SEMUEL SUSULAK-KA ESAN-NA 5 - Susula Malalaok Hehelu Palak Ma Hehelu Beuk

Peti Hehelu-balataak-ka nai hataholi Filistin-nala tala'da heon

¹ Lelek hataholi Filistin-nala loso-la Manetualain Peti Hehelu-balataan boema, ala ho'i lenin neme Eben-Haezer leo sila kotan Asdod neu.

² Losa ndia boema, ala ko'o leni peti ndia leo sila lamatua daebafan fo nde Dagon, uma sosongo-tatangon dale neu, de ala pe'dan neu lamatua daebafak ndia dodoki-dudulan boboan-na.

³ Lelek balahaa fafaik, de Asdod laun-nala mai leo uma sosongo-tatangok ndia mai boema, lita lae Dagon dodoki-dudulan tu'da natotonokala, nai dae lain, fo nai Manetualain Peti Hehelu-balataan matan-na! Ala ko'o-la dodoki-dudulak ndia, de ala pe'da falik-kana neu mamanan-na.

⁴ Tehu balahaa fafaik boema, ala lita tu'da heni seluk dodoki-dudulak ndia nai Peti Hehelu-balataak ndia matan-na so. Oek ia, dodoki-dudulak ndia langan-na ma alun duas nananggelohenik, de beselee nai lelesu bafan-na; ela ka'da dodoki-dudulak ndia aon-na bei katemak. (

⁵ Hu ndia de, losa besak ia, lamatua daebafak Dagon-na imam-mala ma basa hataholi manasene-do'ok manai Asdod-ta, ala latanggani seli Dagon uma sosongo-tatangon ndia lelesun-na fa.)

⁶ Basa boema, Manetualain huku Asdod laun-nala loo nusak manai titia-tatain nenik peta-paek nai aon-nala.

⁷ Lelek lita manada'dik ndia la'e sila boema, lafa'da lae, “Israel Manetualain-na huku ita ma ita lamatua daebafan Dagon so. Ita ta bole po'ilotak Peti Hehelu-balataan nahele naladook-ka seluk, nai ia bai.”

⁸ Hu ndia de, ala ka'i Filistin manek-ka liman-nala, fo daenga lakabubua, boema latane lae, “Ita muse tao Israel Manetualain-na, Peti Hehelu-balataan ndia le'e?” Boema manek sila-la lataa lae, “Lali heok-kana leo kota Gat-ta neu.” Da'di, ala lali heok peti ndia leo kota Gat, fo kota fe'ek esa nai Filistin.

⁹ Tehu lelek peti ndia losa kota ndia boema, Manetualain huku kota ndia boe de lapangamak matuaina da'di. Kota ndia laun-nala, nau mulik do lasik boe, nanahukuk nenik peta-paek da'di nai aopaan-na.

¹⁰ Boema leni Peti Hehelu-balataak ndia leo Ekron neu, fo kota fe'ek esa seluk nai Filistin. Peti ndia losa ndia boema, laun-na nggasi ma lae, “Leni Israel Manetualain Peti Hehelu-balataan ndia leo ia mai, fo ana taonisa ita basa-basa-tala.”

¹¹ Hu ndia de, laloo basa Filistin manen-nala, fo lakabubua, boema lafa'da lae, “Meni falik Israel Manetualain-na, Peti Hehelu-balataan ndia leo mamana makasososan-na neu, fo daenga ana boso taonisa ita ma ita teidale-bobongin-nala.” Lapangamak-ka da'di nai kota dale lala'en-na, nanahu Manetualain huku laun-na nenik huhuku mabelaina.

¹² Mate ela hataholi bee soona, he'di peta-paek la'en, nalosa kota ndia laun-na nggasi neu sila lamatua daebafan-nala, fo loke tutulu-fafalik.