1 TAWARIKH 15 - Susula Malalaok Hehelu Palak Ma Hehelu Beuk

Sadia soaneu laliheok Peti Hehelu-balataak ka

¹ Dauk napadedeik uman-nala nai kota Dauk ka, ma ana sadia mamanak soaneu Manetualain Peti Hehelu-balataa na, boema ana tao pandopo ba'eneu Peti ndia.

² Dauk nafa'da nae, “Ka'da hataholi Lewi la nde bole so'u Manetualain Peti Hehelu-balataan ndia, nana sila nde Manetualain heles soaneu ndolo Peti ndia ma lamahelen losa dodoon-na.”

³ Boema Dauk naloo basa hataholi Israel-la lala'en-na mai leo Yerusalem mai, soaneu ala laliheok Manetualain Peti Hehelu-balataan leo mamanak fo ana sadia basan so.

⁴ Boema Dauk nadenu Harun tititi-nonosin ma hataholi Lewi la lakabubua.

⁵ Boema neme teidale-bobongik Kehat, leo Lewi a, Uriel nde nauli-nalanga teidale-bobongin hataholi natun esa duahulu.

⁶ Neme teidale-bobongik Merari, Asaya nde nauli-nalanga hataholi natun dua duahulu.

⁷ Neme teidale-bobongik Gerson na, Yoel nde nauli-nalanga hataholi natun esa teluhulu.

⁸ Neme teidale-bobongik Elsafan na, Semaya nde nauli-nalanga hataholi natun dua.

⁹ Neme teidale-bobongik Hebron na, Eliel nde nauli-nalanga hataholi faluhulu.

¹⁰ Ma neme teidale-bobongik Uziel la, Aminadab nde nauli-nalanga hataholi natun esa sanahulu dua.

¹¹ Boema Dauk naloo Imam Zadok ka ma imam Abyatar a boema hataholi Lewi ka neek sila-la, fo nde: Uriel, Asaya, Yoel, Semaya, Eliel ma Aminadab.

¹² Dauk nafa'das nae, “Emi nde been-na mauli-malanga teidale-bobongik nai leo Lewi dalek. Hu ndia de, ela leo been-na emi ma hataholi Lewi fe'ek kala tao malalao-malalafu aoina mala fo ela emi hapu laliheok Amak, fo Israel Manetualain na Peti Hehelu-balataan leo mamanak fo au sadia basan so.

¹³ Lelek Peti ndia nanalaliheok makasososan-na, emi ta ndia fo so'un fan. Hu ndia de Amak, fo ita Manetualain na huku ita, nana ita ta sene-do'ok kana ta nandaa no hihii-nanaun fa.”

¹⁴ Da'di, basa imam mala ma hataholi Lewi la tao lalalao-lalalafu aoinan-nala fo ela ala hapu laliheok Amak, fo Israel Manetualain na Peti Hehelu-balataan.

¹⁵ Ma nai lelek Peti ndia nanalaliheok, ala ndolo lenik kana ai ndondolok, tunga nakanenetek fo Manetualain fen tunga Musa.

¹⁶ Dauk boeo nadenu basa mauli-malangan hataholi Lewi sila-la, fo ela ala fe paleta neu hataholi de'ubee leme sila leo na mai fo lakamee ma lakaminak kecapi ma simbal nenik kokoa-kikiok.

^17-21 Nai manamakameek sila-la teidalen nala dalek, ala hele hataholi-la fo lakaminak simbal liti nde ia: Heman, fo Yoel anan na sama-sama no tolano ka'a-fa'din fo mana'de Asaf fo Berekhya anan na, ma Etan fo Kusaya neme teidale-bobongik Merari anan na. Soaneu manatungas ala boema manamakaminak kecapi fo lii na nai lain, hataholi Lewi fo nanahelek kala nde ia: Zakharia, Yaaziel, Semiramot, Yehiel, Uni, Eliab, Maaseya, ma Benaya. Soaneu manamakaminak kecapi fo lii na nai dae, hataholi Lewi fo nanahelek kala nde ia: Matica, Elifele, Mikneya, Azazya, ma manamanea Manetualain Uman na, hataholi dua, fo nde: Obed-Edom ma Yeiel.

²² Kenanya nanahelek soaneu nalanga basa manamakaminak sasanu fo leme leo Lewi sila-la nana ndia malelainan-nai nakaminak sasanu dalek.

^23-24 Berekhya ma Elkana sama-sama loo Obed-Edom ma Yehia, nanahelek da'di manamanea Manetualain Peti Hehelu-balataan. Basa imam ia la: Sebanya, Yosafat, Netaneel, Amasai, Zakharia, Benaya ma Eliezer nanahelek soaneu ala puu pupuu ka nai Peti ndia matan-na.

Manetualain Peti Hehelu-balataan nanalaliheok leo Yerusalem neu

²⁵ Boema Dauk sama-sama no mauli-malangan Israel-la ma malanga solda'du matuaina la leu leo Obed-Edom uman leu fo ho'ileni Peti Hehelu-balataak ndia no feta matuaina.

²⁶ Ala fe sapi mane hitu ma bi'ilopo hitu leo Manetualain neu, nanahu Ana tulu-fali hataholi Lewi fo manandolo Peti Hehelu-balataak ndia so.

²⁷ Nai lelek ndia Dauk pake ba'du manalu aba lutu, leondiak boe basa manamakaminak sasanu la, ma Kenanya fo sila mauli-malangan-na, boema hataholi Lewi fo manandolo Peti Hehelu-balataak Dauk pake ba'du efod.

²⁸ Basa hataholi Israel-la lala'en-na leu tunga Peti Hehelu-balataak ndia losa Yerusalem no ala eki kao-kao ma pupuu liik, nafiri, simbal ma kecapi.

²⁹ Lelek Peti ndia lenin leo kota dale neu boema, Mikhal, fo Saul anafe'on-na titino neme jendela mai de nita Manek Dauk ka foti-longe boema namahoko-setelee. Boema Mikhal mete Dauk soona ana maluan.