1 TAWARIKH 19 - Susula Malalaok Hehelu Palak Ma Hehelu Beuk

Dauk sengi leoina Amon ma Siria

¹ Basa teuk de'ubee boema mate manek Amon na, de anamanen Hanun da'di manek.

² Boema nafa'da nae, “Nahas nde been-na au tia-laing fo manalilinekak, da'di au muse tao leondiak boe soaneu Hanun, fo anan na.” Hu ndia de Dauk haitua hataholi nadedenuk neu leo nusak Amon na neu fo ana kokoe-nanasin hu kande aman mamaten na. Lelek ala losa Amon boema,

³ basa mauli-malangan nusak ndia lafa'da Manek Hanun na lae, “Ama Manek boso dodoo mae Dauk haitua hataholi nadedenun sila-la hu kande anan nau fe ha'da-holomata neu Ama Manek! Ana haitua hataholi nadedenuk sila-la leo ia mai, da'di leo mata-mata soaneu ala palisak matalolole ita nusan na, fo ela ala hapu loso lan!”

⁴ Manek Hanun na ho'u na Dauk hataholi nadedenun sila-la, de ana nggeuheni nggolomein-nala, ana kee keke'u bua papaken nala losa tala'da nala, de nadenus ala fali.

⁵ Tehu ala mae no fafalik ka, da'di leu leo Yerikho leu. Lelek dede'ak ndia nananafa'dak neu Dauk boema, ana haitua hala heheluk fo ela hataholi nadedenuk sila-la leo leme Yerikho losa nggolomein-nala moli seluk.

^6-7 Boema Manek Hanun na ma hataholi Amon nala lame'da lae sila tatao-nono'in tao na Dauk musu no sila. Hu ndia de, ala haitua lilofulak kilo lifun teluhulu haa leo nusak Mesopotamia Lain neu, boema leo Maakha ma Zoba nai Siria soaneu ala se'ba kaleta musu lifun teluhulu dua ma solda'du manasa'e ndala la. Boema manek Maakha solda'du nala mai loo basa kaleta musu nanase'bak sila-la, de ala ofu deka loo Medeba. Hataholi Amon nala boeo ala mai leme basa sila kotan nala mai fo latee-latati.

⁸ Lelek Dauk namanene dede'ak ndia boema, nadenu basa solda'du nala lala'en-na tutulumatak fo la'ban musu a.

⁹ Hataholi Amon nala kalua de ala atol sila solda'du nala lakadadaleak lai Raba, fo kota matuainan na lelesuinan na matan-na, te mane-manek fo ala mai tulu-falis ala, lapadeik lakadadalak lai mook ka.

¹⁰ Yoab nita nae solda'du musu a lakahapi lan neme uluk ma neme dea mai. Hu ndia de, ana hele solda'du Israel neulau kala, de ana fes lasasalematak loo solda'du Siria la.

¹¹ Ana fe hataholi Israel lenak kala leo fa'din Abisai neu, fo ala lapadeik lasasalematak loo solda'du Amon nala.

¹² Yoab nafa'da fa'din ndia nae, “Metema solda'du Siria la balakain na lena au soona, lai-lai mai fali au. Boema metema solda'du Amon nala balakain na lena o soona, neukose au ne'i fali o.

¹³ Matetea dalem ma! Mai fo tatee-tatati no napalanik soaneu ita leoinan-na ma soaneu ita Manetualain kota-kota-nala. Sa'di leo been-na Manetualain tao hata fo nahiik kana.”

¹⁴ Yoab no solda'du nala tutulumatak lakandoo, nalosa solda'du Siria la lalai.

¹⁵ Lelek hataholi Amon nala lita solda'du Siria la lalai boema, sila boeo lalai leme Abisai mai, de lakadedeak leo kota dale leu. Latee-latati basa loo hataholi Amon nala boema, Yoab fali leo Yerusalem neu.

¹⁶ Hataholi Siria la bubuluk lae hataholi Israel-la sengi sila so. Boema laloo sila solda'dun fo maleme nusak manai Lee Efrat a boboan dulu, de ladenu sila solda'dun sila-la latee-latati fo Hadadezer manek Zoba ndia malanga solda'du matuainan na fo Sobakh nauli-nalangas.

¹⁷ Dauk namanene dede'ak ndia boema, nakabubua basa solda'du Israel-la lala'en-na, boema ala lena leo Lee Yarden na selik leu de lapadeik lasasalematak loo solda'du Siria la. Boema ala latee-latati leona,

¹⁸ de solda'du Israel-la sengi de solda'du Siria la lakadedeak. Dauk no solda'du nala taolisa hataholi manaho'u kaleta musu lifun hitu ma solda'du manala'o eik lifun haahulu. Ala taolisa Sobakh fo Siria malangan solda'du matuainan ndia boe.

¹⁹ Lelek fo Hadadezer kaosa mane-manek-kala lita lae solda'du Israel-la sengi sila so boema, ala loke mole-dame loo Dauk de lakatele neun. Basa ndia boema, hataholi Siria la ta nau tulu-fali hataholi Amon nala so'on.