SEMUEL SUSULAK-KA ESAN-NA 31 - Susula Malalaok Hehelu Palak Ma Hehelu Beuk

Mate Saul no anamanen-nala

¹ Ndia te, hataholi Filistin-nala latee-lata'ti la'ban hataholi Israel-la, nai letelepak Gilboa. Mate hataholi Israel makadotok neme ndia, tehu nggelok loo Saul no anamanen-nala lalai.

² Tehu hataholi Filistin-nala usi tungas, de ala taolisa Saul anamanen telu, fo nde Yonatan, Abinadab ma Malkisua.

³ Natee-nata'tik-ka makee besa-besa nai Saul boboa-kaisun, de musu-a kokou isin-na tolan, nalosa nakahina matuaina.

⁴ Boema, Saul nafa'da ta'eanak manaho'u tafa-sisilon nae, “Fe'a-ma, o tafainam-ma, fo paun neu au, fo ela hataholi fo ta lalelak Manetualain sila-la, boso tao lakamiminak au, fo taolisa au.” Tehu ta'eanak ndia, ta nau pau fan, nanahu ana sue-na Saul ba'un-na seli. Hu ndia de, Saul ho'in-na tafainan-na, de ana bala aoinan-na neu tafaina ndia, tanen lain.

⁵ Lelek ta'eanak ndia, nita Saul maten so boema, ndia boeo, ana bala aoinan-na neu ndia tafainan-na tanen lain, de maten nai Saul boboan-na.

⁶ Da'di, Saul no anamane ka telun-nala, ma basa solda'dun-nala, boema ta'eanak ndia, mamaten-nala nai faik esa dalen-na.

⁷ Lelek hataholi Israel manaleo nai Bafak Yizreel-la selik, ma Lee Yarden-na boboan dulu, lamanene lae solda'du Israel-la lalai so, ma lae mate Saul no anamanen-nala so boema, lalai la'oela sila kotan-nala. Basa boema, hataholi Filistin-nala, langatuu-la kota sila-la.

⁸ Neu fai balahaan-na, fo lelek hataholi Filistin-nala mai lamanako popolak-kala boema, lita mate Saul no anamanen-nala lai letelepak Gilboa.

⁹ Ala te'te-la Saul langan-na, ma ala ho'i-la ba'du musun-na, boema hataholi Filistin-nala, ladenu hataholi neu leo nusa Filistin-na lala'en-na, fo nanduku-nalosak hala malole ndia neu laun-nala, ma neu sila lamatua daebafan-nala.

¹⁰ Basa boema, ala pe'da Saul ba'du musun ndia, nai lamatua daebafa inak Asytoret-ta, uma sosongon dale, ma ala paku popolan-na neu kota Bet-Sean-na, papala nanadaman-na.

¹¹ Tehu, laun Yabesh manai Gilead-ta, lamanene hataholi Filistin-nala tatao-nono'in soaneu Saul

¹² boema, hataholi palani ta'ti batu-la, ala la'ok leme ndia leo Bet-Sean leu, le'odae katemak esa. Lakona heni Saul no anamanen-nala popolan-nala, neme kota ndia papala nanadaman lain mai, boema lenin leo Yabesh neu, de ala hotun.

¹³ Ala hehele lakabubua dui-kalun-nala, de latois nai kota ndia, nai ai popo-tamariska huun-na; basa boema, ala oka aon-nala, faik hitu dalen-na.