1 TAWARIKH 26 - Susula Malalaok Hehelu Palak Ma Hehelu Beuk

Manamanea Manetualain Uman na

¹ Baba'e bela-ba'uk soaneu hataholi Lewi fo manamanea Manetualain Uman na. Neme teidale-bobongik Korah, latu'du Meselemya fo Kore neme teidalek Ebyasaf, anan-na.

² Anatoun hitu fo nanasulak tunga teu bobongin nala nde ia: Zakharia, Yediael, Zebaja Yatniel,

³ Elam, Yohanan, Elyoenai.

⁴ Basa boema latu'du Obed-Edom. Manetualain ba'e-palan nenik Ana fen anatouk falu fo nanasulak tunga teu bobongin nala nde ia: Semaya, Yozabad, Yoah, Sakhar, Netaneel,

⁵ Amiel, Isakhar ma Peuletai.

^6-7 Semaya ana ulun Obed-Edom, anatoun nee, fo nde: Otni, Refael, Obed, Elzabad, Elihu ma Semakhya; Basa-basas hataholi nananita-nalelak nai sila teidale-bobongin na dalek, nana sila hataholi ao makadelek, lena-lenak Elihu ma Semakhya.

⁸ Soaneu tatao-nono'i naneak ndia soona, Obed-Edom teidale-bobongin fe touk ao makadelek neehulu dua.

⁹ Teidale-bobongik Meselemya fe hataholi ao makadelek sanahulu falu.

¹⁰ Neme teidale-bobongik Merari latu'du Hosa. Anatoun haa, fo nde: Simri (ana uluk ka ta nde ndia fa, tehu aman so'un da'di mauli-malangan),

¹¹ Hilkia, Tebalya ma Zakharia. Basa-basan lala'en-na, hapu Hosa teidale-bobongin hataholi sanahulu telu da'di manamanea Manetualain Uman.

¹² Basa manamanea Manetualain Uman na, nanaba'ek neu bubua-bubuak kala tunga teidale-bobongin. Sila boeo nanafe bela-ba'uk nai Manetualain Uman dale sama leo hataholi Lewi fe'ek kala boe.

¹³ Teidale-bobongik kala esa-esak, nau teidale-bobongik matua do teidale-bobongik ana boe, ala hela lot soaneu bubuluk sila muse lanea nai lelesuina beek ka

¹⁴ Selemya hapu nai lelesuina boboak dulu. Anan Zakharia, fo ana fe nanoli-nafa'da malole tataasesa, ana hapu nai lelesuina boboak kii.

¹⁵ Obed-Edom hapu lelesuina boboak kona, ma anan nala hapu bela-ba'uk lanea gudang ngala.

¹⁶ Supim ma Hosa hapu lelesuina boboak muli ma lelesuina Syalekhet fo nai eno ndanda'ek ka. Bela-ba'u naneak ka ala ito-ato taon leondiak de nalosa hapu manamanea tataasesa nai lelesuina la.

¹⁷ Tunga faik hapu manamanea nee nai boboak dulu, hataholi haa nai boboak kii, ma hataholi haa nai boboak kona. Hataholi haa lanea gudang ngala boe; fo gudang esa soona, hataholi dua.

¹⁸ Manamanea haa lanea lai enok fo manaleo uma-uma manai boboak muli la, ma manamanea dua lanea lai uma sila-la.

¹⁹ Baba'e bela-ba'u naneak ka neu teidale-bobongik Korah ma teidale-bobongik Merari leondiak.

Bela-ba'u fe'ek nai Manetualain Uman.

²⁰ Hataholi fe'ek manai leo Lewi dalek, ala fes bela-ba'uk soaneu Manetualain Uman na hata-heton ma gudang fo mamana pepe'da tutunu-hohotuk neu Manetualain na.

²¹ Ladan nde been-na Gerson anatoun esa; anan-nakona teidale-bobongik bubuak de'ubee fo teidale-bobongik Yehiel, anan na nai dalek boe.

²² Yehiel anan nala nde: Zetam ma Yoel, de ala fes bela-ba'uk soaneu gudang ngala ma Manetualain Uman na tali-doin.

²³ Amram, Yizhar, Hebron ma Uziel tititi-nonosin boeo hapu baba'e bela-ba'uk.

²⁴ Sebuel neme teidale-bobongik Gersom ma mai, anan Musa, nde been-na manamanea Manetualain Uman na hata-heton.

²⁵ Fo bei teidalek esa no Selomit tunga Eliezer fo Gersom tolanon na. Eliezer tititi-nonosin tutu'dan na losa Selomit nde been-na nde ia: Eliezer, Rehabya, Yesaya, Yoram, Zikhri, Selomit.

²⁶ Selomit no tolano ka'a-fa'din nala hapu bela-ba'uk neu basa tutunu-hohotuk fo Manek Dauk, malanga uma loo la, mauli-malangan teidale-bobongik, ma basa malanga solda'du matuaina la tunu-hotuk kala.

²⁷ Tutunu-hohotuk sila-la nde been-na buas fo ala losolenik kala seli, fo buas sila-la ala hapus nai natee-natatik dale, de ala fes soaneu nanapake hehelik nai Manetualain Uman dale.

²⁸ Dede'a keke'un-na, Selomit no tedalen-nala hapu bela-ba'uk neu basa hata lala'en fo nanafek soaneu nanapake hehelik nai Manetualain Uman dale, nai dalek hapu tutunu-hohotuk fo Manek Saul-la, Abner fo Ner anan-na, ma Yoab fo Zeruya anan-na fen tunga Nabi Semuel-la.

Hataholi Lewi fe'ek-kala bela-ba'un

²⁹ Yizhar tititi-nonosin nde: Kenanya boema anan-nala hapu bela-ba'uk da'di nusaina hataholi manasulak susulan-na ma manakee-manafula nai Israel.

³⁰ Basa ito-ato Agama lala'en-na ma ito-ato paleta nai Israel fo Lee Yarden-na boboan muli, ala fen neu Hasabya, ma neu tolano ka'a-fa'din hataholi lifun esa natun hitu: basa-basas nde been-na tititi-nonosi Hebron-na hataholi nananita-nalelan.

³¹ Tititi-nonosik Hebron-na mauli-malangan nde Yeria. Manek Dauk-ka paleta neu teuk-ka haahulun-na boema, ana palisak matalolole Hebron tititi-nonosin. Nai palisan ndia dalek, ana hapu nai sila dalek hapu solda'du ao makadelek-kala leo lai Yazer fo nai nusak Gilead-a.

³² Basa ito-ato agama lala'en-na ma ito-ato paleta nai Israel fo Lee Yarden-na boboan dulu – fo nde leo Ruben, Gad ma leo Manasye seli, nusan-na – ala fen neu Yeria malanga uma loon lifun duan-natunhitu, fo Manek Dauk-ka helek sila-la basa-basas hataholi nananita-nalelak mesa-mesan.