1 TAWARIKH 11 - Susula Malalaok Hehelu Palak Ma Hehelu Beuk

Dauk da'di manek Israel ma Yehuda

¹ Basa mauli-malangan leoina Israel-la, ala mai leo Dauk nai Hebron, de lafa'da lae, “Ami ia, Ama Manek tia-lain.

² Neme makahulun eli mai, nakalenak nai lelek Saul bei paleta ami-a, metema solda'du Israel-la leu letee-lata'ti soona Ama Manek nde nauli-nalanga. Bai te Manetualain fo Ama Manek Manetualain-na, naheluk basa nae Ama Manek nde neukose nauli-nalanga anan-nala, ma da'di sila manen-na.”

³ Boema Dauk tao hehelu-balataak no mauli-malangan Israel sila-la. Boema ala ndo ein da'di manek Israel, sama leo hata fo Manetualain helu basan tunga Semuel.

⁴ La'iesa boema, Manek Dauk-ka no basa solda'du Israel-la lala'en-na, leu sapu-la kota Yerusalem-ma. Nai lelek ndia, kota ndia na'de Yebus, ma hataholi Yebus-sala leo lai ndia, fo nde kota ndia laun matetun-nala.

^5-7 Hataholi Yebus-sala lafa'da basa Dauk, lae hapu nai bee, ndia hapu masok sila kota ndia. Tehu Dauk hapu loso-na sila kota musun-na, na'de Sion. Nai lelek ndia, Dauk po'a-benga basa neu solda'dun-nala, nae hataholi makasososak fo ana taonisa hataholi Yebus esa, neukose nanandoo eik da'di malanga solda'du matuaina. Boema hu kande Yoab nde makasososa sapu-na hataholi Yebus-sala boema, Yoab nanandoo eik da'di malanga solda'du matuaina. (Yoab inan na'de Zeruya.) Loso-la kota musu Sion-na boema, Dauk leo neme ndia. Hu ndia de, neme lelek ndia mai, loke kota musu ndia lae “Kota Dauk”.

⁸ Dauk nafofo'a falik kota ndia, de ana mulai po'a namademan nenik dae, nai pupukuk-ka boboan dulu; basa boema, Yoab nafofo'a nakandoo mamanank ndia losa basan.

⁹ Dauk be'i-balakain boetai popo-tama nakandoo, nanahu Manetualain tulu-falin.

Dauk palani ta'ti batun fo nananita-nalelak-kala

¹⁰ Basa Dauk malanga solda'du matuainan fo nananita-nalelak-kala, na'den-nala nde ia. Latee-lata'ti sama-sama loo laun Israel-la lala'en-na, fo ela Dauk da'di manek, sama leo Manetualain helu basan so. Ma ala tia-to'ba lahele Dauk paletan-na.

¹¹ Malanga solda'du matuaina makasososak-ka nde Yasobam, fo hataholi Hakhmoni, ndia mauli-malanga “Triwira”. Nai natee-natatik esa dalek, ana la'ban hai hataholi 300, de ana tee nisa la'i esak-kasa.

¹² Hataholi ka 2 nai Solda'du Matuaina ka teluk sila-la nde Eleazar, fo Dodo anan-na, neme leo-ingu Ahohi-a mai.

^13-14 Nai natee-natatik manai Pas-Damim-ma dalek, natee-nata'ti nok Dauk fo ala la'ban hataholi Filistin-nala. Lelek solda'du Israel-la mulai lalai boema, no solda'dun-nala lakatatakak lahele leme tina gandum esa tala'da heon, de latee-lata'ti la'ban hataholi Filistin sila. Boema Manetualain fen sesengik matuaina.

^15-16 Nai faik esa boema, hataholi 3 leme Dauk malanga solda'du matuina ka 30-n fo nananita-nalelak-kala, leu latongo loo Dauk nai mamanak esa nai sila mamana nakatatakan-na nai lete batu esa, deka no Leak Adulam-ma. Nai lelek ndia, hataholi Filistin-nala ofu nai Bafak Refaim-ma, de solda'dun bubuak esa langatuu-la Betlehem.

¹⁷ Dauk nahiik nanseli nita nggolo-ta'dun ndia, de nafa'da nae, “Ah, sa'di leo been-na, hapu hataholi fe au inu oe neme oedolu manadeka no Betlehem lelesuinan-na.”

¹⁸ Malanga solda'du matuaina ka 3-k sila-la lamanene dede'ak ndia boema, ala tola tunga hataholi Filistin-nala ofun dale, fo leu hela oe neme oedolu ndia mai, basa boema lenin leo Dauk neu. Tehu Dauk ta nau ninu fa, de ana po'a henin da'di neu tunu-hotuk neu Manetualain.

¹⁹ Nafa'da nae, “No Manetualain na'den-na, au ta bisa inu oe ia fa! Metema au inun soona, nono'kabai au inu hataholi fo ala nau lase'o heni so'dan-nala, daan-na nde ndia!” Da'di, Dauk ta nau ninu oe ndia makandodook fa. Palani ta'ti batu ka 3-k sila-la tatao-nono'i malolen-na nde ndia.

^20-21 Malanga solda'du matuaina ka 30-k fo nananita-nalelak sila-la boeo, ala fois na'de “Tridasawira”. Abisai, fo Yoab fa'din-na nauli-nalangas. Ana tee nisa hai hataholi 300 so, de hu kande ndia de, ana da'di nananita-nalelak. Tehu napalanin-na, ta sama leo Malanga Solda'du Matuaina ka 3-k sila-la fa.

²² Malanga solda'du nananita-nalelak fe'ek esa nde Benaya, fo Yoyada hataholi Kabzeel ndia, anan-na. Ana napalani nanseli. Ana taonisa palani ta'ti batu matuaina 2 leme Moab mai. Nai fai salju esa, ana masok hai leo bolok esa dalek neu, de ana tao nisa singa esa neme ndia.

²³ Ana tao nisa hai hataholi Masir ao matuaina esa so boe; Hataholi ndia dedeman-na, metel 2 lenak. Hataholi ndia ho'u tee matuaina, tehu Benaya nasasalematak non nenik ka'da ai kalapu'ak. Ana loso-na tee manai hataholi Masir ndia liman-na, boema ana tee nisan nenik tee ndia.

²⁴ Benaya, fo hataholi esa neme Tridasawira mai, tatao-nono'i malolen-na nde ndia.

²⁵ Nai bubuak ndia dalek, Benaya nde nananita-nalelak-ka, tehu napalanin-na, ta sama no Malanga Solda'du Matuaina ka Teluk-kala fa. Dauk so'un da'di ndia manamanea mesan.

^26-47 Na'dek manamaik ia-la nde been-na, malanga solda'du matuaina fe'ek fo nananita-nalelak-kala: Asael, fo Yoab fa'din-na Elhanan, fo Dodo hataholi Betlehem ndia anan-na Samot, fo hataholi Harod Heles, fo hataholi Peloni Ira, fo Ikes hataholi Tekoa ndia anan-na Abiezer, fo hataholi Anatot Sibkhai, fo hataholi Husa Ilai, fo hataholi Ahoha Maharai, fo hataholi Netofa Heled, fo Baana hataholi Netofa ndia anan-na Itai, fo Ribai hataholi Gibea nai leo Benyamin nusan-na, anan-na Benaya, fo hataholi Piraton Hurai, fo hataholi manai bafak Gaas-sala Abiel, fo hataholi Araba Azmawet, fo hataholi Bahurim Elyahba, fo hataholi Saalbon Hasyem, fo hataholi Gizon Yonatan, fo Sage hataholi Harari ndia anan-na Ahiam, fo Sakhar hataholi Harari ndia anan-na Elifal, fo Ur anan na Hefer, fo hataholi Mekherati Ahia, fo hataholi Peloni Hezrai, fo hataholi Karmel Naarai, fo Ezbai anan-na Yoel, fo Natan tolanoon-na Mibhar, fo Hagri anan-na Zelek, fo hataholi Amon Naharai, fo hataholi Beerot, fo manaho'u Yoab tafa-sisilon Ira ma Gareb, fo hataholi Yetri Uria, fo hataholi Het Zabad, fo Ahlai anan na Adina, fo Siza anan-na (lasik esa nai leo Ruben-na dalek, lanuu solda'du 30) Hanan, fo Maakha anan-na Yosafat, fo hataholi Mitni Uzia, fo hataholi Asytarot Syama ma Yeiel, fo Hotam hataholi Aroer ndia anan-nala Yediael ma Yoha, fo Simri hataholi Tizi ndia anan-nala Eliel, fo hataholi Mahawim Yeribai ma Yosawya, fo Elnaam anan-nala Yitma, fo hataholi Moab Eliel, Obed ma Yaasiel, fo hataholi Mezobaya.