leo hata fo ana taon besak ia soona, neukose Au tao atea-ahele nusan-na losa dodoon-na.’ ”

⁸ Boema Dauk kokolak nakandoo nae, “Da'di besak ia, au laung-ngala lemin, nai ita Manetualain matan ma nai basa Manetualain anan fo manai natotongok ia lala'en-na matan, au oke emi tunga no te'e-te'ek neu basa ita Manetualain paletan-nala. No enok ndia, emi hapu manuu mahele nusak fo malole ia ma emi fen neu emi tititi-nonosim fo lanuun losa dodoon-na.”

⁹ Boema Dauk nafa'da Salomo nae, “Anang-ngonei, ela leo been-na Manetualain fo o amam sene-do'ok-ka, o sipok-kana da'di leo o Manetualaim. O muse mamahele neun no dalek-katematuak ma dale ndoos. Nana Ana bubuluk basa ita dudu'a-aafin ma ita dale hihiin-na. Metema o sangan soona, neukose o hapun, tehu metema o la'oelan soona, neukose Ana ta sipok o losa dodoon-na fa.

¹⁰ Mafandendelek matalolole mae Manetualain hele basa o soaneu mapadedeik uma hehelik ba'eneun. Nah, besak ia taon no hihii-nanauk matea-mahelek leona.”

¹¹ Basa ndia boema, Dauk fe gambar soaneu Manetualain Uman-na, gudang-ngala, basa Kaman-nala, ma Kama Malalao-malalafuk nanseli-a, mamanak soaneu fe do'o do ampon neu sala-singok-ka.

¹² Dauk boeo ana fe gambar fo ana dodoo basan soaneu uma so'dan-nala no kama manai boboa-kaisun-nala, ma soaneu Manetualain Uman ndia gudang bua-lo'an-nala boema gudang-gudang fo mamana pepe'da tutunu-hohotuk soaneu Manetualain.

¹³ Boeo ana fen gambar la'eneu ba'e imam-mala ma hataholi Lewi-la tao leo beek, la'eneu bela-ba'uk fo sila muse taon, fo nde sila tatao-nono'in nai Manetualain Uman ma mete-lakanae makaluku-makatele bua-lo'an-nala.

¹⁴ Ana fe natutu'duk la'eneu enon-na leo beek fo tao lilopilas ma lilofulak soaneu da'di bua-lo'as,

¹⁵ soaneu banuk ma banu eik,

¹⁶ soaneu tao mei neme lilofulak-ka mai, ma soaneu mei lilopilas fo mamanak sadia loti ba'eneu Manetualain.

¹⁷ Boeo natutu'duk la'eneu lilopilas isik-ka dede'un fo muse nanapakek soaneu tao kokofuk, mango ma alukosu, la'eneu lilofulak ma lilopilas dede'un-nala soaneu tao pingak-kala,

¹⁸ la'eneu lilopilas isik-kala dede'un-nala soaneu tao mei tunu-hotuk fo mamanak tunu boomenik, ma soaneu taok-kaleta ba'eneu mahahae maso'dak-ka dodoki-dudulan no li'dan fo natabaa nai Manetualain Peti Hehelu-balataan-na lain.

¹⁹ Boema Manek Dauk-ka nae, “Basa sila-la nanasulak nai susulak fo nanasulak nandaa no natutu'duk fo Manetualain nde fen neu au soaneu akalala'ok-kana.”

²⁰ Basa boema Dauk nafa'da seluk anamanen Salomo nae, “O muse mamahele ma mapalani. Mulai ho'u tatao-nono'ik ndia leona, ma boso bii neu hata esa boen. Manetualain fo au sene-do'ok-ka, neukose tulu-fali o. Neukose Ana ta la'oela o fa. Neukose nai o boboam-ma losa basa tatao-nono'ik ndia lala'en-na.

²¹ Baba'e bela-ba'u makaluku-makatele-a nai Manetualain Uman dale, nananaketu basak nai basa imam-mala ma hataholi Lewi-la dalek so. Manatao-no'i malelak nai esa-esak tatao-nono'in-na dalek, neukose no namahokok ala tulu-fali o, ma basa mauli-malangan sama-sama lo basa laun-nala lala'en-na, neukose ala tunga o paletam-ma.”