1 TAWARIKH 16 - Susula Malalaok Hehelu Palak Ma Hehelu Beuk

¹ Peti Hehelu-balataak ndia nanape'dak nai Lalaa Temak fo Dauk sadia basan soaneu Peti ndia so. Boema ala tunu-hotu fe Manetualain tutunu-hohotuk nanatunuk ma tutunu-hohotuk mole-dame.

² Dauk fe basa tutunu-hohotuk sila-la boema, ana fe baba'e-papalak neu laun-nala nenik Manetualain na'de na,

³ boema ana baba'e fe basa-basas nana'ak. Basa hataholi manai sila-la nau touk do inak boe, esa na hapu paa nanatunuk biak esa, loti ma angol boa tuuk.

⁴ Dauk so'u hataholi Lewi de'ubee soaneu lauli-lalanga feta makaluku-makatele neu Amak, fo Israel Manetualain na, nai Peti Hehelu-balataak ndia matan na, nenik nakameek ma kokoa-kikiok.

⁵ Asaf nanahelek da'di leo mauli-malangan makasososak ma Zakharia da'di limaboa kona na. Yeiel, Semiramot, Yehiel, Matica, Eliab, Benaya, Obed-Edom ma Yeiel nanahelek soaneu lakaminak simbal,

⁶ ma imam dua, fo nde Benaya ma Yahaziel nanahelek soaneu ala puu lahele pupuu ka nai Peti Hehelu-balataak ndia matan na.

⁷ Ndia nde la'i makasososan-na Dauk fe Asaf ma nono nala lakamee koa-kio neu Manetualain.

Asaf ma nono nala nakamee kokoa-kikion

⁸ Koa-kio neu Manetualain, tui-benga matua-mademan, tui tatao-nono'in nai leoinak-kala tala'da.

⁹ Makamee kokoa-kikiok ba'eneu Manetualain, tui-benga basa tatao-nono'in lala'en fo dodoo doak kana.

¹⁰ Ndia nde Manetualain Fo Kisak; mamahoko-stelee leona, nana Ndia nuun ita; basa manasene-do'ok kana ela leo been-na mamahko-setelee.

¹¹ Moke be'i-balakaik neme Ndia mai, sene-do'ok neun tunga faik.

^12-13 Hai, Yakob fo Manetualain atan na tititi-nonosin nala lemin! Hai Israel, fo ana hehele nala tititi-nonosin nala lemin! Mafandendelek basa manada'di beuk fo Ana taon, boso mafandeleheni nakeketu nala.

¹⁴ Amak ka nde been-na ita Manetualain na, nakeketu na nanapakek nai basa daebafak ka lala'en-na.

¹⁵ Nafandendelek tataasesa neu hehelu-balataan, hala-hehelun-na nanapakek losa dodoon-na.

¹⁶ Ana tao hehelu-balataan ndia no Abraham, de basa boema no Isak,

¹⁷ boema Ana pakunisa no Yakob da'di hehelu-balataak fo manaketu-basa taak ba'eneu hataholi Israel-la.

¹⁸ Nafa'da nae, “Dae Kanaan-na neukose Au fen neu o fo da'di o pusakam.”

¹⁹ Makahulun-na Manetualain anan nala laso'da da'di leo hataholi manamai nai naa sila dede'u nala ka'da lumanak mesan.

²⁰ Ala laleu-lalaak leme leoina leo leoina leu, lali leme nusak esa leo nusa fe'ek leu

²¹ Tehu Manetualain ta po'ilotak su'di see tuni ndeni fas; nanahu sila, de Ana fe mane-manek-kala nasanene'dak nae,

²² “Boso dudungu-papau Au hataholi daebafak heheleng ngala, boso tao mangalauk neu Au nabi ngala.”

²³ Makamee ba'eneu Manetualain, hai daebafak ka lala'en-na, tunga faik tui-benga halak namahoko-seteleek mae Ndia nde soi-tefa basa ita so.

²⁴ Tui matua-mademan neu leoinak-kala ma tatao-nono'in fo matuainan na neu hataholi daebafak ka.

²⁵ Nana Manetualain matuaina ma nanakoa-nanakiok nanseli; Ndia muse nanabii-namata'uk lena neme basa lamatua daebafak lala'en-na mai.

²⁶ Leoina fe'ek kala lamatua daebafan-nala ka'da dodoki-dudula sosongo-tatangok mesan. Tehu Manetualain nde been-na manamakadada'dik lalai ma daebafak ka.

²⁷ Matua-madema ma Mandela-masa'ak ka poti nalan, uman na henuk no koasa ma namahoko-seteleek.

²⁸ Koa-kio Manetualain leon, hai hataholi daebafak kala lemin! Koa-kio matua-mademan ma be'i-balakain.

²⁹ Koa-kio na'den fo mandela-masa'ak, ma meni tutunu-hohotuk leo uman dale neu. Sene-do'ok Manetualain no pake bua papake makaluku-makatele!

³⁰ Dele ngge'be-ngge'be nai matan na, hai basa daebafak ka lala'en-na! Daebafak ka mateaina de ta nanggengo fa.

³¹ Hai lalai ma daebafak ka, mamahoko-setelee leona! Tui-benga neu leoinak-kala mae Manetualain ndia Manek.

³² Mapoponu leon hai tasi no basa oe-isin-nala! Mamahoko-setelee leon hai mook kala loo basa bubu'u-palusa nala lala'en-na!

³³ Ai manai nula dale la neukose hika-latadale nana Manetualain mai soaneu Anapaleta nai daebafak ka.

³⁴ Moke makasi neu Manetualain, nana Ndia malole; susue-lalain manaketu-basa taak.

³⁵ Mafa'da mae, “Ou Manetualain, fo ami Manasoi-manatefa ma, soi-tefa mala ami neme leoinak-kala koasan-na mai ma tao makabubua falik ami fo ela ami hapu moke makasi ma koa-kio O na'de malalao-malalafum ma!”

³⁶ Koa-kio Amak, fo Israel Manetualain na, besak ia losa dodoon-na! Basa boema basa hataholi Israel-la lala'en-na lafa'da lae, “Tete'ek ka”, boema ala koa-kio Manetualain.

Sene-do'ok ka nai Yerusalem ma nai Gibeon

³⁷ Basa boema Manek Dauk ka fe bela-ba'uk neu Asaf ma hataholi Lewi fe'ek kala soaneu ala ito-ato lahele basa hata fo natutik no makaluku-makatele a nai mamanak fo nai bee Manetualain Peti Hehelu-balataan nanape'dak. Tunga faik sila muse tao bela-ba'uk lai ndia,

³⁸ ala hapu tulu-falik neme Obed-Edom fo Yedutun anan na, boema hataholi fe'ek neehulu falu fo sila bei teidale-bobogik esa. Obed-Edom ma Hosa nde been-na manamanea lelesuina.

³⁹ Tehu Zadok ma imam fe'ek kala hapu bela-ba'uk soaneu ala ito-ato lahele makaluku-makatele a nai mamanak makaluku-makatele nai Gibeon.

⁴⁰ Tunga-tunga fafai le'donoson ala muse fe tutunu-hohotuk nanatunuk nai mei tunu-hotuk lain nandaa no hoholo-lalanek fo Manetualain fen neu hataholi Israel-la

⁴¹ Imam Zadok ma imam-imam sila-la hapu tulu-falik neme Heman ma Yedutun boema hataholi fe'ek fo nanahele hehelik soaneu lakamee kokoa-kikiok ba'eneu Manetualain nanahu susue-lalain fo manaketu-basa taa ka.

⁴² Heman ma Yedutun boeo hapu bela-ba'uk soaneu pupuuk, simbal boema sasanu fe'e-fe'ek fo nananakaminak tunga nakamee kokoa-kikiok ka. Teidale-bobongik Yedutun hataholin-nala hapu bela-ba'uk soaneu lanea lelesuina la.

⁴³ Basa boema basa hataholi-la fali leo esa-esak uman neu. Leondiak boe Dauk, ana fali neu donge teidalen-nala.